Paipel AISEA 54
54
Än Kot tong esemüch ngeni Israel
54.1-10
Iei alon ewe Samol mi Lapalap,
“Kopwe köl, Jerusalem en mi wewe ngeni eman fefin mi rit.
Kopwe chietä kölün pwapwa o leüömong le kökkö,
en esap toruk cheuchen fam.
Pun en ewe mi aleman epwe chomong noum
lap seni nöün ewe mi pwüpwülü. Kal 4.27
Kopwe awattelai imwomw imw mangaku,
kopwe pwal ameresala chechen lon rumwom, pwe kopwe awattelai.
Iwe, kopwe alangatama selin imwom o anüküchara chüfölün.
Pun kopwe awattelai kiännin leniom me lepekin meinisin,
nge mwirimwirum kana repwe fanüeni fanüen chon ekewe mwü,
repwe pwal chonisefäli ekewe telinimw mi pöla.
 
Kosap niuokus, pun kosap säw.
Kosap niueiti itengau, pun kosap küna turunufas.
Iwe, kopwe manlükala om säw ka eäni lupwen fansoun om föpwül,
nge kosap chüen chechemeni om itengau lupwen fansoun om lipichsefäl.
Pun Ewe mi Föruk epwe usun chök pwülüom reöm,
itan Samol mi Unusen Manaman.
Ewe mi Pin lon Israel om Chon Amanau,
i ewe Kot mi nemeni unusen fanüfan.
Israel, ka wewe ngeni eman föpwül mi riaföü lon letipan,
pun pwülüan a likitala.
Nge ewe Samol mi Lapalap a körisefäliik, a etiwasefäliik o urenuk,
‘Lon ekis chök fansoun üa lükisökuruk,
nge ren tong mi lapalap üpwe etiwasefäliik.
Lon watten ai song üa aopa senuk won mesei fansoun mochomoch,
nge ren ümöümöch esemüch üpwe tongeäsinuk.’
Iei alon ewe Samol mi Lapalap om Chon Amanau.
 
Ei fansoun a usun chök ewe fansoun Noa me rei:
Usun üa pwon fän akapel ngeni Noa pwe ewe noter esap chüen pwölüela fanüfan,
ina usun üa pwal pwon fän akapel ngonuk pwe üsap chüen songeituk,
üsap pwal chüen apwünguk. Ken 9.8-17
10 Pun chukutekia kana repwe märela,
chukutekison kana repwe chechech, nge ai ümöümöch ngonuk esap mär senuk,
ai pwonen kinamwe esap mänükünük.
Iei alon ewe Samol mi Lapalap, ewe a tongeek.”
Ewe Jerusalem mi fö
54.11-17
11 Iwe, ewe Samol mi Lapalap a apasa,
“En telinimw mi riaföü, asepwäl mi watte a mölümölituk,
nge esap wor eman a achipok.
Üpwe senuketä ren fau mi molupolup,
üpwe pwal föri longolongum ren ewe fau safaia.
12 Üpwe pwal föri ungom kewe seni ewe fau akit * safaia me akit iten ekoch fau aüchea,
asamalapom kewe seni fau mi meriweriw,
nge tittum meinisin seni fau aüchea. Pwär 21.18-21
13 Iwe, noum kewe mwän meinisin repwe kaiö seniei,
üpwe awöüür o fang ngeniir kinamwe. Joh 6.45
14 Pwüng epwe anükücharok,
chon ariaföüuk repwe toau senuk pwe kosap chüen niueitiir,
nge niuokus mi afeiengau esap arap ngonuk.
15 Are eman epwe fiu ngonuk,
kopwe silei pwe esap pop seniei.
Nge iö a fiu ngonuk, epwe kuf reöm.
16 Nengeni, üa förätä ewe chon angang ngeni mächä,
a säipöü ewe ekkei o wusi ewe mächä
pwe epwe föri eu pisekin maun mi afeiengau.
Ngang üa pwal förätä ewe chon kata pwe epwe atai.
17 Nge esap wor och pisekin maun epwe tongeni afeiengauok.
Iwe, kopwe tongeni pälüeni chokewe meinisin mi atipisuk lon kapwüng.
Iei feiöchün nei kewe chon angang me rei,
iei usun üa awineer.”
Ewe Samol mi Lapalap a kapas.

54:1: Kal 4.27

54:9: Ken 9.8-17

*54:12: safaia me akit iten ekoch fau aüchea

54:12: Pwär 21.18-21

54:13: Joh 6.45