Paipel AISEA 52
52
Kot epwe angasa Jerusalem seni an oola
52.1-12
Kopwe pwätä, kopwe pwätä, Jerusalem, kopwe angei pöchökül pwe kopwe pöchökülsefäl.
Kopwe pwilitalong womw ufom mi ling, en Jerusalem ewe telinimw mi pin.
Iwe, chokewe resap sirkomsais pwal chokewe mi limengau resap chüen tolong lomw. Pwär 21.2,27
Kopwe wichikala senuk om pwül moromor, en Jerusalem.
Kopwe ütä seni won pwül o mot won om lenien motun king.
Oupwe apichala föfömi, ämi aramasen Sion mi oola.
Iei alon ewe Samol mi Lapalap ngeni nöün aramas, “Lupwen aramas ra nöünikemi amanau, resap püngütiu liwinimi, ina usun chök esap wor eman epwe püngütiu liwinimi, lupwen oupwe ngasala.” Pun iei alon Kot ewe Samol mi Lapalap, “Me lom nei aramas ra püsin feila Isip pwe repwe wasöla lon. Mürin chon Asiria ra ariaföüür, nge esap wor popun. Nge met üa küna iei? Nei aramas ra oola, nge esap wor liwinir. Chokewe mi nemeniir ra sikesik o aitengauaei fansoun meinisin. Rom 2.24 Iei mine nei aramas repwe silei itei. Lon kan fansoun repwe feito, repwe pwal silei pwe ngang ewe mi fos ngeniir. Ellet, ngang üa kapas ngeniir.”
A mürina ewe chon künö mi fetal won ekewe chuk
o uwato pworaus allim,
ewe a arongafeili kinamwe o uwato kapasen feiöch.
A asilefeili pwe aramas ra tongeni küna manau o üreni Sion,
“Om Kot a nemenem.” Nah 1.15; Rom 10.15; Ef 6.15
Kopwe rongorong. Noum kewe chon mas ra alapatä mwelier
o kölfengen fän pwapwa,
pun ra küna ren meser
pwe ewe Samol mi Lapalap a liwinsefäliti Sion.
Oupwe leüömong le kölfengen,
ämi leni mi tala lon Jerusalem,
pun ewe Samol mi Lapalap a achipa nöün aramas,
a pwal angasa chon Jerusalem.
10 Iwe, ewe Samol mi Lapalap a pwärawu an manaman mi pin ngeni chon ekewe mwü won fanüfan,
nge lesopun fanüfan meinisin repwe küna
pwe ach we Kot a amanaua nöün aramas.
 
11 Oupwe towu, oupwe towu seni lon Papilon,
nge ousap atapa och mettoch mi limengau.
Oupwe towu seni o alimöchükemi,
ämi mi mwärei pisekin imwen ewe Samol mi Lapalap. 2.Kor 6.17
12 Nge ousap towu fän atapwalapwal,
ousap pwal sü.
Iwe, ewe Samol mi Lapalap epwe akom mwemi,
ewe Koten Israel epwe kükümwir o tümwünükemi.
Riaföün Nöün Kot chon angang
52.13-53.12
13 Ewe Samol mi Lapalap a apasa,
“Nengeni, nei chon angang epwe lipwäköch,
epwe seikitä o ling, epwe pwal fokun tekiatä.
14 Iwe, chomong aramas ra mairü ren,
lupwen ra küna pwe esap wewe ngeni aramas,
esap pwal chüen lapalapeni lapalapen nöün aramas.
15 Ina usun chomong mwü won fanüfan repwe pwal mairü ren,
nge king kana repwe fanafanala fän mesan.
Pun repwe küna mine eman esap asile ngeniir,
nge mine resamwo rongorong repwe ekieki usun o wewe ren.” Rom 15.21

52:1: Pwär 21.2,27

52:5: Rom 2.24

52:7: Nah 1.15; Rom 10.15; Ef 6.15

52:11: 2.Kor 6.17

52:15: Rom 15.21