Paipel AISEA 43
43
Kot chök ewe Chon Amanau
43.1-28
Iei alon ewe Samol mi Lapalap mi föruk, Israel,
“Kosap niuokus, pun ngang üa angasok.
Üa köri ngonuk itom, en nei.
Are kopwe fetal lon koluk, üpwe etuk.
Are kopwe fetal lon chanpupu, öütan esap amolumuk.
Nge are kopwe fetal lon ekkei, kosap kar,
nge pulopulan esap kuruk.
Pun ngang ewe Samol mi Lapalap om Kot,
ngang Ewe mi Pin lon Israel om Chon Amanau.
Iwe, üpwe eäni Isip penmanau fän itom,
üpwe pwal fangala Itiopia me Sepa pwe siwilum,
nge en kopwe ngas.
Pokiten om aüchea me om itetekia me rei,
pwal pokiten ai echenuk,
üpwe fangala aramas pwe siwilum,
pwal ekewe mwü pwe akasiwilin manauaom.
Kosap niuokus, pun ngang üpwe etuk.
Üpwe aliwinato mwirimwirum kewe seni ötiu me lotou
o achufengenikemi.
Iwe, üpwe apasa ngeni efeng, ‘Kopwe aliwinireto,’
üpwe pwal apasa ngeni ör, ‘Kosap amwöchüür.’
Oupwe aliwinato nei kewe alüal seni ekewe fanü mi toau,
pwal nei kewe föpwül seni lesopun fanüfan.
Oupwe aliwinireto meinisin mi iteni itei,
chokewe üa föriir pwe repwe alingaei,
chokewe üa alapalapeer o afisiir.”
 
Iwe, Kot a apasa,
“Oupwe emwenawu ekewe aramas a wor meser, nge ra mesechun,
a pwal wor selinger, nge ra selingepüng.
Iwe, chon ekewe mwü meinisin repwe mwichefengen.
Iö lein ar kewe kot a tongeni osuni mine epwe fis?
Iö leir a pwärätä ekei mettoch ra fis ikenai?
Repwe uwato nöür kewe chon pwärätä,
pwe epwe pwä pwe ra pwüng,
epwe pwal pwä leten ar kapas.”
10 Iwe, ewe Samol mi Lapalap a apasa,
“Ämi chon Israel, ämi nei chon pwärätä
pwal nei chon angang.
Üa afilikemi pwe oupwe sileei o lüküei,
oupwe pwal weweiti pwe ngang chök Kot.
Esap wor eman Kot mi fis mwei,
esap pwal wor eman epwe fis me müri.
11 Ngang, ngang chök ewe Samol mi Lapalap,
nge lüki esap wor eman chon amanau.
12 Iwe, üa osuni mine epwe fis,
üa pwal amanauakemi o pwärätä ngenikemi pwe ngang Kot,
nge sap eman koten ekis leimi.
Iei mine ämi oua nei chon pwärätä.
Ngang ewe Samol mi Lapalap üa kapas.
13 Ngang chök Kot tori feilfeilachök.
Esap wor eman a tongeni amanaua eman seni lepei.
Üa akangang, nge iö epwe pineei?”
 
14 Iei alon ewe Samol mi Lapalap ämi Chon Amanau, Ewe mi Pin lon Israel,
“Üpwe tinala eu mwichen sounfiu Papilon fän itemi,
üpwe atekisonätiu ekewe chon Papilon o asüsüfeiliir,
pwe ar mweireir epwe wiliti ngüngüres.
15 Ngang ewe Samol mi Lapalap, Ewe mi Pin leimi,
pwal ewe Chon Afisi ämi chon Israel, ngang ämi we king.”
16 Me lom ewe Samol mi Lapalap a föri efoch al lematau,
efoch al lukalapen nonoon lematau.
17 A pwal emwenala woken me oris
me mwicheichen sounfiu mi pwora ngeni feiengau.
Iwe, ra turula, nge resap tongeni pwätäsefäl.
Ra muuk o kunula usun efoch wik.
18 Nge ewe Samol mi Lapalap a apasa,
“Ousap chüen achemato ekewe mettoch mi fis me lomlom.
Ousap pwal ekieki usun mine a fis lon ekewe fansoun ra la.
19 Nengeni, üpwe förätä eu mettoch mi fö.
Iei a fisitä. Ifa usun, ousap küna?
Üpwe föri efoch al lon fanüapö,
üpwe pwal föri chanpupu lon fanüpwas.
20 Iwe, ekewe manmwacho repwe asamoluei,
ekewe wolif me kawakaw repwe mwareitiei,
lupwen üa apupuolong koluk lon fanüapö,
pwal chanpupu lon fanüpwas,
pwe nei kewe aramas üa filiir repwe ün.
21 Ir ekewe aramas üa afisiir fän itei,
pwe repwe pwärätä ai ling.
22 Nge en Israel kosap köriei,
kosap pwal aweiresuk lon om angang ngeniei.
23 Kosap eäni asoren kek noum sip ngeniei,
kosap pwal asamoluei ren om asor.
Üsap aweiresuk ren ai tütüngor asor senuk
ika arianuk pwe kopwe uwato rei apach mi pwokus.
24 Iwe, kosap kamö lö mi pwokus fän itei,
kosap pwal amötüeila ren iwien om mönün asor.
Nge ka achouuei ren om tipis,
ka pwal aweiresiei ren om föföringau kana.
25 Ngang, ngang chök ewe Kot mi amoela om pupungau
fän püsin itei,
nge üsap chüen chechemeni om tipis kana.
26 Kopwe achema ngeniei om kewe föför mi öch. Sipwe kapwüngfengen.
Kopwe feito o fos pwe epwe pwä om pwüng.
27 Iwe, aemanün om lewo a tipis,
pwal om kewe souakom ra eäni pupungau ngeniei.
28 Iei mine üpwe föri met ekewe meilapen ämi imwenfel repwe küna turunufas ren,
üpwe pwal föri met Israel epwe fokun tala ren
o atolonga nei aramas lon itengau.”