1 Feiengauen chokewe ra kütta alilisir seni Isip. Ra lükülük won oris me woken pokiten chomongur, ra pwal lükülük won chon wawa oris pokiten ra fokun pöchökül, nge resap kütta alilisir me ren ewe Samol mi Lapalap, Ewe mi Pin lon Israel, resap pwal anomu ar apilükülük won. 2 Nge Kot a tipachem. Epwe awarato feiengau, nge esap siwili an kapas. I epwe ü ngeni chon föföringau, pwal ngeni chokewe mi alisi chon pwüngingau. 3 Iwe, chon Isip aramas chök, nge sap Kot. Nöür kewe oris fituk chök, nge sap ngün. Lupwen ewe Samol mi Lapalap epwe apwüngüür, ewe mwü mi pöchökül epwe tala, nge ewe mwü a angei alilisin seni epwe turula. Iwe, ir meinisin repwe feiengauöppök.

4 Iwe, ewe Samol mi Lapalap a kapas ngeniei, “Usun eman laion ika eman nienifön laion a ngüngü won liapan, nge esap niuokus ren mwelien eu mwichen chon mas ra feila ren, esap pwal süla ren aküranger, iei usun ngang ewe Samol mi Unusen Manaman üpwe feitiu pwe üpwe tümwünü ewe chuk Sion seni feiengau, nge esap wor eman epwe pineei. 5 Iwe, ngang ewe Samol mi Unusen Manaman üpwe tümwünü Jerusalem usun eman machang a chang won fasan, üpwe tümwünü o angasa, üpwe aopa o amanaua.”

6 Iei alon ewe Samol mi Lapalap, “Ämi aramasen Israel, oupwe kul ngeniei ngang ewe Kot oua fokun ü ngeni. 7 Iwe, lon ena fansoun ämi meinisin oupwe pöütala ämi kewe uluulun anümwäl mi för seni silifer me kolt oua püsin föriir, nge oua tipis ren. 8 Iwe, chon Asiria repwe mäla lon maun, nge sap ren pöchökülen aramas, ewe ketilas a nirela sap nöün aramas. Iwe, repwe sü seni ewe maun, nge nöür alüal aramas repwe nöüniir amanau. 9 Iwe, ar king epwe süla fän mösök, nge nöün kewe meilapen sounfiu repwe likitala ar filäik fän niuokus watte.” Iei alon ewe Samol mi Lapalap, ewe Kot a wor an lenien ekkei lon Sion, pwal an lenien um lon Jerusalem.