15
Kapasen osuni usun Moap
15.1-16.14
Iei än Kot kapas usun Moap: Lupwen ekewe telinimw Ar me Kir ra tatakis lon eu chök pwin, pwal unusen ewe fanü Moap a tala. Ais 25.10-12; Jer 48.1-47; Is 25.8-11; Am 2.1-3; Sef 2.8-11 Ekewe aramasen Tipon ra feitä won ekewe lenien fel mi nom won ekewe chuk pwe repwe kechü. Chon Moap ra ngüngüres fän iten ar kewe telinimw Nepo me Metepa. Ra räisöüla mökürer me aluser pokiten ar letipeta. Ra fetal won ekewe al fän üfer seni tuk. Won imw pwal lon lenien chulap aramas meinisin ra ngüngüres o kekechü. Chon Hespon me chon Eleale ra pupuchör pwe chon Jahas ra tongeni rongorong. Iei mine ekewe sounfiun Moap ra puchör, ese chüen wor ar pwora. Üa kechüeiti Moap. Chon ra sülong Soar me Eklat Selisia. Ra feitä nge kechü won ewe al mi pal a ale ngeni Lukit, nge won ewe al mi ale ngeni Horonaim ra leüömong le kökkö usun ewe feiengau. Iwe, ekewe kolukun Nimrim ra pwasala, ewe fetil ünükür a ol, esap fokun chüen wor fetil mi pwüküfö. Iei popun chon Moap ra uweela ar kewe pisek meinisin mi chüen nom rer pekilan ewe öüwö ia a mär ie ewe irä itan willow. Ar puchör a tori kiännin ewe fanü Moap, ar kechü me ngüngüres a tori Eklaim me Peer Elim. Iwe, ekewe kolukun Tipon ra cha. Nge ngang üpwe chök pwal awarato won Tipon och feiengau mi watte seni. Eman laion epwe niela chokewe mi süla seni Moap, pwal chokewe mi chüen manau lon ewe fanü.

15:1: Ais 25.10-12; Jer 48.1-47; Is 25.8-11; Am 2.1-3; Sef 2.8-11