Paipel OSEA 9
9
Kot a apwüngü chon Israel pokiten ar kirikiringau fochofoch ngeni
9.1-10.15
Ämi chon Israel, ousap meseik, ousap ingemwar usun chon ekewe mwü. Pun oua kirikiringau ngeni ämi we Kot o kul seni. Won unusen ewe fanü oua amömöla inisimi ngeni ewe anü Paal usun mine eman fin lisowu a föri, oua efich ewe wiich oua ekieki pwe ewe anü a liwini ngenikemi. Nge epwe müttir war ewe fansoun pwe esap chüen naf ämi wiich me ämi apüra seni föün olif, esap pwal wor ünümemi wain. Iwe, chon Israel resap nonometiu lon fanüen ewe Samol mi Lapalap, nge repwe liwiniti Isip, repwe pwal eni mongö mi limengau ngeniir lon Asiria. Ikenan resap tongeni ninätiu wain pwe ar asoren ün ngeni ewe Samol mi Lapalap, resap pwal tongeni apwapwai i ren ar kewe asor. Ener mongö epwe usun chök enen chon letipeta. Meinisin mi mongö seni repwe limengau. Pun ener mongö fän iten chök ar echik, resap uwala och pwe ar asor lon imwen ewe Samol mi Lapalap. Met repwe föri lon ekewe ränin chulap mi kefilitä, lon än ewe Samol mi Lapalap kewe ränin chulap? Inamwo are ra fen sü seni feiengau, chon Isip repwe achufengeniir, nge repwe peias lon Memfis. Pötöwölingau epwe mär lon ar kewe lenien iseis pisek aüchea seni silifer, nge iräfölüföl epwe mär lon imwer.
Ekewe ränin apwüng ra war, ekewe ränin angei liwinin föför ra war. Lupwen epwe fis ei, chon Israel repwe silei. Pokiten watten ämi tipis me watten ämi oput oua ekieki pwe ewe soufos a tiparoch, nge ewe mi mwökütüküt ren Ngünün Kot a fokun umwesila. Luk 21.22 Ewe soufos i ewe mi mamasa chon Israel, ekewe aramasen ai we Kot. Nge eseichin machang ra nom won an kewe al meinisin, a pwal küna koput me lon imwen an we Kot. Än ekewe aramas föför ra fokun ngauala usun chök ngauen ewe föför a fis me lon Kipea. Kot epwe chechemeni ar föföringau o ngeniir liwinin ar tipis. Souk 19.1-30
10 Iwe, ewe Samol mi Lapalap a üra, “Lupwen üa küna Israel me lom, a usun chök ai küna föün irän wain lon fanüapö. Lupwen üa küna ämi kewe lewo, a usun chök ai küna mwen uän ewe irä fik. Nge lupwen ra tori Paal-peor, ra popuetä le fel ngeni ewe anü Paal o wiliti och minen anioput usun chök ekewe anümwäl ra echeni. Num 25.1-5 11 Än Israel iteüöch epwe ässila usun eman machang a ässila. Esap chüen wor eman semirit epwe uputiu, esap wor eman fefin epwe pwopwo ika kolu. 12 Nge are epwe fen wor nöür semirit, üpwe angei seniir, tori esap chüen wor eman lusun. Feiengau watte epwe toriir, lupwen üpwe likitirela.”
13 Üa küna pwe chon Israel ra fot lon eu mälämäl mi mürina usun Tirus, nge repwe fokun emwenawu nöür kana pwe repwe ninnila. 14 Ai Samol mi Lapalap, kopwe föri ngeniir och. Nge met kopwe föri ngeniir? Kopwe föri ngeni ekewe fefin mine repwe rit ren o apwasa oupwur.
15 Iwe, ewe Samol mi Lapalap a üra, “Pokiten ar föföringau meinisin mi fis me lon Kilkal, üa popuetä le oput ir me ikenan. Üpwe asürela me lon fanüei pokiten ar kei föför mi ngau. Üsap chüen tongeer. Nöür kewe souemwen meinisin ra ü ngeniei. 16 Chon Israel ra wewe ngeni efoch irä waran a pwasala, esap fokun ua. Esap wor nöür. Inamwo ika ra nöünöü, nge üpwe chök niela nöür kewe ra echeniir.”
17 Ai Kot, ewe üa angang ngeni, epwe pöütirela, pokiten resap aleasochis ngeni, repwe choisäfeil lemenen ekewe mwü.

9:7: Luk 21.22

9:9: Souk 19.1-30

9:10: Num 25.1-5