7
Än chon Israel tipis me ü ngeni Kot
7.1-16
Iwe, ewe Samol mi Lapalap a apasa, “Iteiten fansoun, lupwen üa mochen apöchöküla nei kewe aramasen Israel o afefeitäsefäliir, üa chök küna ar föföringau me tipis. Pun ra föri föförün atuputup lefileer, ra ataelong imw o solä, ra pwal angei pisekin aramas fän pöchökül me won ekewe al. Nge resap ekieki pwe üa chechemeni ar kewe föföringau meinisin. Iei ar kewe tipis ra pweli ünükür, ra nom fän mesei iteiten fansoun. Ra apwapwai ewe king ren ar föför mi ngau, ra pwal apwapwai ekewe samol ren ar kapas chofana. Ir meinisin ra kirikiringau ngeniei usun eman mwän a kirikiringau ngeni pwülüan. Ra pwichikar lon ar mocheisou usun pwichin eu um ewe chon um esap chüen soni seni ewe fansoun a aüwa ewe pilawa tori a pwotä. Lon ränin än ewe king kametip ekewe samol ra puchula ren pwichin ewe wain. Iwe, ewe king a tipeeu ngeni ekewe chon turunufas. Leluker a pwichikar usun eu um, lupwen ra ekiekietä ar rawangau. Ar song ra chök poureilong lepwin, nge lesosor a ngetewu usun ngeten eu ekkei. Fän pwichikaren ar song ra niela ar kewe sounemenem. Ar kewe king meinisin ra ninni, nge esap wor eman me leir a köriei pwe üpwe alisiir.
Chon Israel ra nofit lein chon ekewe mwü. Ra wewe ngeni echö nokop esap wilik. Chon ekis ra angei seniir ar pöchökül, nge resap mefi. A arap ränin ar repwe mäla, nge resap silei. 10 Än chon Israel lamalamtekia a püsin sape ngeniir. Iei mwo pwe a fis ngeniir ekei mettoch, nge resap liwinitiei ika küttaei ngang ewe Samol mi Lapalap ar we Kot.
11 Chon Israel ra wewe ngeni eman lisom, ra tupukai, esap pwal wor ar mirit. Ra siö ngeni Isip, mürin ra pwal feila Asiria. 12 Nge lupwen ra feila, üpwe ameresala ai cheew wor o likapichiir usun eman a likapichi machang. Üpwe apwüngüür pokiten ar föför mi ngau. 13 Feiengauer, pun ra rik seniei. Repwe mäfeiengau, pun ra ü ngeniei. Üa mochen angaserela, nge ra chök eäni kapas chofana usi.
14 Iwe, resap siö ngeniei seni lon leluker, nge ra chök ngüngüres won kier. Lupwen ra iotek pwe epwe wor ar föün wiich me wain, ra akinaseer usun chon lükün. Ir ra chök ü ngeniei. 15 Üa alisiir o apöchöküleer, nge ir ra chök rawangawaei. 16 Ra kul ngeni ewe anü Paal. Ra wewe ngeni efoch esefich mi pwach selin. Nöür souemwen repwe mäla ren ketilas pokiten ar kapasen lamalamtekia. Ren ei repwe küna turunufas me lon ewe fanü Isip.”