Paipel OSEA 6
6
Än chon Israel ekieksefäl esap seni wesewesen leluker
6.1-11
Iwe, ekewe aramas ra apasa, “Ou etto, ousipwe liwiniti ewe Samol mi Lapalap. I a atatakisikich, epwe pwal apöchökülakich. I a akinasakich, epwe pwal filiti kinasach. Mürin ruu ika ülüngat rän epwe amanauakich o aliwinisefälikich pwe sipwe nom fän mesan. Ousipwe achocho ngeni ach sipwe silei ewe Samol mi Lapalap. Usun mal a tö iteiten lesosor, iei usun epwe fokun waroto. Epwe wareitikich usun püngün üt, usun ekewe ütten leres mi achöchönü fanüfan.”
Nge ewe Samol mi Lapalap a apasa, “Met üpwe föri ngenikemi, Israel me Juta? Ämi tong a usun chök eu kuchun lesosor, usun chök ewe amurenipwin a müttir morola lesosorusich. Iei mine üa atatakisikemi o niikemi ren ai kewe kapas üa tini ngeni ekewe soufos, ai apwüng a fiitikemi usun inefi. Pun üa mochen ämi oupwe eäni tong ellet, nge sap ämi mönün asor. Üa mochen ämi nei aramas oupwe sileei, nge sap ämi asoren kek. Mat 9.13; 12.7
Lon ewe otun, lupwen ra tolong lon ewe fanü me lon ewe telinimw Atam, ra atai ai we pwon ngeniir. Luk 21.22 Kiliat eu telinimwen aramas mi föföringau, ra pwal ni aramas. Ekewe souasor ra usun chök eu mwichen chon solä mi operi eman aramas. Won mwo ewe al mi ale ngeni ewe leni mi pin lon Sikem, nge ra ni aramas, ewer, ra chök föri föförün mwänewüs. 10 Üa küna eu mettoch mi anioput me lon Israel. Nei aramasen Israel ra püsin alimengaueer ren ar fel ngeni uluulun anümwäl. 11 Nge ämi chon Juta, üa pwal filätä eu fansoun apwüng fän itemi pokiten ämi kewe föför.”

6:6: Mat 9.13; 12.7

6:7: Luk 21.22