1 “Ämi souasor, oupwe aüseling, ämi chon Israel, oupwe aü selingemi, nge ämi chon leimwen king, oupwe rongorong. Pun ewe apwüng epwe weneitikemi pokiten oua wewe ngeni eu likatup lon Mispa me eu cheew mi meresila won ewe chuk Tapor, 2 pwal eu pwang mi alolol lon Sitim. Nge ngang üpwe apwüngükemi meinisin. 3 Üa silei usun Israel, an föför esap monola seniei. Israel a kirikiringau ngeniei, chon ra püsin alimengaueer.” 4 Ar kewe föför mi ngau a epeti ar repwe liwiniti ar we Kot. Pun ekiekin angangen fel ngeni anümwäl a nom lor, nge resap silei ewe Samol mi Lapalap.

5 Än Israel lamalamtekia a püsin sapeiti. Chon Israel repwe chepetek ren ar tipis, pwal chon Juta repwe etiir le chepetek. 6 Ra uwato nöür sip me kow pwe ar asor ngeni ewe Samol mi Lapalap, nge resap feiöch ren. Ra kütta i, nge resap küna, pun a feil seniir. 7 Iwe, ra kirikiringau ngeni ewe Samol mi Lapalap, a wor nöür, nge sap nöün Kot ir. Iei eman chon kata epwe afeiengaueer o ataela fanüer.

8 Ewe Samol mi Lapalap a üra, “Oupwe apu ewe säwi me lon Kipea o ettiki ewe rappwa me lon Rama. Oupwe arükak me lon Pet-awen. Ämi chon Peniamin, oupwe feila maun. 9 Lon ewe ränin apwüng Israel epwe tala. Üa asilefeili lein ekewe ainangen Israel usun ewe feiengau epwe fokun fis ngeniir. 10 Ekewe souemwenin Juta ra usun chök ekewe aramas mi amwökütü kiän fanü. Iei mine ngang üpwe ninätiu wor ai lingeringer usun chök koluk. 11 Israel a riaföü o tatakis lon apwüng, pun a fokun pöchökül le ekiekin angang ngeni uluulun anümwäl. 12 Iei mine ngang üa usun pwötür ngeni Israel, üa pwal usun ech ngeni chon Juta.

13 Iwe, lupwen Israel a küna an samau o Juta a küna kinasan, mürin Israel a feila Asiria o tüngor än ewe king mi lap alilis. Nge i esap tongeni alisiir ika amoela kinaser. 14 Pun ngang üpwe usun eman laion ngeni chon Israel, pwal usun eman nienifön laion ngeni chon Juta. Ngang, fokun ngang üpwe atatakisiir o likitirela. Nge lupwen üpwe etekinirela, esap wor eman epwe tongeni amanaueer. 15 Mürin üpwe feila seniir o likitirela tori repwe mefi ar tipis o küttaei. Lon ar riaföü repwe fokun küttaei.”