Keneses
Kapas akom
I. Iten ei puk: Keneses, wewen lepopun.
II. Chon makei ei puk: Chomong sousilelap lon Paipel ra tipeeu ngeni pwe Moses a makei.
III. Itelapemongen ei puk: Lepopun.
IV. Kapas aüchean ei puk: Än aramas tur lon tipis me mine Kot a föri ren an amusala ar tipis, pwal usun an föri eu pwon mi pin ngeni ewe mwichen aramas i a filätä.
V. Masouen ei puk Keneses: Lon ei puk a mak pworausen än Kot föri läng me fanüfan me masouer meinisin, usun poputän aramas, poputän tipis me riaföü won fanüfan. A pwal mak usun än Kot apwüngü aramas, pwal usun an föri efoch al pwe repwe küna manau.
A wor 2 kinikin lon ei puk Keneses:
1. Sopun 1-11, usun än Kot föri läng me fanüfan me uruwon poputän aramas: Pworausen Atam me Efa, Kain me Epel, Noa me ewe noter, pwal ewe imw tekia lon Papilon.
2. Sopun 12-50, usun uruwon än chon Israel kewe lewo. Ewe aemanün itan Apraham, ätewe mi iteföüla pokiten an lükülük me aleasochis ngeni Kot. Mürin pworausen nöün we itan Isaak me nöün Isaak we itan Jakop mi pwal iteni Israel, pwal pworausen nöün Jakop kewe engol me ruoman mwän, ätekewe ir poputän ekewe engol me ruu ainangen Israel. A pwal wor pworaus mi tichik usun eman me lein nöün Jakop kewe mwän itan Josef, pwal usun mine a fis pwe Jakop me nöün kewe mwän fiti ar famili ra feila Isip o nonom ikenan. Lon ei puk a mak pworausen aramas, nge mine a kon aüchea pworausen mine Kot a föri. A popuetä won usun än Kot föri läng me fanüfan, nge a sopola won usun än Kot pwon pwe epwe sopwela le tümwünü nöün aramas. Lon unusen ei puk a pworaus usun Kot ewe mi apwüngü o emiriti chokewe mi föri mine a ngau, pwal usun an emweni o alisi nöün aramas o föri uruwor. Ei puk a mak me lomlom pwe epwe pwärätä pworausen än ekewe aramas lükülük, epwe pwal alisi aramasen ikenai pwe repwe tongeni eäni ei sokun lükülük.
VI. Tettelin masouen ei puk:
Usun än Kot föri läng me fanüfan me aramas 1.1–2.25
Poputän tipis me riaföü 3.1-24
Pworausen Atam tori Noa 4.1–5.32
Pworausen Noa me ewe noter 6.1–10.32
Ewe imw tekia lon Papilon 11.1-9
Pworausen Säm tori Apram 11.10-32
Pworausen ekewe semelap Apraham, Isaak me Jakop 12.1–35.29
Ekewe mwirimwirin Esau 36.1-43
Josef me pwin kewe 37.1–45.28
Pworausen ekewe chon Israel me lon Isip 46.1–50.26
1
Kot a föri läng me fanüfan me aramas
1.1-2.7
Lepopun Kot a föri läng me fanüfan. Nge fanüfan a kotongau o pön, a pwal lölö o rochokich ekis meinisin, nge Ngünün Kot a tümwünü ewe lölö.
Mürin, Kot a apasa, “Epwe saram.” Iwe, a saramala. 2.Kor 4.6 Iwe, Kot a küna ewe saram pwe a öch. Iwe, a aimwü rochopwak seni saram, o aita ngeni saram rän, nge rochopwak a aita ngeni pwin. Iwe, seni lesosor tori lekuniol pwal tori lesosorun ewe eu rän, iei ewe aeuin rän.
Iwe, Kot a apasa, “Epwe fis kiännin ewe lölö, pwe epwe imwüfesen lölön pekitä me lölön pekitiu.” Mürin, Kot a föri ewe kiä pwe lölön pekitä me lölön pekitiu resap chüen chufengen. Iwe, a fis. Nge ewe kiä Kot a aita ngeni läng. Iwe, seni lesosor tori lekuniol pwal tori lesosorun ewe eu rän, iei ewe aruuen rän. 2.Pet 3.5
Mürin, Kot a pwal apasa, “Lölön pekitiu repwe chufengen lon lenier pwe epwe pwä lenien pwasapwas.” Iwe, a pwal fis. 10 Iwe, Kot a aita ngeni ewe lenien pwasapwas fanü, nge ewe lenien lölö a aita ngeni matau. Iwe, Kot a küna pwe a öch meinisin. 11 Mürin a pwal apasa, “Fanü epwe amärätä fetil me iräkis mi püsin afisätä föür, pwal sokun irä mi ukua, a pwal wor föür lor, pwe repwe püsin sokuni sokur won fanüfan.” Iwe, a fis. 12 Iwe, fanü a amärätä fetil me iräkis mi ua, pwal sokopaten irä mi ukua, a pwal wor föür lor pwe repwe sokuni sokur. Iwe, Kot a küna pwe a öch meinisin. 13 Iwe, seni lesosor tori lekuniol pwal tori lesosorun ewe eu rän, iei ewe aülüngatin rän.
14 Mürin, Kot a apasa, “Ekewe saram repwe pwäla fän läng pwe repwe aimwüfeseni rän me pwin o asisila kinikinin fansoun me rän me ier kana. 15 Repwe nonom fän läng o asarama unusen fanüfan.” Iwe, a fis. 16 Iei usun Kot a föri ruu saram mi watte: akkar mi tin lerän, maram mi tin lepwin, a pwal föri fü kana. 17 Iwe, Kot a alenieer fän läng pwe repwe asarama fanüfan, 18 repwe nemeni rän me pwin o aimwüfeseni saram me rochopwak. Iwe, Kot a küna pwe a öch meinisin. 19 Iwe, seni lesosor tori lekuniol pwal tori lesosorun ewe eu rän, iei ewe arüanün rän.
20 Mürin, Kot a apasa, “Ekewe lenien lölö repwe masou ren mönümanau, nge mansüsü repwe äkäs fän läng.” 21 Iei usun Kot a föri chomong sokun man mi watte me kükün pwe matau epwe masou rer. A pwal föri chomong sokun mansüsü. Iwe, Kot a küna pwe a öch meinisin. 22 Iwe, Kot a afeiöchüür o üreniir pwe repwe nöünöü o achomongeer, pwe matau epwe masou rer. Nge mansüsü kana repwe chomongola won fanüfan. 23 Iwe, seni lesosor tori lekuniol pwal tori lesosorun ewe eu rän, iei ewe alimuen rän.
24 Mürin, Kot a apasa, “Fanü epwe afisätä sokun man meinisin: Manfesir, mantötö me manmwacho, ekewe mi watte me kükün, eman me eman lon en me sokun.” Iwe, a fis. 25 Iei usun Kot a föriir meinisin, eman me eman lon en me sokun. Iwe, a küna pwe ra öch meinisin.
26 Mürin, Kot a apasa, “Sipwe föri aramas mi wewe ngenikich pwe repwe nemeni ekewe ikenen leset me ekewe mansüsü me ekewe man meinisin won unusen fanüfan.” 1.Kor 11.7 27 Iei usun Kot a föri aramas lon püsin lapalapan, eman mwän me eman fefin. Mat 19.4; Mark 10.6 28 Iwe, Kot a afeiöchüür o üreniir, “Oupwe nöünöü o achomongakemi pwe fanüfan epwe masou remi o nom fän nemeniemi. Oupwe nemeni ekewe ikenen leset me ekewe mansüsü me mönün won unusen fanüfan.” Ken 5.1-2 29 Mürin, Kot a pwal apasa, “Üa ngenikemi ekewe iräkis meinisin won fanüfan mi afisätä föür, pwal ekewe irä meinisin mi ukua, a pwal wor föür lor, pwe oupwe mongö seniir. 30 Nge ekewe fetil meinisin üa ngeni ekewe manmwacho, ekewe mantötö me mansüsü, pwal ngeni ekewe sokopaten man meinisin won fanüfan, pwe repwe mongö seniir.” Iwe, a fis. 31 Iwe, Kot a nengeni meinisin mine a föri o küna pwe a fokun öch. Iwe, seni lesosor tori lekuniol pwal tori lesosorun ewe eu rän, iei ewe awonuen rän.

1:3: 2.Kor 4.6

1:8: 2.Pet 3.5

1:26: 1.Kor 11.7

1:27: Mat 19.4; Mark 10.6

1:28: Ken 5.1-2