6
Oupwe mwärelong fän wosen chiechiemi wosochou
6.1-10
Ämi pwii kana, are eman me leimi a tur lon tipis, chokewe me leimi mi eäni Ngünmifel repwe apwüngü fän tipepwetete. Nge oupwe püsin afälikemi pwe ousap pwal turulong lon sosot. Oupwe mwärelong fän wosen chiechiemi wosochou, ika oupwe föri ei, oupwe aleasochisi än Kraist allük. Are eman a ekieki pwe mi wor itan, nge esap fokun wor, ätewe a püsin atupu. Eman me eman epwe püsin apwüngü an föför. Are a mürina, mürin a tongeni pwapwa ren met a föri, nge esap awewei met i a föri ngeni met eman a föri. Pun eman me eman epwe püsin mwärei wosan wosochou.
Eman mi kaiö Kapasen Kot epwe aeafengen me nöün we sense ekewe mettoch meinisin mi mürina a eäni. Ousap püsin atupukemi. Sisap tongeni urumwotei Kot. Pun mine eman aramas a fotuki, iei met epwe pwal kini. Are eman a fofot lon mochenian fitukan, epwe kini mäla. Nge are eman a fofot lon Ngün, epwe kini manau esemüch. Iwe, sisap achanü le föföri mine a mürina. Pun are sisap achanü, epwe war ewe fansoun lupwen sipwe kini ewe räs. 10 Iei mine lupwen mi wor ach fansoun fich, sipwe eäni kirikiröch ngeni aramas meinisin, nge akaeuin ngeni chokewe mi nom lon ewe familien chon lükülük.
Kapasen amwirimwir me kapong
6.11-18
11 Oupwe nengeni ekei mesen mak mi watte üa makkei ngenikemi ren püsin pei! 12 Ekewe aramas mi mochen erianikemi pwe oupwe sirkomsais, ir ätekewe mi sikesik o aingaing won mettochun lükün. Ra föri ei, pwe resap küna riaföü pokiten ewe iräpengesin Kraist. 13 Pwal mwo nge chokewe mi sirkomsais resap aleasochis ngeni ekewe Allük. Ra mochen pwe ämi oupwe pwal sirkomsais, pwe ra tongeni aingaing won ämi tipeeu ngeni ei sokun föför. 14 Nge ngang won inisi üpwe chök aingaing won ewe iräpengesin ach Samol Jesus Kraist. Pun ren an we iräpenges fanüfan a iräpenges ngeniei, nge ngang üa iräpenges ngeni fanüfan. 15 Esap wor lomoten än eman sirkomsais ika esap sirkomsais, nge a chök lomot än eman epwe wiliti eman aramas mi fö. 16 Kinamwe me tong epwe nom ren chokewe meinisin mi aleasochisi ai kei kapas lon manauer, ewer, epwe nonom rer pwal ren nöün Kot kewe aramas meinisin.
17 Iwe, lesopolan ai kei kapas: Esap wor eman epwe chüen aweiresiei, pun ekewe lemon kinas mi nom won inisi ra pwärätä pwe ngang nöün Jesus amanau.
18 Ümöümöchün ach Samol Jesus Kraist epwe nonom remi meinisin, pwii kana. Amen.