Paipel ESRA 4
4
Ekewe chon pälüeni Israel ra öüela ewe angang
4.1-24
Iwe, lupwen ekewe chon oputa ekewe aramasen Juta me Peniamin ra rongorong, pwe ekewe chon oola mi liwinsefäl ra aüetä eu imwenfel ngeni ewe Samol mi Lapalap ewe Koten Israel, ra feito ren Serupapel me ekewe mwänirelan än semelaper kewe cho o üreniir, “Oupwe mwüt ngenikem pwe aipwe etikemi le aüetä ewe imwenfel. Pun äm aia fel ngeni ewe Kot ämi oua fel ngeni. Äm aia pwal asor ngeni seni fansoun mwün Esar-haton ewe kingen Asiria mi tinikeemito ikei.” 2.King 17.24-41 Nge Serupapel, Jesua me ekewe mwänirelan än semer kewe cho me lon Israel ra üreniir, “Esap tufich pwe oupwe etikem le aüetä eu imwenfel fän iten äm we Kot. Äm chök aipwe aüetä ei imw fän iten ewe Samol mi Lapalap ewe Koten Israel, usun Sirus ewe kingen Persia a allük ngenikem.”
Mürin, ekewe aramas mi nom lon ewe fanü ra atipemwaramwara ekewe chon Juta o aniuoksuur pwe resap aüetä ewe imwenfel. Ra pwal ngeni ekoch meilapen ewe mwün Persia lifangen amichimich pwe repwe epetiir lon ar angang. Ei ra föri lon fansoun mwün Sirus, pwal tori fansoun mwün Tarius ekewe kingen Persia.
Iwe, lon mwün Asuworos, lepoputän an nemenem, ekewe chon oputa chon Juta me Jerusalem ra makei echö toropwen atipisiir. Est 1.1
Iwe, pwal lon fansoun mwün Artaksasta ewe kingen Persia, Pislam, Mitretat me Tapel pwal chiechier kewe ra makei echö toropwe ngeni Artaksasta. Ewe toropwe a mak lon fosun Aramaik, pwal lon itechikin Aramaik. Pwal Rehum ewe sounemenem me Simsai ewe soumak ra makei echö toropwen atutur fän iten Jerusalem ngeni ewe king Artaksasta lon ei lapalap: Seni Rehum ewe sounemenem, Simsai ewe soumak, pwal chiechier kewe, ekewe soukapwüng, ekewe kepina, ekewe nöüwis, ekewe chon Persia, chon Erek, chon Papilon, pwal ekewe chon Elam seni Susa 10 me lusun chon ekewe mwü, Osnapar ätewe mi tekia o iteföüla a uweerela o anomuur lon ekewe telinimwen Samaria, pwal lon ewe fanü lotoun ewe chanpupu Oifrat. 11 Iei masouen ewe toropwe ra tinala, “Ngeni ewe king Artaksasta seni noum kewe chon angang, ekewe mwän seni ewe fanü lotoun ewe chanpupu Oifrat: 12 Aia mochen asile ngonuk, en äm king, pwe ekewe chon Juta mi feila senuk o feito ikei ra nonom Jerusalem. Ir ra aüsefälietä ewe telinimw mi ngau o afitikoko chök. Ra försefäli longolongun ewe telinimw o angang ngeni tittin kewe. 13 Iei aia mochen asile ngonuk, en äm king, pwe ika ei telinimw epwe kaüsefäl o tittin kewe repwe wesila, ekewe aramas resap chüen mönätiu ar kewe sokopaten takises, nge än ewe king moni tolong epwe kisikisila. 14 Nge pokiten äm aia angei äm tufich senuk, en äm king, äm aisap pwal mochen küna om itengau, iei mine äm aia tinala ei toropwe reöm o asile ngonuk ei föför, 15 pwe kopwe tongeni kütta pworausen ei telinimw lon ekewe puken uruwo än ekewe king ra akom mwom. Iwe, kopwe küna o silei me lon ei puken uruwo pwe ei telinimw eu telinimw mi afitikoko chök, a aosukosuka ekewe king me ekewe fanü, nge seni me lomlom aramasen lon ra chök päpälüeni mwü. Iei popun pwe ei telinimw a tala. 16 Äm aia asile ngonuk, en äm king, pwe ika ei telinimw epwe kaüsefäl o tittin kewe repwe wesila, mürin esap chüen wor om nemenem lon ewe fanü lotoun ewe chanpupu Oifrat.”
17 Iwe, ewe king a tinala pälüen ewe toropwe: “Üa kapong ngeni Rehum ewe sounemenem me Simsai ewe soumak, pwal ngeni chiechier kewe mi nom lon Samaria me ewe fanü lotoun ewe chanpupu Oifrat. 18 Ewe toropwe oua tinato rei, ra aleani o awewe ngeniei lon fosun fanüei. 19 Üa föri eu allük pwe repwe kütta pworausen ewe telinimw. Iwe, ra küna pwe ei telinimw a ü ngeni ekewe king seni me lomom, a pwal pwä pwe a uren chon afitikoko me chon pälüeni mwü. 20 Iwe, mi wor king mi pwora ra nemenem me lon Jerusalem pwal lon unusen ewe fanü lotoun ewe chanpupu Oifrat, nge aramas ra mönätiu sokopaten takises ngeniir. 21 Iei mine oupwe föri eu allük pwe ekei aramas repwe ükütiu le aüsefälietä ei telinimw tori üpwe pwal föri eu allük. 22 Oupwe tümwünü pwe ousap mang ngeni pwüngün ei allük, pwe ei osukosuk esap wattela o angauala winnen mwüi.”
23 Iwe, lupwen ewe toropwe seni ewe king Artaksasta a alea me fän mesen Rehum me Simsai ewe soumak pwal chiechier kewe, ra müttir feila Jerusalem ren ekewe chon Juta o aükätiu ar angang fän pöchökül. 24 Mürin, angangen won ewe imwen Kot lon Jerusalem a kaüla tori aruuen ierin mwün Tarius ewe kingen Persia. Ak 1.1; Sek 1.1

4:2: 2.King 17.24-41

4:6: Est 1.1

4:24: Ak 1.1; Sek 1.1