Paipel ISIKIEL 24
24
Kapas awewe usun ewe kama mi puropur
24.1-14
Lon atiuen ierin ach oola, lon engolun ränin ewe engolun maram, ewe Samol mi Lapalap a kapas ngeniei, “Nöün aramas, kopwe makei ei rän, pun ikenai ewe kingen Papilon a tori Jerusalem, pwe epwe maun ngeni. 2.King 25.1; Jer 52.4 Iwe, kopwe asile ngeni ekewe chon lükümach o ü ngeniei eu kapas awewe. Kopwe üreniir, ‘Iei alon Kot ewe Samol mi Lapalap:
Kopwe isetä ewe kama won ekkei,
kopwe fokun isetä o alölöü ngeni koluk.
Kopwe uwalong lon ekewe kinikinin fituk meinisin mi mürina,
fituken won peche me fituken won pau,
kopwe pwal amasoua ren chü mi fokun mürina.
Kopwe angei fituken ekewe man mi mürina,
kopwe aloppa sättin mwüch fän ewe kama
o kuku ewe fituk me ekewe chü.”
Iwe, iei alon Kot ewe Samol mi Lapalap, “Feiengauen ewe telinimw, chon ra nimanauei aramas. Ewe telinimw a wewe ngeni eu kama mi parang lon, nge parangan esap chü. Kopwe angei seni me lon eu me eu kewe kinikinin fituk, nge kosap lifilifil. Pun a fis nimanau lon ewe telinimw. Nge chon ewe telinimw resap ninätiu ewe cha won pwül pwe epwe irela, nge ra ninätiu won achau. Üa likitala ewe cha won achau, ewe ia esap tongeni irela me ie. Ei üa föri pwe üpwe aüfarafarätä ai lingeringer o ngeniir chappen ar föför.” Iei mine Kot ewe Samol mi Lapalap a apasa, “Feiengauen ewe telinimw, chon ra nimanauei aramas. Ngang üpwe püsin aloppa ewe mwüchen ekkei pwe epwe tekiatä. 10 Kopwe achukuchukätä mwüch fan, kopwe keni o kukuöchü ewe fituk tori setin epwe morola, nge chün repwe karala. 11 Iei kopwe isetä ewe kama mi pön won ekkei pwe epwe sarara. Mürin, limengauen lon me parangan repwe morola. 12 Nge a solap ai angang weires ngeni, pun ewe parang mi malül esap chü ren ewe ekkei. 13 Jerusalem, om mocheisou iei om limengau. Iwe, üa sotuni ai üpwe limetuk, nge kosap limöchüla. Iei mine kosap fokun limöch, tori üpwe amüchü ai lingeringerituk. 14 Ngang ewe Samol mi Lapalap üa kapas. A war ewe fansoun fän itei pwe üpwe apwönüetä mine üa apasa. Üsap piit, üsap pwal eäni tong ika lamalamala. Üpwe apwünguk won om kewe föför meinisin,” Iei alon Kot ewe Samol mi Lapalap.
Pwülüen Isikiel a mäla
24.15-27
15 Iwe, ewe Samol mi Lapalap a kapas ngeniei, 16 “Nöün aramas, nengeni, iei chök üpwe angei senuk ewe aramas ka fokun echeni. Nge en, kopwe tümwünü pwe kosap ngüngüres, kosap pwal kechü pwe chönün mesom esap suputiu. 17 Kopwe ngüngü, nge kosap leüömong. Kosap pwärätä om letipeta ren ewe mi mäla. Kopwe filiti mökürom, kopwe pwal ipweip sus, nge kosap pwölüela alüsom, kosap pwal mongö seni mine aramas ra uwato reöm.” 18 Iwe, lesosor üa kapas ngeni ekewe chon Israel, nge lekuniol pwülüei a mäla. Lesosorun ewe rän mürin üa föri mine Kot a allük ngeniei.
19 Iwe, ekewe aramas ra aisiniei, “Pwota ka föri ei sokun föför?” 20 Iwe, üa pälüeniir, “Ewe Samol mi Lapalap a kapas ngeniei, 21 pwe üpwe üreni ämi chon Israel, ‘Iei alon Kot ewe Samol mi Lapalap: Üpwe apiningaua pinin ai we leni mi pin oua aücheani o sikesik won, mesemi ra pwapwaiti, letipemi ra pwal ekimongei. Nöümi mwän me fefin, oua likitiir lon ewe fanü Israel, repwe mäla lon maun. 22 Mürin oupwe föri usun mine Isikiel a föri. Ousap pwölüela alüsemi, ousap pwal mongö mine aramas repwe uwato remi. 23 Oupwe filiti möküremi, oupwe pwal ipweip sus. Ousap ngüngüres ika kechü, nge oupwe apwangapwangala pokiten ämi tipis, oupwe pwal ngüngü lefilemi. 24 Iei usun Isikiel epwe eu asisil ngenikemi. Iwe, ämi oupwe föri meinisin mine i a fen föri. Nge lupwen epwe fis ekei mettoch, oupwe silei pwe ngang Kot ewe Samol mi Lapalap.’ ”
Iwe, ewe Samol mi Lapalap a üreniei, 25 “Iei usun mine epwe fis ngonuk, nöün aramas. Lon ewe rän, lupwen üpwe angei seniir ar imwenfel mi pöchökül ra aücheani o sikesik won, meser ra pwapwaiti, letiper a pwal ekimongei, lupwen üpwe pwal angei seniir nöür mwän me fefin, 26 lon ewe chök rän eman chon sü seni ewe feiengau epwe feito o uwato reöm ei pworaus. 27 Lon ewe chök rän kopwe silesefäl kapas, pwe kopwe tongeni kapas ngeni ewe chon sü. Ren ei kopwe eu asisil ngeni ekewe aramas, pwe repwe silei pwe ngang ewe Samol mi Lapalap.”

24:2: 2.King 25.1; Jer 52.4