Paipel ISIKIEL 23
23
Ruoman pwipwi
23.1-49
Iwe, ewe Samol mi Lapalap a kapas ngeniei, “Nöün aramas, mi wor ruoman fefin nöün eman chök in. Ra amömö inisir fän iten lisowu lon Isip, lupwen ra chüen föpwül. Ikenan mwän ra atapa oupwur o urumwotiti. Iten ewe mi watte Ohola, nge iten pwin we Oholipa. Iwe, üa pwülüeniir, nge ra nöünöü mwän me fefin. Ohola wewen Samaria, Oholipa wewen Jerusalem.
Lupwen üa mwo pwülüeni Ohola, a chök amömö inisin fän iten lisowu ngeni nöün kewe kamwet ekewe chon Asiria, ngeni ekewe sounfiu mi üföüf üf mi arauarau, pwal ngeni ekewe kepina me ekewe meilapen sounfiu. Ir meinisin ra alüalöch, ra pwal wawa oris. Iwe, a amömö inisin fän iten lisowu ngeni ekewe re Asiria meinisin mi fokun äteöch. A püsin alimengaua ren ekewe uluulun anümwäl än chokewe a nöüniir kamwet. Esap likitala an amömö inisin fän iten lisowu, a fen föri lon Isip, lupwen mwän ra kon ren lon fansoun an föpwül, lupwen ra urumwotiti oupwun o awesi ar mocheisou ngeni. Iei mine üa asechala ngeni nöün kewe kamwet, ir ekewe chon Asiria neminewe a mocheisou ngeniir. 10 Iwe, ir ra aselelai, ra turufi nöün kewe mwän me fefin, mürin ra niela ren ketilas. Iwe, fefin ra leaweni lon ar fos, lupwen a küna apwüng.
11 Iwe, Oholipa pwin we a küna ei, nge a fen alapala an mocheisou me an amömö inisin fän iten lisowu, lap seni pwin we. 12 A mocheisou ngeni chon Asiria, ekewe kepina me ekewe meilapen sounfiu, ekewe sounfiu mi üföüf üf mi mürina, pwal ekewe chon wawa oris, ir meinisin mi alüalöch. 13 Iwe, üa küna pwe a püsin alimengaua. Ra chök föföringaupök ir me ruoman. 14 Nge Oholipa a chök alapala an amömö inisin fän iten lisowu. Iwe, a küna liosun mwän won ekewe tit mi mak ngeni mi par, liosun chon Papilon 15 ra riri ngeni lukalaper pelit, ra pwal filiti ngeni mökürer mangaku mi sokopat anüan. Ir meinisin ra usun chök samolun sounfiun Papilon, ra pop seni ewe fanü Papilon. 16 Iwe, lupwen a küneer, a mocheisou ngeniir o tinala chon künö rer Papilon. 17 Mürin, ekewe chon Papilon ra tolong ren pwe repwe lisowu ngeni, ra pwal mocheisou ngeni o alimengaua. Nge wesin ar alimengaua, neminei a kul seniir o oputeer. 18 Iwe, lupwen a sopwela an amömö inisin fän iten lisowu fän mesen aramas o pwärala an selela ngeniir, üa kul seni o oputa, usun üa fen kul seni pwin we. 19 Nge a chök alapala an amömö inisin fän iten lisowu, pun a chechemeni fansoun an föpwül, lupwen a amömö inisin lon ewe fanü Isip. 20 Iwe, a mocheisou ngeni mwän mi usun chök kolak, ir mi fokun mocheisou usun chök aas me oris.” 21 Ewer, Oholipa, ka positi om angangen lisowu ka föri lupwen om föpwül, lupwen chon Isip ra atapa oupwum o urumwotiti.
22 Iei mine ngang ewe Samol mi Lapalap üa apasa ngonuk, Oholipa, “Ka kul seni noum kewe kamwet o oputeer, nge üpwe asongeer pwe repwe song ngonuk, üpwe pwal emwenireto seni ekis meinisin pwe repwe maun ngonuk. 23 Üpwe emwenato ekewe chon Papilon me chon Kaltea meinisin, ekewe chon Pekot, chon Soa me Koa, pwal ekewe chon Asiria meinisin mi alüalöch, ekewe kepina me ekewe meilapen sounfiu meinisin, pwal ekewe aramas tekia me sounfiu mi wawa oris. 24 Ir meinisin repwe feito seni efeng fän oris me woken, pwal fän eu mwichemongun aramas. Repwe pwelifeiliik fän ar tittin maun mi watte me kükün, pwal fän imwer akkaw. Iwe, üpwe asechukolong lepöür pwe repwe apwünguk. Repwe eäni kapwüng womw won ükükün mine ra mochen apwünguk ren. 25 Iwe, ngang üpwe song ngonuk, nge ir repwe amüchü ar lingeringerituk. Repwe pökü pwötum me selingom, nge chokewe mi chüen manau repwe mäla ren ketilas. Repwe angei senuk noum kewe mwän me fefin, nge chokewe mi chüen manau repwe karala ren ekkei. 26 Iwe, ekewe chon oputok repwe kamwei senuk üfom o angei senuk foutom mi ling. 27 Iei usun üpwe aükätiu om mocheisou me om angangen lisowu, ka popuetä le föri me lon Isip. Kosap chüen nenengeni ekewe uluulun anümwäl ika chechemeni Isip. 28 Pun iei aloi ngang Kot ewe Samol mi Lapalap: Üpwe atolongok lepöün chokewe ka kul seniir o oputeer. 29 Iwe, repwe afeiengauok pokiten ar oputok, repwe pwal angei senuk mine ka eäni o likitukela lon om selela. Iwe, äsäwin om amömö inisum fän iten lisowu epwe pwäpwäla. Om mocheisou me om amömö inisum fän iten lisowu 30 ra atoto womw ei feiengau. Ka amömö inisum fän iten lisowu ngeni ekewe mwü, ka pwal püsin alimengauok ren ar kewe uluulun anümwäl. 31 Ka apirü än pwiüm föföringau, iei mine üpwe ngonuk än pwiüm we kapen feiengau.
32 Iei aloi ngang Kot ewe Samol mi Lapalap:
Kopwe ün seni än pwiüm we kap
mi watte o alolol.
Iwe, lupwen ka ün seni, aramas repwe takiriik o turunufaseek,
pun feiengauom a fokun watte.
33 Kopwe fokun pulas o riaföü ren.
Iei ewe kap än pwiüm we Samaria,
eu kapen mösök me tatakis.
34 Kopwe ün seni o apöla,
mürin kopwe amökkükisi
o ekinasa oupwum ren mökkün,
pun ngang Kot ewe Samol mi Lapalap üa kapas. 35 Iei mine ngang Kot ewe Samol mi Lapalap üa apasa: Pokiten ka manlükieila o pöütieila lükün sökürum, iei mine kopwe angei liwinin om mocheisou me om amömö inisum fän iten lisowu.”
36 Iwe, ewe Samol mi Lapalap a üreniei, “Nöün aramas, ifa usun, kopwe eäni apwüng ngeni Ohola me Oholipa? Iwe, kopwe pwäri ngeniir ar kewe föför mi anioput. 37 Ra föri angangen lisowu o nimanauei aramas. Ra föri angangen lisowu ren ar kewe uluulun anümwäl, ra pwal eäni asoren kek ngeniir nöür kewe, ra nöüniir fän itei. 38 Pwal iei och mine ra föri ngeniei: Ra alimengaua imwei mi pin o apiningaua pinin ai kewe ränin sapat. 39 Pun lon ewe chök ränin, lupwen ra niela nei kana o eäniir asoren kek ngeni ar kewe uluulun anümwäl, ra pwal tolong lon imwei mi pin o apiningaua. Ewer, iei usun mine ra föri lon imwei. 40 Ra pwal mwo nge tinala chon künö pwe repwe körato mwän seni toau. Iwe, lupwen ra feito, ekewe ruoman pwipwi ra tütü o teikei won meser, ra pwal foutei ngeniir chomong fout. 41 Ra mot won eu peet mi fokun ling, ra pwal iseni eu chepel mwer o uwätä won ai apach mi pwokus me ai lö. 42 A wor akürangen eu mwichen pwapwa, nge chon pulas seni fanüpö ra mwicheto ren. Ra isetä lälä won pöün ekewe ruoman fefin, ra pwal ämwärämwäreer ngeni mwärämwär mi ling.
43 Mürin üa apasa usun neminewe mi apwangapwang ren an lisowu, ‘Repwe chök pwal lisowu ngeni, usun ra föri ngeni eman fefin mi amömö inisin fän iten lisowu, pun ina usun lapalapan.’ 44 Iwe, ekei mwän ra chök tolong ren usun ar tolong ren eman fefin mi amömö inisin fän iten lisowu. Iei usun ra tolong ren Ohola me Oholipa, ekewe fefin mi mocheisou. 45 Nge mwän mi pwüng repwe eäni apwüng wor. Repwe apwüngüür usun ar apwüngü fin lisowu me fefin mi nimanauei aramas, pun ir wesewesen fin lisowu, nge pöür ra limengau ren ar nimanau.”
46 Iei usun Kot ewe Samol mi Lapalap a apasa, “Üpwe amwichafengeni chomong aramas pwe repwe ü ngeniir, üpwe pwal awarato niuokus watte wor o amweleleer. 47 Iwe, ekewe aramas repwe monei ngeniir fau o atatakisiir ren nöür ketilas. Repwe niela nöür kewe mwän me fefin o kenala imwer. 48 Iei usun üpwe awesi mocheisou lon ewe fanü, pwe fefin meinisin repwe miritila, nge resap apirü ar mocheisou. 49 Iwe, ämi ruoman pwipwi oupwe angei liwinin ämi mocheisou me liwinin tipisin ämi angang ngeni uluulun anümwäl. Mürin oupwe silei pwe ngang Kot ewe Samol mi Lapalap.”