17
Pworausen awewe ren ruoman ikel me efoch irän wain
17.1-24
Iwe, ewe Samol mi Lapalap a kapas ngeniei, “Nöün aramas, kopwe eäni eu kapas monomon ngeni ekewe chon Israel o apworausa ngeniir eu pworausen awewe. Iwe, kopwe üreniir pwe iei aloi ngang Kot ewe Samol mi Lapalap, ‘A wor eman ikel mi watte, pöükässin ra fokun langatam o wenewu, pwal ülöülan ra langatam o sokopat anüanür. Iwe, a ässitä won Lepanon o felei ülülen efoch irä setar. Iwe, a uweela ngeni eu fanüen chon amömö o isetiu lon eu telinimwen chon amömö. Mürin a angei efoch fasar seni ewe fanü Israel o fotukätiu lon eu pwül mi pwülüöch. Iwe, a fotukätiu usun efoch silifö arun eu koluk mi watte. Fasaran we a pwükütä pwe a wiliti efoch irän wain mi mochomoch, nge a fokun palapal. Iwe, palan ra pwükütä o wene ngeni ewe ikel, nge waran ra tötiu fan. Iei usun a wiliti efoch irän wain mi apwükawu palan me chön.
Nge a pwal wor eman ikel mi watte, pöükässin ra fokun langatam, a pwal fökün ülöül. Iwe, iei ewe irän wain a atowu waran seni lenian wene ngeni ewe ikel, a pwal apwükawu palan ngeni, pwe epwe achöchönü. Nge a fen fot lon eu pwül mi pwülüöch arun eu koluk mi watte, pwe epwe tongeni apwükü palan o ua, epwe pwal wiliti efoch irän wain mi mürina.’ Iwe, kopwe üreniir, ‘Iei alon Kot ewe Samol mi Lapalap: Ifa usun, ewe irän wain epwe märöch? Ifa usun, ewe aemanün ikel esap üttawu waran kewe o fichi uan, pwe chön meinisin mi pwüküfö repwe pwasala? A mecheres ngeni eman mi apwangapwang pöün ika ngeni ekoch aramas chök ar repwe üttawu waran. 10 Ewer, a fen fotetiu. Nge ifa usun, epwe märöch? Esap fokun pwasala, lupwen asepwälin ötiu epwe eniti me lon ewe leni ia a pwükütä ie?’ ”
11 Iwe, ewe Samol mi Lapalap a kapas ngeniei, 12 “Kopwe aisini ei täppin aramas mi lükümach o ü ngeniei, ika ra silei wewen ei pworausen awewe. Kopwe üreniir, pwe ewe kingen Papilon a feila Jerusalem, a liapenala ewe king me nöün kewe nöüwis o uweerela ngeni lenian we Papilon. 13 Mürin a afili eman seni familien ewe king, a föri eu pwonen atipeeu ngeni o pesei pwe epwe pwon ngeni fän akapel. Iwe, a uweela souemwen seni ewe fanü, 14 pwe mwün Juta epwe fefeitiu, nge esap chüen tongeni pöchökülsefäl. Ewe mwü epwe chök fis ren än ewe kingen Juta tümwünüöchü an we pwonen atipeeu ngeni ewe kingen Papilon. 15 Nge ewe kingen Juta a ütä ngeni ewe kingen Papilon o tinala nöün chon künö Isip, pwe epwe tüngor seni oris me sounfiu mi chomong. Ifa usun, epwe pwäk ngeni? Ifa usun, eman aramas mi föri ei sokun esap angei liwinin an föför? Ifa usun, a tongeni atai eu pwonen atipeeu, nge esap angei liwinin? 2.King 24.15-20; 2.Kron 36.10-13 16 Mwo manauei, ngang Kot ewe Samol mi Lapalap üa apasa, ei king epwe fokun mäla lon Papilon, lon lenien ewe chök king a seikätä lon wisan wisen king, pun a aücheangaua o atai an we pwonen atipeeu a eäni fän akapel ngeni. 17 Pwal Farao me nöün mwichen sounfiu mi pwora resap tongeni alisi lon maun, lupwen ekewe chon Papilon repwe senätä oror o aüetä imwen maun, pwe repwe niela chomong. 18 Iwe, a aücheangaua o atai ewe pwonen atipeeu a eäni fän akapel me mwan. A föri ekana sokun föför meinisin, iei popun epwe fokun angei liwinin.”
19 Iei mine Kot ewe Samol mi Lapalap a apasa, “Mwo manauei, üpwe liwini ngeni ükükün an tipis, pun a aücheangaua o atai ewe pwonen atipeeu a eäni fän akapel itei won. 20 Iwe, üpwe aturala ai toloia won, pwe epwe tup lon. Üpwe pwal emwenala Papilon o kapwüng ngeni ikenan, pokiten a atai an pwon fän akapel ngeniei. 21 Iwe, nöün kewe sounfiu meinisin mi sipeöch repwe mäla lon maun, nge chokewe mi chüen manau repwe toropasfeil ekis meinisin. Mürin oupwe silei, pwe ngang ewe Samol mi Lapalap üa kapas.”
22 Iei alon Kot ewe Samol mi Lapalap,
“Püsin ngang üpwe fichi ülülen efoch irä setar,
üpwe fichi efoch fasaran mi pwüküfö
o fotuki won ungen eu chuk mi tekia.
23 Üpwe püsin fotuki won eu chukun Israel mi fokun tekia,
pwe epwe apwükü palan o ua,
epwe pwal wiliti efoch irä setar mi fokun mürina.
Iwe, chomong sokun machang repwe so won palan
o fas fän nürün.
24 Mürin, ekewe irän lemäl meinisin repwe silei,
pwe ngang ewe Samol mi Lapalap
üa amochomocha ewe irä mi langatam
o alangatama ewe irä mi moch.
Üpwe apwasala ewe irä mi manau
o amanaua ewe irä mi pwas.
Ngang ewe Samol mi Lapalap üa kapas, nge üpwe pwal apwönüetä.”

17:15: 2.King 24.15-20; 2.Kron 36.10-13