Paipel ISIKIEL 4
4
Isikiel a aliosu Jerusalem o pwomwen maun ngeni
4.1-5.17
Iwe, Kot a üreniei, “Nöün aramas, kopwe angei eu pilak seni pwül, kopwe anomu fän mesom o aliosu ewe telinimw Jerusalem won. Mürin kopwe pwomweni usun om kopwe maun ngeni: Kopwe amolätä pisekin maun o aüetä eu tittin maun ngeni, kopwe pwal senätä eu oror ngeni, kopwe anomu mwichen sounfiu o iseis mwesinnen amökü tit ünükün. Iwe, kopwe angei echö mächä o anomu mwom pwe epwe tiela lefilom me ewe telinimw. Kopwe newenewen ngeni o pwomweni usun an epwe küna osukosuken maun, nge en ewe chon maun ngeni. Iei eu asisil fän iten chon Israel. Mürin kopwe konola won pelimöngum, nge ngang üpwe anomu womw liwinin tipisin chon Israel, pwe kopwe uwei ar tipis lon ükükün ränin om kopwe konola won pelimöngum. Pun ngang üpwe awisa ngonuk pwe kopwe uwei ar tipis lon ükükün ülüpükü tiue rän, nge eu rän a wewe ngeni eu ierin ar tipis. Iei usun kopwe uwei tipisin chon Israel. Nge lupwen ka awesi ekei rän meinisin, kopwe konsefälila won pelifichum, pwe kopwe uwei liwinin tipisin chon Juta. Üpwe awisa ngonuk faik rän, nge eu rän a wewe ngeni eu ierin ar tipis. Iwe, kopwe newenewen ngeni Jerusalem mi küna osukosuken maun, kopwe aü poum ngeni o osuni usun an feiengau. Ngang üpwe föti ngonuk säl pwe kosap tongeni kuluk, tori kopwe awesi ränin om pwomwen maun ngeni Jerusalem.
Iwe, kopwe angei föün wiich me parli, föün mame pwal sokun föün irä, kopwe iseniir lon eu sepi o föri pilawa seniir. Ei pilawa kopwe mongö, lupwen ekewe ülüpükü tiue ränin om konola. 10 Iwe, ükükün anom mongö lon eu rän epwe esop paun, nge kopwe chök aükü pwe epwe naf ngeni ekewe fansoun mongö. 11 Iwe, ükükün ünümom koluk lon eu rän epwe chök ruu kap, nge kopwe chök aükü pwe epwe naf ngeni eu rän. 12 Kopwe nokopuni anom mongö usun nokopun parli, nge kopwe nokopuni me fän mesen aramas won ekkei seni kiten mongön aramas mi pwasapwas.” 13 Iwe, ewe Samol mi Lapalap a pwal apasa, “Iei usun chon Israel repwe mongö sokun mongö mi limengau ngeniir lein chon ekewe mwü ia ngang üpwe asürela ie.” 14 Mürin üa apasa, “Apwi, ai Kot Samol mi Lapalap, üsap fokun mwo alimengauaei fän eu. Seni ai kükün tori ikenai üsap fokun ochoch man mi püsin mäla ika mäla ren manmwacho, üsap pwal uwalong lon awei fituk mi limengau ngeniei.” 15 Iwe, Kot a üreniei, “Nengeni, üpwe mwüt ngonuk pwe kopwe nokopuni anom mongö won kiten mongön kow siwilin kiten mongön aramas.” 16 A pwal apasa, “Nöün aramas, üpwe angei seni Jerusalem ewe mongö aramas ra manau seni. Repwe aükü ener o mongö fän niuokus, repwe pwal aükü ünümer koluk o ünümi fän apilükülükingau. 17 Iwe, ener mongö me ünümer koluk repwe itela. Repwe nenefengeniir lon ar apilükülükingau o mäla pokiten ar tipis.”