Paipel ISIKIEL 2
2
Isikiel a kö me ren Kot
2.1-3.15
Iwe, Kot a üreniei, “Nöün aramas, kopwe ütä pwe üpwe fos ngonuk.” Nge lupwen a fos ngeniei, Ngünün Kot a feitiu woi o aütäei. Iwe, üa rongorong an fos ngeniei. A apasa ngeniei, “Nöün aramas, üpwe tinukela ren ekewe aramasen Israel, ren chon ewe mwü mi lükümach o ü ngeniei. Ir me ar kewe lewo ra tipis ngeniei tori ikenai, ra pwal lamalamtekia me tipepöchökül. Iwe, üpwe tinukela rer pwe kopwe asile ngeniir, pwe mine kopwe üreniir iei alon Kot ewe Samol mi Lapalap. Inamwo ika repwe rongorong ika resap rongorong, pun ir eu täppin aramas mi lükümach o ü ngeniei, nge repwe chök fokun mefi pwe mi wor eman soufos lefiler. Nge en nöün aramas, kosap niueitiir, kosap pwal niuokusiti ar kapas, kosap niuokus, inamwo ika om nonom lefiler a usun chök om nom lefilen iräfölüföl, ika om nom lein chöükö. Kosap fokun niuokusiti ar kapas ika niueitiir, inamwo ika ir eu täppin aramas mi lükümach o ü ngeniei. Iwe, en kopwe chök asile ngeniir ai kewe kapas, inamwo ika repwe rongorong ika resap rongorong, pun ir eu täppin aramas mi lükümach o ü ngeniei.
Nge en nöün aramas, kopwe rongorong mine üpwe ürenuk, nge kosap lükümach o ü ngeniei usun ei täppin aramas. Kopwe amasala awom o mongö mine üpwe ngonuk.” Iwe, lupwen üa nenela, üa küna efoch pau a itito rei, nge a amwöchü echö toropwe mi mak lon. 10 Mürin, Kot a ameresala ewe toropwe fän mesei. A wor mesen mak lon me lükün, nge mine a mak won pworausen ngüngüres me kechü me feiengau. Pwär 5.1

2:10: Pwär 5.1