Paipel EKISTOS 40
40
Ewe imwenfel seni mangaku a kaütä o apinipinila
40.1-33
Iwe, ewe Samol mi Lapalap a üreni Moses, “Lon aeuin ränin ewe aeuin maram kopwe aüetä ewe imwenfel seni mangaku ia aramas ra churi Kot ie. Kopwe anomu lon ewe imwenfel seni mangaku ewe pworun allük, nge kopwe ti ngeni echö cheech. Iwe, kopwe uwalong ewe chepel o atettelöchü pisekin won. Mürin kopwe uwalong ewe lenien atittin o isetä laman won. Kopwe pwal uwalong ewe rongen asoren ötüöt seni kolt o anomu mwen ewe pworofel. Mürin kopwe eitiuätä chechen asamalapen ewe imwenfel. Kopwe anomu ewe rongen asoren kek mwen asamalapen ewe imwenfel seni mangaku. Kopwe pwal anomu ewe sepien töttöl lefilen ewe imwenfel seni mangaku me ewe rongen asoren kek o alölöü koluk lon. Iwe, kopwe aüetä ewe tit mangaku pwelin ewe leni lükün o eitiuätä chechen asamalapan. Mürin kopwe angei ewe löön epit o epiti ewe imwenfel seni mangaku me mettochun lon meinisin, kopwe pwal apini me pisekin lon meinisin. Iwe, epwe pin. 10 Kopwe pwal epiti ewe rongen asoren kek me pisekin meinisin o apini pwe epwe unusen pin. 11 Iwe, kopwe pwal epiti ewe sepien töttöl me motongan o apini. 12 Mürin kopwe emwenato Aaron me nöün kewe mwän ren asamalapen ewe imwenfel seni mangaku o atütüür. 13 Iwe, kopwe aüföüfa ngeni Aaron ekewe üf mi pin, kopwe pwal epiti o apini, pwe epwe angang ngeniei lon wisen souasor. 14 Kopwe pwal emwenato nöün Aaron kewe mwän o aüföüfa ngeniir ekewe sööch mi pwech, 15 kopwe epitiir usun om epiti semer we, pwe repwe angang ngeniei lon wisen souasor. Pun ar kepit epwe atolongeer me mwirimwirir lon wisen souasor seni eu täppin aramas tori eu täppin.”
16 Iwe, Moses a föri meinisin usun mine ewe Samol mi Lapalap a allük ngeni. 17 Lon aeuin ränin ewe aeuin maram, lon aruuen ierin ar towu seni Isip ewe imwenfel seni mangaku a kaütä o apinipinila. 18 Iwe, Moses a aüetä ewe imwenfel seni mangaku. A fotuki alongun o aüetä papan, a pwal sökalong ömwöchür o aüetä üran. 19 Mürin, Moses a emeresala ewe mangaku won ewe imwenfel o isetä pwölüpwölün won, usun mine ewe Samol mi Lapalap a fen allük ngeni. 20 A pwal angei ekewe allük o isenirelong lon ewe pworofel, a sökalong ämwärin o isetä öppüngün won. 21 Mürin, Moses a uwalong ewe pworofel lon ewe imwenfel seni mangaku o eitiuätä ewe chechen lefil pwe a tiela ewe pworofel, usun ewe Samol mi Lapalap a fen allük ngeni. 22 Iwe, a iseis ewe chepel peliefengin me lon ewe imwenfel seni mangaku pekiton ewe cheech. 23 A pwal isetä ekewe pilawa o atettelöchü me won ewe chepel fän mesen ewe Samol mi Lapalap, usun ewe Samol mi Lapalap a fen allük ngeni. 24 Iwe, a iseis ewe lenien atittin awenewenen ewe chepel peliörün me lon ewe imwenfel seni mangaku. 25 A pwal isetä ekewe lamp won o atineer me fän mesen ewe Samol mi Lapalap, usun ewe Samol mi Lapalap a fen allük ngeni. 26 Mürin a iseis ewe rongen asor seni kolt lon ewe imwenfel seni mangaku kükü ngeni ewe cheech 27 o keni apach mi pwokus won, usun ewe Samol mi Lapalap a fen allük ngeni. 28 Iwe, a pwal eitiuätä chechen asamalapen ewe imwenfel. 29 Mürin a iseis ewe rongen asoren kek leasamalapen ewe imwenfel seni mangaku, o eäni asoren kek me asoren mongö won, usun ewe Samol mi Lapalap a fen allük ngeni. 30 A pwal iseis ewe sepien töttöl lefilen ewe imwenfel seni mangaku me ewe rongen asor o alölöü koluk lon. 31 Iwe, Moses me Aaron me nöün kewe mwän ra talü pöür me pecher lon. 32 Lupwen ra tolong lon ewe imwenfel seni mangaku, pwal lupwen ra kan ngeni ewe rongen asor, ra limetiir lon ewe koluk, usun ewe Samol mi Lapalap a fen allük ngeni Moses. 33 Iwe, a pwal aüetä ewe tit mangaku pwelin ewe leni lükün ewe imwenfel seni mangaku me ewe rongen asor o eitiuätä chechen asamalapen ewe leni lükün. Iei usun Moses a awesi ewe angang.
Ewe kuchu won ewe imwenfel seni mangaku
40.34-38
(Num 9.15-23)
34 Mürin, ewe kuchu a pwölüela ewe imwenfel seni mangaku, nge lingen ewe Samol mi Lapalap a aürala lon. 1.King 8.10-11; Ais 6.4; Is 43.4-5; Pwär 15.8 35 Iwe, Moses esap tufichin tolong lon ewe imwenfel seni mangaku, pun ewe kuchu a chök nonom won, nge lingen ewe Samol mi Lapalap a aürala lon. 36 Lon unusen ar sai, iteiten fansoun, lupwen ewe kuchu a witä seni won ewe imwenfel seni mangaku, ekewe aramasen Israel ra sopwela ar sai. 37 Nge lupwen ewe kuchu a üla won, resap sai tori ewe rän ewe kuchu a witä. 38 Pun lon unusen ar sai kuchun ewe Samol mi Lapalap a nom won ewe imwenfel seni mangaku lerän, nge lepwin ekkei a nom lon ewe kuchu. Ei a fis me fän mesen ekewe chon Israel meinisin.

40:34: 1.King 8.10-11; Ais 6.4; Is 43.4-5; Pwär 15.8