23
Usun pwüngüöchün angangen kapwüng
23.1-9
“Iwe, kosap apworausafetalei eu pworaus mi mwäl. Kosap alisi eman aramasangau ren om pwärätä mine a pwüngingau. Eks 20.16; Lif 19.11-12; Tut 5.20 Kosap eti eu mwichemongun aramas le föri mine a ngau. Nge lupwen ka pwärätä lon kapwüng, kosap sorei mine a pwüng ren om pelieni eu mwichemongun aramas. Kosap pwal apaap ngeni eman chon mwelele lon an kapwüng. Lif 19.15
Iwe, are ka küna nöün chon oputok kow ika nöün aas pwe a malechela, kopwe aliwinala ren. Nge are ka küna eman aas nöün eman chon oputok pwe a turula fän wosan mi chou, kosap feil seni o likiti ngeni chök, nge kopwe alisi le ekietä ewe aas. Tut 22.1-4
Kosap sorei mine a pwüng fän iten eman chon mwelele lon an kapwüng. Kosap atipisimwäli eman, kosap pwal anipweni mine eman chon pwüng epwe mäla ren, pun üsap amusafatei eman mi föri ei sokun föför mi ngau. Iwe, kosap angei lifangen amichimich, pun ei sokun lifang a achuna mesen nöüwis o sorei pwüngün chokewe mi pwüng. Lif 19.15; Tut 16.19
Iwe, ousap ariaföüü eman chon ekis, pun oua silei usun nonomun eman chon ekis, pokiten oua fen piin wasöla lon ewe fanü Isip.” Eks 22.21; Lif 19.33-34; Tut 24.17-18; 27.19
Ewe ierin sapat me ewe ränin sapat
23.10-13
10 “Iwe, lon wonu ier oupwe fotuki fanüemi o kini uan. 11 Nge lon ewe afisuen ier ousap fotuki ewe fanü, nge oupwe likiti pwe ekewe chon mwelele me lein aramasemi repwe mongö seni mine a püsin pwükütä. Iwe, mine ir ra likiti, manmwacho repwe tongeni mongö. Iei usun oupwe pwal föri ren ämi tanipin irän wain me tanipin irä olif. Lif 25.1-7 12 Iwe, lon wonu rän oupwe föri ämi angang, nge lon ewe afisuen rän oupwe asösö. Pun nöümi kow me nöümi aas repwe asösö, pwal nöümi amanau mi uputiu lon imwemi me ekewe chon ekis mi angang ngenikemi repwe ngasatä. Eks 20.9-11; 31.15; 34.21; 35.2; Lif 23.3; Tut 5.13-14 13 Oupwe afäli meinisin mine üa ürenikemi. Ousap iotek ngeni pwal ekoch kot, ousap fokun mwo nge föüni iter.”
Ekewe ülüngat chulap mi kefilitä
23.14-19
(Eks 34.18-26; Tut 16.1-17)
14 “Iwe, fän ülüngat lon eu ier oupwe föri eu chulap ngeniei. 15 Iwe, oupwe föri ewe chulapen mongö pilawa esap wor iis lon. Oupwe mongö pilawa esap wor iis lon ükükün fisu rän, usun üa fen allük ngenikemi. Oupwe föri ei lon ewe fansoun üa filätä, lon ewe maram Apip, pun lon ewe maram oua towu seni Isip. Esap wor eman epwe feito rei fän an asöülapö. Eks 12.14-20; Lif 23.6-8; Num 28.17-25 16 Iwe, oupwe föri eu chulapen fansoun kinikin mwen uän fotämi irä seni mine oua fotuki lon ämi mälämäl. Oupwe pwal föri eu chulapen fansoun ionalong leamüchülan ier, lupwen oua ionifengeni uän fotämi irä seni ämi mälämäl. Lif 23.15-21; Num 28.26-31; Lif 23.39-43 17 Iwe, fän ülüngat lon eu ier nöümi kewe mwän meinisin repwe feito rei o fel ngeniei ngang ewe Samol mi Lapalap ämi we Kot.
18 Ousap eäni asor ngeniei chan ewe mönün asor fiti pilawa mi wor iis lon, ousap pwal iseis tori lesosor kirisin ewe mönün asor oua eäni lupwen fansoun chulap. 19 Oupwe uwato öchün mwen uän fanüemi lon imwei ngang ewe Samol mi Lapalap ämi we Kot.
Ousap kuku eman apanen kuuch lon chönün oupwun ewe inelap.” Tut 26.2; Eks 34.26; Tut 14.21
Nöün Kot chon läng a emweni chon Israel
23.20-33
20 “Nengeni, üpwe tinato eman chon läng mwemi, pwe epwe tümwünükemi won ewe al o emwenikemi ngeni ewe leni üa amolätä. 21 Oupwe aüselinga alon o aleasochis ngeni, pun ngang üa tinala remi. Ousap ü ngeni, pun esap amusala ämi ü ngeni.
22 Nge are oupwe aüselingafichi alon o föri meinisin mine üa apasa, üpwe oput chon oputemi o ü ngeni chon ü ngenikemi.
23 Iwe, nei chon läng epwe akom mwemi o emwenikemi ngeni fanüen chon Amor, chon Hit, chon Peris me chon Kanaan, chon Hiw me chon Jepus. Iwe, üpwe aroserela meinisin. 24 Nge ämi ousap chapetiu ngeni ar kewe kot are fel ngeniir, ousap pwal apirü föförür. Iwe, oupwe fokun aturala ar kewe uluulun anümwäl o atatakisi ekewe ür ra fel ngeni. 25 Are oupwe fel ngeniei ngang ewe Samol mi Lapalap ämi we Kot, üpwe afeiöchü enemi mongö me ünümemi koluk, üpwe pwal angei senikemi sokun samau. 26 Esap wor eman fefin epwe lus nöün, esap pwal wor eman epwe rit me lon fanüemi. Üpwe aunusöchü ränin manauemi. 27 Iwe, üpwe föri pwe chon ü ngenikemi repwe niuokusitiei. Üpwe afitikokoi aramas meinisin, chokewe oupwe maun ngeniir, üpwe pwal föri pwe chon oputemi repwe kul senikemi o süla. 28 Üpwe tinala niuokus me rükö lein chon oputemi, pwe ekewe chon Hiw, chon Kanaan me chon Hit repwe süla me mwemi. 29 Iwe, üsap asürela lon eu chök ier, pwe ewe fanü esap pönüla, nge ekewe manmwacho resap chomongola o afeiengauakemi. 30 Ekis me ekis üpwe asürela seni mwemi, tori oupwe chomongola o fanüeni ewe fanü. 31 Iwe, ngang üpwe föri kiän fanüemi seni ewe Setipar tori ewe matau watte, pwal seni ewe fanüapö tori ewe chanpupu Oifrat. Üpwe atolonga fän nemeniemi chon ewe fanü, nge ämi oupwe asürela seni mwemi. 32 Ousap föri eu pwon ngeniir ika ngeni ar kewe kot. 33 Iwe, ousap mwüt ngeniir pwe repwe nonom lon fanüemi, pwe resap atupukemilong lon tipis. Pun ika oupwe fel ngeni ar kewe kot, epwe fokun eu lenien likatup ngenikemi.”

23:1: Eks 20.16; Lif 19.11-12; Tut 5.20

23:3: Lif 19.15

23:5: Tut 22.1-4

23:8: Lif 19.15; Tut 16.19

23:9: Eks 22.21; Lif 19.33-34; Tut 24.17-18; 27.19

23:11: Lif 25.1-7

23:12: Eks 20.9-11; 31.15; 34.21; 35.2; Lif 23.3; Tut 5.13-14

23:15: Eks 12.14-20; Lif 23.6-8; Num 28.17-25

23:16: Lif 23.15-21; Num 28.26-31; Lif 23.39-43

23:19: Tut 26.2; Eks 34.26; Tut 14.21