Paipel ESTER 6
6
Haman a wisen asamolu Mortokai
6.1-14
Lon ei pwin ewe king esap tongeni möür. Iwe, a apasa pwe repwe uwato ewe puken uruwon mwün o aleani me fän mesan. Iwe, ra küna pwe a mak usun Mortokai a pwärätä pwe Piktan me Teres ra ekiekin niela king Asuworos. Ir me ruoman nöün ewe king chon angang ra wisen mamasa ewe lenien tolong ngeni imwen ewe king. Est 2.21-22 Iwe, ewe king a ais, “Met sokun liwin Mortokai a angei fän iten ei föför?” Nge nöün ewe king kewe chon angang ra pälüeni, “Esap fokun wor och mine a angei.” Mürin, ewe king a ais, “Iö a nom lükün?” Lon ewe otun Haman a tolong lon ewe leni lükün imwen ewe king, pwe epwe churi ewe king o tüngor an epwe forusi Mortokai won ewe irä a amolätä fän itan. Nge nöün ewe king chon angang ra üreni, “Haman a ütä lükün.” Iwe, ewe king a apasa, “Epwe tolong.” Iwe, lupwen Haman a tolong, ewe king a aisini, “Met sipwe föri ngeni eman mwän ngang ewe king üa pwapwa le aitöchü?” Nge Haman a ekieki lon lulukan, “Iön ewe king a ekiekin aitöchü lap seniei?” Iei mine Haman a üreni ewe king, “Ren ewe mwän en ai king ka mochen aitöchü, repwe uwato sokun üf en ai king ka püsin üföüf, repwe emwenato eman noum oris ka püsin wawa, repwe pwal afouta ngeni möküren ewe oris sokun fout mi ling. Mürin, eman seni noum kewe samol mi tekia seni ekewe samol meinisin epwe feito o aüföüfa ngeni ewe mwän ekewe üf. Iwe, ewe mwän epwe wawa ewe oris, nge ewe samol epwe emwenala lon lenien chulap lon ewe telinimw o kökkö me mwan, ‘Iei usun mine a fis ngeni ewe mwän ewe king a pwapwa le aitöchü.’ ” 10 Mürin, ewe king a üreni Haman, “Kopwe müttir angei ekewe üf me ewe oris o föri usun mine ka fen apasa, nge kopwe föri ngeni Mortokai ewe re Juta, ätewe mi mot lon asamalapen imwei. Kosap likiti och, pwe kopwe föri meinisin mine ka fen apasa.” 11 Iwe, Haman a angei ekewe üf o aüföüfa ngeni Mortokai, a pwal amota won ewe oris. Mürin a emwenala lon ewe lenien chulap me lon ewe telinimw o kökkö, “Iei usun mine a fis ngeni eman mwän ewe king a pwapwa le aitöchü.”
12 Mürin Mortokai a liwiniti asamalapen imwen ewe king. Nge Haman a müttir liwiniti imwan o pwölüela möküran fän an letipeta. 13 Iwe, Haman a apworausa ngeni pwülüan Seres me chiechian kana meinisin mine a fis ngeni. Mürin, nöün souöüröür me pwülüan Seres ra üreni, “Iei ka popuetä le kuf ren Mortokai. I eman chon Juta, kosap fokun tongeni ü ngeni, pwe kopwe chök fokun kuf ren.”
14 Iwe, lupwen ra chüen fos ngeni Haman, nöün ewe king kewe chon angang ra war o müttir emwenala Haman ren ewe kametip Ester a amolätä.

6:2: Est 2.21-22