Paipel ÄN SALOMON AFALAFAL 12
12
Iwe, lealüalum kopwe chechemeni ewe mi föruk, mwen ekewe rän mi ngau repwe feito. Pun epwe war ewe fansoun kopwe apasa usun, “Usap fokun efich ei fansoun üa nom lon.” Kopwe chechemeni Kot, lupwen ka chüen tongeni küna akkar, saram, maram me fü kana, mwen ekewe kuchu repwe liwinto mürin üt. Mürin epwe war eu fansoun, pwe poum mi tümwünuk repwe chechech, pecheöm mi pöchökül iei repwe pwor. Ngiim repwe chokükünüla, pwe kosap chüen tongeni lülü won, nge mesom repwe toputopula, pwe kosap tongeni künaöchuk. Iwe, selingom repwe püngüla, pwe kosap chüen tongeni rongorong akürangen won al. Süngürüngürün föir pwal ngingin köl epwe miiniin ngonuk. Lupwen aramas ra pwök ren tikin machang, en kosap pwök ren. Iwe, kopwe niuokus le feitä won chukuchukutä, kopwe pwal niuokus le fetal won al. Mökürom epwe üwan. Iwe, kopwe fokun weires le fetal, nge om mochen meinisin epwe ükütiu. Pun aramas repwe feila ngeni ar lenien asösö lon peiaser, nge chon ngüngüres repwe fetal won al. Kopwe chechemeni ewe a föruk mwen ewe sein seni silifer epwe mwü, ika ewe sepi seni kolt epwe mök, ika ewe rume epwe mök arun ewe chönüttu, ika ewe lenien üfüf koluk epwe tala. Iwe, kopwe chechemeni Kot mwen inisum epwe liwiniti pwül, pun a pop seni pwül, pwal mwen ngünum epwe liwinla ren Kot, ewe a ngonuk. Pön, fokun pön chök, ewe Chon Afalafal a apasa, mettoch meinisin ra pön chök.
Wisen aramas
12.9-14
Iwe, ewe Chon Afalafal esap chök mirit, nge a pwal aiti ngeni aramas silelap. A ekiekifichi ekewe mwiitun o kütta wewer, a pwal achocho le akotöchüür. 10 Iwe, ewe Chon Afalafal a kütta kapas mi mürina, nge mine a makeetiu a let o pwüng.
11 Iwe, än eman chon mirit kapas ra usun chök wok mi föl, ekewe chon mas ra wokowok le emweni nöür kewe sip, nge ekewe mwiitun ra usun chök chüföl mi nükünük. Ra feito seni Kot, ewe chök eman chon mas. 12 Nei, üpwe fönöök pwe kopwe tümwünuk ren ei sokun lapalap: Föförün chomong puk esap fokun ükütiu, nge kaiö chomong a aweiresi inisum.
13 Iwe, oupwe rong ei kapasen lesopolan: Oupwe niueiti Kot o alesochisi an kewe allük, pun iei a fichiti aramas meinisin. 14 Nge Kot epwe apwüngü föför meinisin, pwal iteiten föför mi fis lemonomon, ika a mürina ika a ngau.