Paipel ÄN SALOMON AFALAFAL 10
10
Mine a pop seni umwes
10.1-20
Iwe, eu lö mi pwokus epwe pwongauala, lupwen kiliso mi mä ra nonom lon. Ina usun ekis chök föförün umwes a pwölüela mirit me iteüöch. Eman mi mirit a chök föri mine a pwüng, nge eman mi umwes a chök föri mine a ngau. Lupwen eman mi umwes a fetal won al, iei mwo nge a chök pwä pwe esap wor an mirit. Iwe, a pwärätä ngeni aramas meinisin pwe i eman mi umwes. Are om samol a song ngonuk, kosap püsin towu seni wisom. Pun eman mi mosonoson a tongeni aükätiu och mwäl mi watte.
Iwe, üa pwal küna och lapalap mi ngau won fanüfan, a pop seni mwälin eman samol: Chon umwes ra nom lon wis tekia, nge chon pisekisek ra nom lon lenien chon tekison. Üa küna pwe ekewe amanau ra wawa oris, nge samol ra fetal usun chök ekewe amanau. Iö a tuw eu pwang epwe püsin turulong lon, nge iö a ataela eu tittin fau, eman serepenit epwe küw. Kölf 7.15; SalF 26.27 Iö a amökü fau epwe tongeni kinas ren, nge iö a äsätta mwüch epwe tongeni feiengau ren. 10 Are efoch kouk a kop, nge sisap seimi, sipwe fokun weires ren lupwen ach nöünöü. Nge mirit a alipwäköchü eman. 11 A ser ach sipwe niela eman chöükö mürin an kükich.
12 Iwe, eman mi mirit a iteüöch ren an kapas, nge eman mi umwes a feiengau ren an kapas. 13 Lepoputän an kapas esap wor wewen, nge sopolan a unusen umwes. 14 Eman mi umwes a kapas chomong. Esap fokun wor eman a tongeni silei usun mine epwe fis. Iö a tongeni pwärätä ngeni aramas mine epwe fis mürin ar mäla? 15 Iwe, eman mi umwes a püsin apekusu ren an angang weires, pun esap fokun silei ewe al a ale ngeni ewe telinimw.
16 Eu fanü a feiengau, are eman semirit a king lon, are pwal nöüwisen lon ra fen kametip lesosor. 17 Nge eu fanü a feiöch, are eman nöün aramas tekia a king lon, are pwal nöüwisen lon ra mongöfengen lon fansoun fich pwe repwe pöchökül ren, nge resap ünüpuch. 18 Are eman a tümwününgauei osun imwan, epwe lich, nge are eman a chipwang, imwan epwe tala. 19 Ia a wor mongö ie, a pwal wor tatakir, nge wain a apwapwai aramas. Iwe, ren moni sia tongeni kamö meinisin. 20 Kosap älälängaua eman king lon om ekiek, nge kosap pwal älälängaua eman mi pisekisek le monomon. Pun eman machang a tongeni uweela om kapas o apworausa ngeniir mine ka apasa.

10:8: Kölf 7.15; SalF 26.27