Paipel ÄN SALOMON AFALAFAL 3
3
Mi wor fansoun mettoch meinisin
3.1-15
Iwe, ren mettoch meinisin a wor ar fansoun. A pwal wor fansoun iteiten angang won fanüfan.
A wor fansoun uputiu pwal fansoun mäla,
a wor fansoun fotukätiu pwal fansoun wietä.
A wor fansoun niela pwal fansoun apöchökülätä,
a wor fansoun ataela pwal fansoun aüetä.
A wor fansoun kechü pwal fansoun takir,
a wor fansoun lolilen pwal fansoun pwörük.
A wor fansoun atoropasafeili fau pwal fansoun ionifengeniir,
a wor fansoun oneimw pwal fansoun onout.
A wor fansoun kütta mettoch pwal fansoun pöütüla,
a wor fansoun amwöchü pwal fansoun äsechala.
A wor fansoun kamwei mettoch pwal fansoun teifengeniir,
a wor fansoun fanafanala pwal fansoun kakapas.
A wor fansoun tong pwal fansoun oput,
a wor fansoun maun pwal fansoun kinamwe. Met sokun feiöch eman epwe angei seni an angang weires?
10 Iwe, üa küna ewe angang weires Kot a awisa ngeni aramas. 11 Meinisin mine Kot a föri a unusen mürina lon ar fansoun. Iwe, a pwal atolonga ekiekin fansoun esemwüch lon letipen aramas, nge resap tongeni weweiti mine Kot a föri seni lepopun tori lesopolan. 12 Iwe, üa silei pwe esap wor och a mürina lap seni än eman epwe pwapwa o föri mine a mürina lon fansoun manauan. 13 Nge üa pwal silei pwe aramas meinisin repwe mongö o ün, repwe pwal pwapwa lon ar angang weires. Pwal iei eu lifang me ren Kot. 14 Iwe, üa silei pwe meinisin mine Kot a föri epwe nonom tori feilfeilachök. Esap wor eman a tongeni apacha och ngeniir, esap pwal wor eman a tongeni aimwü och seniir. Iwe, Kot a föri iei usun pwe aramas repwe meniniti. 15 Mine a wor ikenai a fen wor me lom, nge mine epwe wor me mürin a fen pwal wor me lom. Iwe, mine Kot a föri me lom, a pwal förisefäli.
Pwüngingau lon manauen aramas
3.16-4.16
16 Iwe, üa pwal küna pwe won fanüfan a wor pwüngingau lon lenien apwüng, a pwal wor pwüngingau lon lenien pwüngüöch. 17 Iei mine üa ekieki lon letipei, “Kot epwe apwüngü chon pwüng me chon pwüngingau, pun epwe wor fansoun fisin mettoch meinisin me sokun föför meinisin.” 18 Iwe, üa pwal ekieki lon letipei, “Kot a sotuni aramas pwe epwe aiti ngeniir pwe ra chök wewe ngeni man. 19 Pun sopolan manauen aramas me sopolan manauen man a wewe chök. Usun aramas ra mäla, ina usun man ra pwal mäla. Ir meinisin ra eäni eu chök ngasangas, pun aramas resap feiöch seni man. Iwe, meinisin pön chök. 20 Iwe, ir meinisin ra feila lon eu chök leni. Ir meinisin ra för seni pwül, repwe pwal liwiniti pwül. 21 Iö a silei ika ngünün aramas ra feitä läng, nge ngünün man ra feitiu fän pwül?” 22 Iei mine üa küna pwe a fokun mürina pwe eman aramas epwe pwapwa lon an angang, pun iei wisan. Nge iö a tongeni aiti ngeni aramas mine epwe fis me mürin?