Paipel TUTERONOMI 17
17
Iwe, ousap eäni asor ngeni ewe Samol mi Lapalap ämi we Kot eman ätemwänin kow ika eman sip mi wor terin, ese lifilifil met sokun. Pun ei sokun asor a anioput ngeni ewe Samol mi Lapalap ämi we Kot.
Iwe, are a fis me lon eu lein ämi kewe telinimw Kot epwe ngenikemi, pwe eman mwän ika eman fefin a föri mine a ngau me fän mesen ewe Samol mi Lapalap ämi we Kot ren an purätiu än Kot we pwon, are a feila o angang ngeni pwal ekoch kot, are a fel ngeniir, ika a fel ngeni akkar ika maram ika ngeni ekewe fü ewe Samol mi Lapalap esap tipeeu ngeni, Eks 22.20 nge oua rong usun me ren eman, mürin oupwe achocho le ais usun. Iwe, are a let o allükülük pwe ei sokun föför mi anioput a fis lon Israel, mürin oupwe emwenato ewe mwän ika fefin mi föri mine a ngau ren asamalapen ämi telinimw o monei ngeni fau ewe aramas tori a mäla. Nge epwe chök ninnila, are a wor ruoman ika ülüman chon pwärätä an tipis. Esap wor eman epwe ninnila are a wor eman chök chon pwärätä. Num 35.30; Tut 19.15; Mat 18.16; 2.Kor 13.1; 1.Tim 5.19; Ipr 10.28 Iwe, ekewe chon pwärätä repwe akomwen monei ngeni fau, mürin ekewe lusun aramas repwe monei ngeni fau tori a mäla. Iei usun oupwe limetawu me leimi mine a ngau. 1.Kor 5.13
Iwe, are eu kapwüng a kon weires ngenikemi, kapwüngün nimanau, kapwüngün fitikoko, kapwüngün feiengau ika pwal ekoch kapwüng mi weires ngenikemi ra fis me lon ämi kewe telinimw, oupwe feila ren ewe leni ewe Samol mi Lapalap ämi we Kot epwe filätä. Oupwe feila ren ekewe souasor ir chon ewe ainangen Lefi me ewe souapwüng mi wiseni ewe wis lon ewe fansoun. Oupwe aisiniir, nge ir repwe aiti ngenikemi pwüngün. 10 Mürin oupwe chök föri usun mine ra aiti ngenikemi me lon ewe leni ewe Samol mi Lapalap epwe filätä. Iwe, oupwe tümwünüöchü le föri meinisin mine ra emweni ngenikemi. 11 Oupwe chök föri mine ra aiti ngenikemi, pwal mine ra apwüngala. Ousap fokun tokola seni. 12 Nge are eman a aücho pwe esap aleasochis ngeni mine a kapwüngüla me ren ewe soukapwüng ika souasor mi angang ngeni ewe Samol mi Lapalap ämi we Kot, ewe aramas epwe fokun ninnila. Iei usun oupwe limetawu mine a ngau seni lon Israel. 13 Mürin, ekewe aramas meinisin repwe rongorong usun o niuokus pwe resap chüen aüchosefäl.”
Kapasen öüröür fän iten ewe wisen king
17.14-20
14 “Iwe, lupwen oupwe tolong lon ewe fanü ewe Samol mi Lapalap ämi we Kot epwe ngenikemi pwe oupwe fanüeni o nonom lon, nge mürin oua apasa, ‘Aipwe eäni eman king usun ekewe mwü meinisin ra nom ünüküm,’ 1.Sam 8.5 15 oupwe chök seikätä eman king ewe Samol mi Lapalap ämi we Kot a filätä. Oupwe chök eäni eman king seni leimi. Ousap eäni eman chon ekis king. 16 Nge ewe king esap achomongala nöün oris, esap pwal tinala aramas Isip pwe repwe kamö nöün oris, pun ewe Samol mi Lapalap a ürenikemi pwe ousap fokun liwinsefäliti ewe fanü. 1.King 10.28; 2.Kron 1.16; 9.28 17 Iwe, ewe king esap achomongala pwülüan pwe lelukan esap tokola seni Kot, esap pwal fokun achomonga nöün silifer ika kolt. 1.King 11.1-8; 1.King 10.14–22.27; 2.Kron 1.15; 9.27
18 Lupwen epwe tolong lon wisan wisen king lon mwün, epwe apirüelong lon eu puk ekei allük fän itan seni ewe puk mi nom fän tümwünüen ekewe souasor ir chon ewe ainangen Lefi. 19 Ewe puk epwe nom ren, pwe epwe aleani lon ränin manauan meinisin, epwe pwal tongeni kaiö seni usun an epwe meniniti ewe Samol mi Lapalap an we Kot ren an aleasochisi kapasen ekewe allük me ekewe pwüüng meinisin. 20 Ren ei esap lamalamtekia lelukan won pwin kewe chon Israel, esap pwal aleasolap ngeni ewe allük. Mürin epwe nemenem fansoun langatam lon mwün lon Israel, ir me mwirimwirin kana.”

17:3: Eks 22.20

17:6: Num 35.30; Tut 19.15; Mat 18.16; 2.Kor 13.1; 1.Tim 5.19; Ipr 10.28

17:7: 1.Kor 5.13

17:14: 1.Sam 8.5

17:16: 1.King 10.28; 2.Kron 1.16; 9.28

17:17: 1.King 11.1-8; 1.King 10.1422.27; 2.Kron 1.15; 9.27