Paipel TANIEL 6
6
Taniel a nom lon pwangen laion
6.1-28
Iwe, Tarius a ekieki pwe epwe öch an epwe awisa ipükü rüe kepina, pwe repwe nemenem lon unusen mwün. Iwe, a pwal awisa ülüman nöüwis tekia pwe repwe nom asen ekewe kepina meinisin, nge Taniel eman lein ekewe ülüman. Iwe, ekewe kepina ra wisen repoot ngeni ekewe ülüman, pwe resap tongeni aosupwanga ewe king ren ar tümwününgauei ar angang. Iwe, a pwä pwe Taniel a angangöch seni ekewe nöüwis tekia me ekewe kepina meinisin, pun a fokun tipesaram, a pwal tipachem me silelap. Iei mine ewe king a ekiekin seikätä, pwe epwe nemenem lon unusen mwün. Mürin, ekewe nöüwis tekia me ekewe kepina ra kütta och mwälin lon än Taniel angang pwe repwe tongeni tip ngeni, nge resap tongeni küna och popun, pun Taniel a allükülük, nge esap wor mwälin ika tümwününgauan. Iwe, ekewe mwän ra kapasfengen lefiler, “Sisap tongeni küna och mwälin lon än ei mwän Taniel angang. Eli sipwe chök küna och lon an aleasochisi än an we Kot allük.” Iei mine ekewe nöüwis tekia me ekewe kepina ra kiito ren ewe king o üreni, “Amwo äm king Tarius epwe manau tori feilfeilachök. Äm meinisin mi angang lon mwum, äm ekewe nöüwis tekia me sounemenem, pwal ekewe kepina me souemwen aia tipeeufengen pwe en king kopwe föri eu allük o apwüngala, pwe esap wor eman epwe tüngor och seni eman kot ika aramas lon ükükün ilik rän, pwe repwe chök tüngor senuk en king. Nge iö esap aleasochis ngeni, epwe koturulong lon pwangen laion. Iei mine äm king, kopwe föri eu allük o saini itom won, pwe esap tongeni siwil usun chök allükün Metia me Persia resap siwil.” Iei mine ewe king Tarius a saini itan won ewe allük o apwüngala.
10 Iwe, lupwen Taniel a silei pwe ei allük a sain, a feila lon imwan o tötä lon eu rumwen asan, ia a wor ie eu asammwacho mi sap ngeni Jerusalem. Ikenan Taniel a fotopwäsuk, a iotek o kilisou ngeni an we Kot fän ülüngat lon ewe rän, usun mine a piin föföri me mwan. 11 Iwe, lupwen ekewe mwän ra kiito ren imwen Taniel we, ra küna pwe a iotekin tüngor ngeni an we Kot. 12 Mürin ra feila ren ewe king o kapas ngeni usun an we allük. Iwe, ra ais, “Äm king, ifa usun, kosap saini ewe allük, pwe esap wor eman epwe tüngor och seni eman kot ika aramas lon ükükün ilik rän, pwe repwe chök tüngor senuk äm king? Sap iei usun, pwe iö epwe aleasolap ngeni, epwe koturulong lon pwangen laion?” Iwe, ewe king a pälüeni, “Ewer, ei allük a pwüngüla, pwe a usun chök allükün Metia me Persia resap tongeni siwil.” 13 Mürin, ekewe mwän ra pwal kapas ngeni ewe king, “Ewe mwän Taniel, eman lein ekewe chon Juta mi oola, esap aleasochis ngonuk äm king, pwal ngeni ewe allük ka saini, pwe a chüen iotekin tüngor fän ülüngat lon eu rän.”
14 Iwe, lupwen ewe king a rong ekei kapas, a fokun lolilen o ekiekin amanaua Taniel. Iwe, seni ei otun tori lekuniol a achocho le kütta met epwe tongeni amanaua Taniel ren. 15 Mürin, ekewe mwän ra pwal kiito ren ewe king o üreni, “Äm king, ka silei pwe ei allük, ka apwüngala, eu allükün Metia me Persia esap fokun tongeni siwil.”
16 Iwe, ewe king a apasa pwe repwe emwenato Taniel o aturalong lon ewe pwangen laion. Nge ewe king a üreni Taniel, “Amwo om we Kot ka likitü le angang ngeni epwe amanauok.” 17 Mürin ra uwato eföü fau o pine ngeni ewe pwangen laion, nge ewe king a impwangei ren nöün ringen impwang pwal ren än nöün kewe samollap ringen impwang, pwe esap wor och mine a pwüngüla usun Taniel epwe siwil. 18 Mürin, ewe king a liwinla lon imwan, nge esap mongö och lon ewe pwin, esap wor och pwapwa a fis lon imwan, esap pwal sile maür.
19 Iwe, lesosorusich ewe king a pwätä o müttirila ren ewe pwangen laion. 20 Nge lupwen a tori ewe pwang, a kökkö fän lolilen o apasa, “Taniel, chon angang ngeni ewe Kot mi Manau. Ifa usun, om we Kot ka likitü le angang ngeni a tongeni amanauok seni ekana laion?” 21 Nge Taniel a pälüeni, “Amwo ewe king epwe manau tori feilfeilachök. 22 Ai Kot a tinato eman chon läng pwe epwe pinei awen ekei laion. Iwe, resap tongeni afeiengauaei, pokiten esap wor ai tipis ngeni Kot pwal ngonuk ai king.” 23 Iwe, ewe king a fokun pwapwa o apasa pwe repwe angeawu Taniel seni lon ewe pwangen laion. Nge lupwen Taniel a towu, resap küna och kinas won inisin, pun a lükü an Kot. 24 Mürin, ewe king a pwal apasa pwe repwe emwenato ekewe mwän mi aturu Taniel o atururolong lon ewe pwangen laion, pwal nöür me pwülüer. Iwe, lupwen resamwo tori epin ewe pwang, ekewe laion ra fen turufiir o ocheer meinisin.
25 Mürin, king Tarius a mak ngeni aramasen fanü me mwü meinisin, pwal ngeni aramas mi eäni sokopaten fos won unusen fanüfan, “Kinamwe mi somwola epwe torikemi. 26 Üa apwüngala eu allük, pwe aramas meinisin mi nom fän nemeniei repwe niueiti o meniniti än Taniel we Kot. Pun i ewe Kot mi Manau a nom tori feilfeilachök, mwün esap tala, an nemenem esap pwal müchüla. 27 I chök a tufichin angasa o amanaua aramas, a pwal föri asisil me manaman won läng pwal won fanüfan. I a amanaua Taniel seni ekewe laion.” 28 Iwe, Taniel a iteföüla lon mwün Tarius tori lon mwün Sirus ewe re Persia.