Paipel TANIEL 4
4
Nepukatnesar a umwesila
4.1-37
Iei ewe pworaus king Nepukatnesar a asile ngeni aramasen fanü me mwü meinisin, pwal ngeni aramas mi eäni sokopaten fos me won unusen fanüfan: Kinamwe mi somwola epwe torikemi meinisin. Seni pwapwan letipei üpwe asile ngenikemi usun ekewe asisil me ekewe manaman ewe Kot mi Unusen Tekia a föri ngeniei. Ekewe asisil Kot a föri ra fokun amwarar, an kewe manaman ra fokun ling. Mwün epwe nom tori feilfeilachök, nge an nemenem epwe fis seni eu täppin aramas tori pwal eu täppin.
Ngang Nepukatnesar üa nom lon imwei imwen king fän kinamwe o nonomöch. Nge üa eäni eu tan mi fokun aniuokusuei. Lupwen üa annut, a wor künaei mi fokun amwökütükütü letipei. Iei mine üa körato soutipachemen Papilon meinisin, pwe repwe feito rei o awewe ngeniei wewen ai we tan. Iwe, ekewe soutipachem me sourong, ekewe souürür me soupwe ra feito. Iwe, üa apworausa ngeniir ai we tan, nge resap tongeni awewe ngeniei wewen. Mürin, Taniel a feito rei, ätewe mi pwal iteni iten ai we kot Peltesasar, Ngünün ewe Kot mi Pin a nom won. Iwe, üa apworausa ngeni ai we tan, “Peltesasar, samolun ekewe soutipachem, üa silei pwe Ngünün ewe Kot mi Pin a nom womw, kosap pwal weires le pwäri mine a monomon. Iei ai we tan. Kose mochen kopwe awewe ngeniei wewen. 10 Lupwen üa annut won ai peet, üa küna efoch irä mi fokun tekia lukalapen fanüfan. 11 Iwe, ewe irä a mämäritä o pöchökülela tori ülülan a tori läng, nge aramasen fanüfan meinisin ra tongeni küna. 12 Iwe, chön ra mürina, a pwal fokun uamong, pwe a ku ngeni aramas meinisin pwe repwe mongö. Iwe, mönün lemäl ra nom fän nürün, ekewe machang ra fas won palan kewe, nge mönümanau meinisin ra mongö seni.
13 Lupwen üa ekieki usun masouen ai we tan, üa pwal tan pwe eman chon künö mi pin a feitiu seni läng. 14 Iwe, a kökkö fän leüömong, ‘Oupwe ukufi ewe irä o pöküela palan, oupwe pwal amätärala chön o atoropasafeili uan. Iwe, ekewe mönün lemäl repwe sü seni fan, ekewe machang repwe pwal ässila seni won palan kewe. 15 Nge oupwe likitala popun me waran lon pwül, oupwe pwal föti ren selimächä me piras lein ekewe fetilin lemäl. Iwe, ei mwän epwe chöchön ren amurenipwin o eti mönün lemäl le mongö fetil. 16 Iwe, tipan epwe soko seni tipen aramas, pwe epwe tipeni tipen man. Ina usun epwe fis ngeni lon ükükün fisu ier. 17 Ei allük a pwüngüla me ren ekewe chon künö mi pin, a pwal rongofeil me rer, pwe aramas repwe silei pwe Ewe mi Fokun Tekia a nemeni mwün aramas, repwe pwal silei pwe a fangala nemenem ngeni iö a mochen fang ngeni o seikätä chon tekison pwe repwe nemenem.’ 18 Iei usun ewe tan ngang king Nepukatnesar üa eäni. Nge en Peltesasar kopwe awewe ngeniei wewen, pun ekewe soutipachem meinisin mi nom lon mwüi resap tongeni. Iwe, nge en ka tongeni, pun Ngünün ewe Kot mi Pin a nom womw.” 19 Mürin än Taniel mi pwal iteni Peltesasar rongorong ei pworaus, a fanfanala fän mairü, pun letipan a fokun mwökütüküt ren wewen ewe tan. Nge ewe king a apasa, “Peltesasar, kosap niuokus le awewe ngeniei wewen ai we tan.” Iwe, Peltesasar a üreni, “Ai samol, amwo pekingauen wewen om we tan epwe fän iten chon oputok me chon pälüenuk. 20 Ka küna efoch irä mi mämäritä o pöchökülela tori ülülan a tori läng, nge aramasen fanüfan meinisin ra tongeni küna. 21 Iwe, chön ra mürina, a pwal fokun uamong, pwe a ku ngeni aramas meinisin pwe repwe mongö. Iwe, mönün lemäl ra nom fän nürün, machang ra pwal fas won palan kewe. 22 Ai king, en ka wewe ngeni ewe irä, pun ka mämäritä o pöchökülela. Om iteüöch a fefeitä pwe a tori läng, nge om nemenem a tori unusen fanüfan meinisin. 23 Iwe, en king ka küna eman chon künö mi pin a feitiu me läng o apasa, ‘Oupwe ukufi ewe irä o ataela, nge oupwe likitala popun me waran lon pwül, oupwe pwal föti ren selimächä me piras lein ekewe fetilin lemäl. Iwe, ei mwän epwe chöchön ren amurenipwin o eti mönün lemäl le mongö fetil lon ükükün fisu ier.’ 24 Iei usun wewen om we tan, ai king, pwal iei pwüngün mine Ewe mi Fokun Tekia a apwüngala pwe epwe fis ngonuk ai king. 25 Iwe, aramas repwe asuukela seni me leir, pwe kopwe nonom lein ekewe mönün lemäl. Lon ükükün fisu ier kopwe mongö fetil usun chök kow, kopwe pwal chöchön ren amurenipwin. Mürin kopwe mefi pwe Ewe mi Fokun Tekia a nemeni mwün aramas, nge a fangala nemenem ngeni iö a mochen fang ngeni. 26 Iwe, a pwal wor wewen alon ewe chon künö pwe popun me waren ewe irä repwe nonom. Kopwe nemenisefäli mwum, lupwen kopwe mefi pwe Kot a nemeni unusen fanüfan. 27 Iei mine ai king, kose mochen kopwe tipeeu ngeni ai kapas. Kopwe aier seni om tipis o eäni föförün pwüng, kopwe pwal ekieksefäl seni om föföringau o eäni tong ngeni chon riaföü. Ren ei, om nonomöch epwe soposopola.”
28 Ekana mettoch meinisin ra fis ngeni ewe king Nepukatnesar. 29 Iwe, engol me ruu maram mürin, ewe king a fetal won imwan lon Papilon 30 o apasa, “Sap iei Papilon ewe telinimw mi lapalap üa aüetä fän ai tufich me pöchökül pwe ai lenien king, epwe pwal alinga lingen ai nemenem?” 31 Iwe, lupwen a chüen kapas, mwelien eman a feitiu seni läng o apasa, “Asile ngonuk king Nepukatnesar, pwe iei kosap chüen nemeni mwum. 32 Aramas repwe asuukela seni me leir pwe kopwe nonom lein ekewe mönün lemäl. Kopwe mongö fetil usun chök kow lon ükükün fisu ier, tori kopwe mefi pwe Ewe mi Fokun Tekia a nemeni mwün aramas, nge a ngeni iö a mochen fang ngeni.” 33 Lon ewe chök otun pwüngün ewe kapas a fis ngeni Nepukatnesar. Aramas ra asüela seni me leir, a pwal mongö fetil usun kow, nge inisin a chöchön ren amurenipwin. Iwe, feilfeil möküran a langatam usun chök ülöülen ikel, nge kün ra usun chök kün machang.
34 Iwe, ewe king a üra, “Wesin ekewe fisu ier, ngang Nepukatnesar üa netä läng o miritsefäl. Iwe, üa mwareiti Ewe mi Fokun Tekia o manau tori feilfeilachök, üa pwal alinga o asamolu i.
Pun an nemenem esap müchüla,
nge mwün a nonom seni eu täppin aramas tori pwal eu täppin.
35 Iwe, esap wor aüchean chon fanüfan meinisin me ren Kot.
A föri mochenin letipan ngeni mwicheichen chon läng,
pwal ngeni chon fanüfan meinisin.
Iwe, esap wor eman a tongeni pinei mine a föri
ika aisini, ‘Met ka föri?’ 36 Lon ewe otun lupwen üa miritsefäl, a pwal torisefäliei iteüöchi me itetekiai me lingen mwüi. Iwe, nei kewe souemwen me samol ra tipenisefäliei, üa pwal tosefälilong lon wisei wisen king, nge ai nemenem a chök lapala. 37 Iei mine ngang Nepukatnesar üpwe mwareiti o asamolu ewe Kingen Läng, üpwe pwal alinga i. An föför ra let o pwüng, nge a atekisona chokewe mi eäni lamalamtekia.”