Nöün Paulus Toropwe ngeni ekewe Souläng lon
Kolose
Kapas akom
I. Chon makkei ei toropwe: Ewe soukünö Paulus
II. A mak ngeni iö me fansoun an mak: Ngeni ekewe souläng lon Kolose, eli a mak lefilen ekewe ier 60 me 64 A.D. lupwen a nom lon imwen fötek lon Rom.
III. Itelapemongen ei toropwe: Kraist möküren mwichefel.
IV. Kapas aüchean ei toropwe: Än Kraist ling me lingen an angang.
V. Masouen ei toropwe: Paulus a makkei nöün ei toropwe ngeni chon ewe mwichefel lon Kolose. Kolose eu telinimw lon Asia Kisikis ötiuen Efisos. Ei mwichefel esap fisitä ren än Paulus angang ngeni, nge a nonom lon ewe leni ia Paulus a angang ie, pun a tinala chon angang seni Efisos, iei samolun telinimwen ewe kinikinin fanü lon Asia mi nom fän nemenien mwün Rom. Paulus a rongorong pwe a wor chon afalafal chofona lon ewe mwichefel lon Kolose mi pese ngeni aramas, pwe are ra mochen silei Kot o eäni unusen ewe manau esemüch repwe fokun fel ngeni ekoch anüsamol me anüsor. Ekei chon afalafal ra pwal apasa pwe aramas repwe fokun atolonga inisir fän sokun angangepin usun chök sirkomsais, repwe pwal fokun tümwünü ekewe pin usun pinin mongö me pwal ekoch pinin sokun mettoch.
Paulus a makkei ei toropwe pwe epwe pölüeni ekei sokun afalafal ren an aiti ngeniir ewe enletin manau fän iten souläng. Aüchean an kewe kapas, pwe Jesus Kraist a tongeni ngenikich unusen ewe manau esemüch, nge ekewe ekoch sokun lükü me föför ra wesewesen atokakichela seni Kraist. Kot a förätä fanüfan ren Kraist, nge ren Kraist epwe pwal aliwinisefäli ngeni püsin i. Ren ach eufengen me Kraist chök a wor ach apilükülük ngeni ewe manau esemüch fän iten chon fanüfan. Mürin Paulus a afata usun lomoten ei afalafal mi aüchea fän iten manauen ekewe chon lükü.
A aüchea ach sipwe silei pwe Tikikus, ewe mi uwei ei toropwe ngeni ekewe souläng lon Kolose fän iten Paulus, a wor eman chiechian itan Onesimus, i ewe amanau Paulus a makkei ewe toropwe ngeni Filimon pokitan.
VI. Tettelin masouen ei toropwe:
Kapas akom 1.1-8
Lapalapen Kraist me an angang 1.9–2.19
Ewe manau mi fö lon Kraist 2.20–4.6
Kapasen lesopolan 4.7-18
1
Kapong
1.1-2
1 Ngang Paulus eman nöün Kraist Jesus soukünö ren letipen Kot, pwal pwiich ei Timoty, 2 aia kapong ngeni ekewe chon pin lon Kolose, ir pwiich kewe mi allükülük lon Kraist: Samach Kot epwe fang ngenikemi ümöümöch me kinamwe.
Eu iotekin kilisou
1.3-14
3 Äm aia kilisou ngeni Kot Semen ach Samol Jesus Kraist fansoun meinisin lupwen aia iotek fänäsengesimi. 4 Pun aia rongorong usun ämi lükü Kraist Jesus, pwal usun ämi echeni ekewe chon pin meinisin. 5 Lupwen ewe Pworausen Manau mi enlet a akomwen torikemi, oua rongorong usun ewe apilükülük mi pop seni ewe Pworausen Manau. Iei mine ämi lükülük me chen a longolong won met oua apilükülükü a iseis lon läng fän itemi. 6 Ei Pworausen Manau a akatoto feiöch, a chöfetal won unusen fanüfan usun a fen fis lefilemi, seni ewe rän oua kärän popuetä le rongorong o weweöchiti än Kot ümöümöch mi wesewesen enlet. 7 Oua rongorong usun än Kot ümöümöch seni Epafras chienach we chon angang mi achengicheng, i nöün Kraist chon angang mi allükülük fänäsengesimi. ✡ Kol 4.12; Filim 23 8 Epafras a pwal asile ngenikem usun ewe chen ewe Ngünmifel a fang ngenikemi.
9 Iei popun, seni ewe rän aia rongorong usumi, aisap ükütiu le iotek fän itemi. Aia tüngor ngeni Kot pwe epwe aurakemi ren tufichin silei letipan me unusen mirit me weweöchiti ekewe mettoch lon pekin ngün. 10 Mürin oupwe tongeni manaueni eu manau mi fich ngeni ach Samol o oupwe föri mine epwe pwapwa ren. Iwe, epwe wor sokopaten föför mürina lon manauemi, oupwe mämäritä lon ämi silei Kot. 11 Iwe, oupwe pöchökülela ren sokun tufich meinisin mi pop seni an manaman me ling, pwe oupwe tongeni likitü o mosonotam. 12 Oupwe pwapwa lon ämi kilisou ngeni Samach Kot, i ewe mi atufichikemi pwe oupwe eäni ekewe feiöch Kot a iseis fän iten ekewe chon pin lon ewe mwün saram. 13 A angasakich seni fän nemenien rochopwak o atolongakich lon mwün Nöün we mi achengicheng. 14 I ewe mi angasakichela, wewen pwe a amusala ach tipis. ✡ Ef 1.7
Usun Kraist me an angang
1.15-23
15 Kraist, ätewe sia tongeni küna, a lapalapeni lapalapen Kot, ewe sisap tongeni küna. I Nöün we mwänichi, a tekia seni förien Kot meinisin. 16 Pun ren Kraist Kot a föri mettoch meinisin lon läng me won fanüfan, ekewe mettoch sia tongeni küna me ekewe mettoch sisap tongeni küna, pwal ekewe ngün mi wor ar pöchökül me nemenem, ir samol mi fokun manaman. Kot a föri mettoch meinisin ren i o pwal fän itan. 17 Kraist a fen nonom mwen mettoch meinisin, nge lon i mettoch meinisin ra chufengen. 18 I möküren inisin we, iei ewe mwichefel. I popun pwe ewe inis a manau. I Nöün Kot, ewe mwänichi, Kot a amanauasefäli seni mäla, pwe i chök epwe tekia mwen mettoch meinisin. ✡ Ef 1.7 19 Pun iei püsin än Kot akot, pwe unusen lapalapen Kot epwe unusolong lon Nöün we. 20 Ren Nöün we Kot a akota pwe epwe achäsefäli mettoch meinisin ngeni püsin i. Kot a afisätä kinamwe ren chaan Nöün we mi pupula me won ewe iräpenges o a achäsefäli mettoch meinisin won fanüfan pwal lon läng ngeni püsin i. ✡ Ef 2.16
21 Me lom oua toau seni Kot o chon oputa i pokiten ekewe mettoch oua föföri o ekkekieki. 22 Nge iei oua chä ngeni Kot ren mälan Nöün we, pwe epwe aütaikemi mwen mesan fän pin me limöch, pwe esap wor och mine oua mwäl won. 23 Nge ämi oupwe fokun sopwela lon ämi lükülük won eu longolong mi pöchökül o nüküchar, ousap fokun mwöküt seni ewe apilükülüköch oua angei lupwen oua rongorong ewe Pworausen Manau. Iei ewe Pworausen Manau aramas ra arongafeili ngeni aramas meinisin won fanüfan, ngang Paulus üa pwal eman chon angang ngeni.
Än Paulus angang ngeni mwichefel
1.24-2.5
24 Iwe, iei üa pwapwa lon ai riaföü fänäsengesimi, pun ren ai riaföü lon inisi üa alisi le aunusöchüela mine esamwo unus lon än Kraist riaföü fänäsengesin inisin we, iei ewe mwichefel. 25 Kot a awisaei, pwe üpwe eman chon angang ngeni mwichefel, i ewe mi ngeniei ei angang ai üpwe föri pwe oupwe feiöch ren. Iei ewe angangen arongafeili unusen an we kapas, 26 ewe monomon Kot a amonala seni aramas meinisin lon ekewe fansoun lomlom, nge iei a pwärala ngeni ekewe chon pin. 27 Kot a mochen pwe epwe pwäri ngeniir an we monomon mi aüchea o ling a amolätä fän iten aramas meinisin. Iei ewe monomon pwe Kraist a nonom lomi, i ach apilükülük pwe sipwe eti lon an ling. 28 Iei mine sia arongafeili Kraist ngeni aramas meinisin. Sia fönöör o asukuler ren sokun tipachem meinisin, pwe sipwe emwenato eman me eman mwen Kot fän ar unusöch lon Kraist. 29 Üa fokun angang weires pwe epwe fis ei o üa aea ewe watten pöchökül Kraist a ngeniei, ewe a pwal akangang loi.