Paipel AMOS 9
9
Aramas resap tongeni sü seni än Kot apwüng
9.1-10
Iwe, üa küna ewe Samol a ütä arun ewe rongen asor, nge a üra, “Kopwe wichi letonen üren ewe imwenfel fän pöchökül, pwe longolongun we epwe chechech. Kopwe atatakisiretiu o atururetiu won möküren ekewe aramas meinisin. Nge ekewe mi chüen manau üpwe nirela lon maun. Esap fokun wor eman leir epwe tongeni süla, esap fokun wor eman epwe tongeni tiwewu.
Inamwo are ra püsin tuetiu aler ngeni ewe lenien sotup, pei epwe turufiir me ikenan. Inamwo are ra feitä läng, üpwe uweeretiu seni ikenan. Inamwo are ra püsin op won ungen ewe chuk Karmel, üpwe kütteer ikenan o turufiir. Inamwo are ra opola seniei fänilolun matau, üpwe allük ngeni eman mönün leset mi fokun watte pwe epwe küür me ikenan. Inamwo are ra oola ren chon oputeer, üpwe allük pwe repwe ninniila. Üa fen apwüngala pwe üpwe aroserela, nge üsap achikeer.”
Lupwen Kot ewe Samol mi Unusen Manaman a atapa fanüfan,
a chech,
nge meinisin mi nonom won ra letipeta.
Unusen fanüfan a pwotä o morotiu usun kolukun ewe chanpupu Nil lon Isip.
Ewe Samol mi Lapalap a aüetä imwan won ekewe läng
o föri pwe läng pwölüpwölün fanüfan.
A angei kolukun lematau
o ninätiu won fanüfan.
Itan ewe Samol mi Lapalap.
Iwe, ewe Samol mi Lapalap a apasa, “Ämi chon Israel, oua wewefengen me ekewe chon Itiopia me rei. Üa emwenawu ekewe chon Filistia seni Kaftor me ekewe chon Siria seni Kir usun chök üa emwenikemiiwu seni ewe fanü Isip. Nengeni, ngang Kot ewe Samol mi Lapalap üa nenengeni ewe mwün Israel mi uren tipis. Iwe, üpwe ataala seni won fanüfan, nge üsap chök unusen arosala mwirimwirin Jakop. Ngang üpwe allük ngeni chon oputen Israel, pwe repwe morei ekewe chon Israel. Ngang üpwe moreer me lein chon ekewe mwü meinisin usun eman a morei föün wiich lon eu moromor, nge esap wor eföü kükün föün epwe morotiu lepwül. 10 Nge ekewe chon tipis meinisin me lein nei aramas repwe mäla lon maun, ir chokewe mi apasa, ‘Esap wor och feiengau epwe torikich.’ ”
Kot epwe aüsefälietä Israel
9.11-15
11 Iwe, ewe Samol mi Lapalap a apasa, “Epwe war ewe fansoun lupwen üpwe aüsefälietä ewe mwün Tafit mi wewe ngeni eu imw mi turula. Üpwe apinasa pwangan o försefäli mine a ta me won. Üpwe försefäli pwe epwe usun chök lon fansoun lom. 12 Iwe, ekewe aramasen Israel repwe nemenisefäli ekewe lusun fanü me lon Etom, pwal ekewe mwü meinisin mi föü itei wor me lom.” Iei usun alon ewe Samol mi Lapalap, ewe epwe föri ekei föför.
13 Iwe, ewe Samol mi Lapalap a apasa,
“Epwe war ewe fansoun
pwe ewe chon tu pwül ekärän wes le tu,
nge ewe chon kinikin a popuetä le kinikin.
Nge ewe chon puri föün irän wain ekärän wes le pupu,
nge ewe chon fofot a popuetä le fofot.
Wain mi arar epwe suputiu seni ekewe chuk
o pu seni ekewe chukutekison meinisin.
14 Üpwe aliwinisefäli nei aramasen Israel ngeni fanüer,
nge ir repwe aüsefälietä ekewe telinimw mi tala o nonom lor.
Repwe fotuki tanipin wain o ün wain seniir,
repwe tanipi o mongö uan.
15 Üpwe fotuki nei aramas lon fanüer,
nge esap wor eman epwe üttisefäliretä seni ewe fanü üa ngeniir.”
Iei usun ewe Samol mi Lapalap ämi we Kot a apasa.