Paipel FÖFÖR 27
27
Paulus a saila Rom
27.1-12
Iwe, lupwen a pwüngüla pwe aipwe saila Itali, ra atolonga Paulus me ekoch chon fötek fän nemenien Julius, eman meilapen ewe mwichen sounfiun Rom itan “Än Sisar Mwichen Sounfiu”. Äm aia tötä won efoch sip seni Atramitium mi molotä an epwe sai ngeni ekewe lenien ilen sip lon ewe fanü Asia. Iwe, aia saila, nge Aristarkus eman re Masetonia seni Tesalonika a etikem. Iwe, sorotän ewe rän aia ileiti Siton. Julius a kirikiröch ngeni Paulus o mwüt ngeni an epwe feila o churi chiechian kewe pwe repwe ngeni mine a osupwang ren. Aia saila seni ikenan, nge pokiten pöchökülen ewe asepwäl mi torikem, aia saila lepekin ewe fanü Saipros ewe ia a ekis lüa ie. Iwe, aia saila pekilan ewe matauen Silisia me Pamfilia o tori Mira lon ewe fanü Lisia. Ikenan ewe meilapen sounfiu a küna efoch sip seni Aleksantria epwe saila Itali, iei mine a atökeemitä won. Iwe, äm aia mang le sai lon chomong rän, nge fän watten weires aia arap ngeni ewe telinimw Knitus. Pokiten ewe asepwäl a pöto me mwem, aisap tongeni sopwela äm sai, iei mine aia saila lepekin ewe fanü Kreta, ewe ia a ekis lüa ie awenewenen Salmone. Aia saila arapakan ngeni ewe fanü, nge fän watten weires aia tori eu leni itan “Safe Harbors” * wewen “Safe Harbors” lenien ilen sip mi chuno arap ngeni ewe telinimw Lasea. Iwe, aia nonom ikenan fansoun langatam tori a fokun weiresila pwe aipwe sopwela äm sai, pun a fen sängerela ewe Ränin Echikefel än ekewe chon Juta. Iei mine Paulus a ngeniir ekei kapasen öüröür, Lif 16.29-31; 23.27-32; Num 29.7 10 “Ämi mwän kana, üa küna pwe ach ei sai seni ikei epwe afeiengau, sap chök ren talan waach ei sip me uttenan, nge epwe pwal wor mi mäla.” 11 Nge ewe meilapen sounfiu a lükü alon ewe pölü me alon ewe souwa, nge esap lükü alon Paulus. 12 Ewe lenien ilen sip esap öch ar repwe mamaram ikenan tori lesopolan lefen. Iei mine chomong me lein ekewe mwän ra tipeeu ngeni ar repwe sai seni ikenan o ra sotuni ika repwe tori Föniks pwe repwe mamaram ikenan. Föniks eu lenien ilen sip lon Kreta mi sape ngeni lotou-ör me lotou-äfeng.
Ewe mölümöl le matau
27.13-38
13 Iwe, lupwen och kükün asepwäl seni ör a popuetä le enito, ekewe mwän ra ekieki pwe ra tongeni afisi mine ra akota. Iei mine ra efietä ewe angkö o seresila fokun kan ngeni chök ewe fanü Kreta. 14 Nge a müttir fis, pwe eu asepwäl mi fokun pöchökül itan “Ötiu-äfeng” a enito seni ewe fanü. 15 A weneiti ewe sip, nge pokiten ewe sip esap tongeni sai ngeni ewe mölümöl, aia chök likiti ngeni ewe mölümöl pwe aipwe maanula ren. 16 Iwe, aia ekis chuno lupwen aia saila örün ewe kükün fanü Kauta. Ikenan aia anükünükü timan ewe sip, nge fän weires chök. 17 Ra efietä ewe tima won ewe sip, mürin ra pweli ünükün ewe sip ngeni säl. Iwe, ra niuokus pwe repwe fanatä won petepeten arosetin Lipia, iei mine ra aürätiu ewe amara o mamaanula ren ewe asepwäl. 18 Iwe, ewe mölümöl a chök soposopola, iei mine sorotän ewe rän ra popuetä le aturätiu uttenen ewe wa leset, 19 nge pwal eu rän mürin ra aturätiu pisekin ewe sip. 20 Lon chomong rän aisap tongeni küna akkar ika fü kana, nge ewe mölümöl a chök pöchökül le enitikem. Iwe, esap chüen wor äm apilükülük pwe aipwe manau.
21 Iwe, fansoun langatam ekewe aramas resap mongö och, mürin Paulus a ütä me mwer o apasa, “Ämi mwän kana, epwe fen öch ika oupwe aüseling ngeniei pwe sisap sai seni Kreta. Pun ika itä oupwe aüseling ngeniei sisap tolong lon ei watten osukosuk me feiengau. 22 Nge iei üa tüngor ngenikemi, pwe oupwe apilükülüköch, pun esap wor eman me leich epwe mäla, nge ei chök sip epwe tala. 23 Pun lepwin ewe eman nöün Kot chon läng, ewe Kot üa nonom fän nemenian o üa angang ngeni, a feito rei 24 o üreniei, ‘Kosap niuokus Paulus! Kopwe fokun ütä me mwen ewe Sisar. Nge Kot, lon an kirikiröch epwe pwal amanaua chokewe meinisin mi etuk lon ei sai.’ 25 Iei mine ämi mwän, oupwe apilükülüköch! Pun üa lükü Kot, pwe epwe fis usun mine a üreniei. 26 Nge sipwe fokun pasetä won wochen eu fanü.”
27 Iwe, a iei engol me rüanü pwin aia mamaanfeil lon ewe matau watte itan Mediteranean ren ewe mölümöl. Ina epwe lukenipwin ekewe säla ra mefi pwe aia arap ngeni fanü. 28 Iei mine ra esenätiu efoch säl mi wor ochou won, iwe, ra küna alololun ewe ie ükükün ipükü rüe fit. Ekis fansoun mürin ra pwal aüküsefäli o küna pwe a chök tiwe fit alololun. 29 Iwe, ra niuokus pwe ewe sip epwe fanatä won woch. Iei mine ra aturatiu fofoch angkö me mürin, iwe, ra iotek pwe epwe ränila. 30 Mürin ekewe säla ra sotuni ar repwe sü seni ewe sip. Ra aturätiu ewe tima lon ewe sät, nge ra tipin esenätiu ekoch angkö seni me mwen ewe sip. 31 Nge Paulus a üreni ewe meilapen sounfiu me ekewe sounfiu, “Are ekei säla resap nonom won ei wa, esap wor ämi apilükülüköch pwe oupwe manau.” 32 Iei mine ekewe sounfiu ra pökü ekewe säl mi riri ngeni ewe tima pwe a maanula.
33 Me mwen an epwe ränila, Paulus a tüngor ngeniir meinisin pwe repwe mongö och. A üra, “A ükükün engol me rüanü pwinich iei ach sia witiwiti lon, nge ei ükükün fansoun ousap fokun mongö och. 34 Üa tüngor ngenikemi pwe oupwe mongö. A lomot ngenikemi, pwe oupwe tongeni manau. Pun esap fokun mwo nge emet meten möküremi epwe turula.” 35 Iwe, wesin an apasatä ekei kapas, Paulus a angei ekis pilawa o iotekin kilisou ngeni Kot won mwer meinisin. A kinikisietiu o a popuetä le mongö. 36 Mürin ir meinisin ra popuetä eäni apilükülüköch o ra pwal püsin mongö. 37 Iwe, ükükün chochon wam we ruopükü fik me wonoman. 38 Mürin äm meinisin aia mötüla, ra aturätiu ekewe wiich meinisin le matau, pwe wam we a pwasetä.
Ewe sip a fanatä o mök
27.39-44
39 Iwe, lupwen a ränila, ekewe säla resap tongeni asilla ewe fanü. Nge ra küna eu nomolong mi wor pian, iei mine ra ekiekietä pwe ika epwe tufich repwe afanatä ewe wa won. 40 Iei mine ra pöküela ekewe angkö, pwe ra kokotiu lon ewe matau. Lon ewe chök otun ra pwal apichi ewe säl mi riri ngeni ewe mwirimwir. Mürin ra üratä ekewe amara mi nom mwen ewe sip, pwe ewe asepwäl epwe pönala mwan o weneiti ewe pi. 41 Nge ewe sip a fanatä mesen woch o mwöchüla, pwe lesopun me mwan a mwöch pwe esap chüen tongeni mwökütüküt, nge lesopun me mürin a tatakis ren watten ekewe no.
42 Iwe, ekewe sounfiu ra akota ar repwe niela ekewe chon fötek meinisin, pwe esap wor eman me leir epwe tongeni äälong wilifanü o süla. 43 Nge ewe meilapen sounfiu a mochen amanaua Paulus, iei mine a aüküretiu pwe resap föri ei. Nge a chök allük ngeni ekewe mwän meinisin mi sile ää ar repwe akomwen atururetiu leset o äälong wilifanü. 44 Iwe, ekewe ekoch aramas resap sile ää repwe kamwöch ekewe pap ika irän ewe sip. Iei usun äm meinisin aia manau ngeni fanü.

*27:8: wewen “Safe Harbors” lenien ilen sip mi chuno

27:9: Lif 16.29-31; 23.27-32; Num 29.7