Paipel FÖFÖR 26
26
Paulus a püsin peni me mwen ewe king Akripa
26.1-11
Iwe, Akripa a üreni Paulus, “Äm aia mwütätä ngonuk pwe kopwe pwärätä fän itom.” Iei mine Paulus a aitiewu pöün, a popuetä le püsin peni i o üra, “King Akripa! Üa fokun kilisou, pun üa tongeni püsin peniei me mwomw usun ekewe mettoch meinisin ekewe chon Juta ra atipisiei won. Nge a fokun öch, pun ka fokun silefichi örünien ekewe chon Juta me mine ra anini won. Iei mine üa tüngor om kopwe aüselingaei fän mosonotam.
“Ekewe chon Juta meinisin ra silei usun nonomi seni leküküni. Ra silei usun uruwon manauei seni lepoputän lupwen üa nom lon fanüei pwal lon Jerusalem. Ra fen silei seni me lom, nge ika ra mochen ra tongeni pwärätä usi, pwe ngang eman Farisi, chon ewe mwich mi fokun tichik me lon ach lamalam. Föf 23.6; Filip 3.5 Nge iei üa ütä ikei pwe üpwe kapwüng pokiten ai apilükülükü ewe pwon Kot a ngeni ach kewe lewo, ewe chök pwon aramasach kewe seni ekewe engol me ruu ainang ra apilükülükü pwe repwe angei lupwen ra fel ngeni Kot lerän me lepwin. Iwe, ämäfen king, pokiten ei apilükülük ekewe chon Juta ra atipisiei ren. Pwota ämi chon Juta oua ekieki pwe esap tufich ach sipwe lükü pwe Kot epwe amanauatä ekewe mi mäla? Püsin ngang üa ekieki, pwe üpwe fokun föri meinisin mine üa tongeni ai üpwe ü ngeni ewe Jesus seni Nasaret. 10 Iwe, iei met üa föri lon Jerusalem. Üa angei ai mwümwütä seni ekewe souasor mi lap pwe üpwe aturalong lon imwen fötek chomong nöün Kot kewe aramas, nge lupwen a towu pwüngün pwe repwe ninnila, üa pwal tipeeu ngeni. 11 Fän chomong üa ariaföüür lon ar kewe imwen felikis, üa pwal achocho le föri mine repwe fangata ar lükülük ren. Lon ai lingeringeritiir üa fen mwo nge feila ngeni ekewe telinimwen chon ekis pwe üpwe ariaföüür. Föf 8.3; 22.4-5
Paulus a pwärätä usun wililan manauan
26.12-18
(Föf 9.1-19; 22.6-16)
12 “Iwe, fän iten ei popun üa feila Tamaskus fän pwüngün me akünöüen ekewe souasor mi lap. 13 Ämäfen king, lupwen üa fetal won ewe al leoloas, üa küna eu saram seni läng mi saramaram seni akkar a sarametiu ünüki me chiechiei kewe mi etiei. 14 Iwe, äm meinisin aia turutiu lepwül, nge ngang üa rong eu möngüngü mi kapas ngeniei lon fosun Ipru, ‘Saul, Saul, pwota ka ariaföüüei? Ka püsin afeiengauok ren om ü ngeniei, usun eman kow a chepeti ewe wok mi nom lepöün ewe chon tümwünü.’ 15 Iwe, ngang üa ais, ‘En iö Samol?’ Ach Samol a pölüeni, ‘Ngang Jesus ewe ka ariaföüü. 16 Kopwe pwätä o ütä. Ngang üa pwä ngonuk ai üpwe awisok pwe kopwe nei chon angang. Kopwe pwärätä mine ka küna usi ikenai, pwal mine üpwe pwäri ngonuk lon ekewe fansoun repwe feito. 17 Üpwe amanauok seni ekewe aramasen Israel, pwal seni ekewe chon lükün Israel, chokewe ngang üpwe tinukela rer. 18 Kopwe aneloi meser, pwe repwe kul seni rochopwak o kul ngeni saram, repwe towu seni fän nemenien Satan o tolong fän nemenien Kot, nge ren ar lüküei repwe küna amusamusen ar tipis kana o angei lenier ren chokewe mi pin.’
Paulus a pwärätä usun an angang
26.19-32
19 “Iei mine ämäfen king Akripa, üsap aleasolap ngeni künaei we seni läng. 20 Üa afalafal akom lon Tamaskus me Jerusalem, mürin lon unusen fanüen ekewe chon Juta, pwal lein ekewe chon lükün Israel, pwe repwe aier seni ar tipis o kul ngeni Kot, pwe repwe föri sokun föför mi pwärätä pwe ra ekieksefäl. Föf 9.20,28-29 21 Iei popun pwe ekewe chon Juta ra turufiei o sotuni ar repwe nieila. 22 Nge tori ikenai Kot a alisiei, iei mine üa ütä ikei o pwärätä mine a let ngeni aramas meinisin, seni ekewe mi kis tori ekewe mi lap. Iwe, mine üa eäni afalafal a wewefengen me mine ekewe soufos me Moses ra afalafala pwe epwe fis, 23 pwe ewe Kraist epwe fokun riaföü o epwe aemanün mi manausefäl seni mäla an epwe arongafeili ewe saramen manau ngeni ekewe chon Juta me ekewe chon lükün Israel.” Ais 42.6; 49.6; 1.Kor 15.20
24 Iwe, lupwen Paulus a püsin peni i lon ei ititin kapas, Festus a kökkö fän leüömong, “Paulus, ka umwes! Om silelap a aumwesuk!” 25 Paulus a pölüeni, “En ämäfen Festus, ngang üsap umwes. Mine üa apasatä lon ai mirit a let. 26 King Akripa, en ka silei usun ekei mettoch meinisin, iei mine üa pwora le kapas ngonuk. Üa lükü pwe ka sileiöchü ekei mettoch meinisin, pun resap fis le monomon chök. 27 King Akripa, ka lükü kapasen ekewe soufos? Ngang üa silei pwe ka lükü!” 28 Mürin Akripa a üreni Paulus, “Ka ekieki pwe ka tongeni peseei lon ei fansoun mochomoch, pwe üpwe soulängila?” 29 Paulus a pölüeni, “Ese lifilifil ika fansoun mochomoch ika fansoun langatam, nge üa chök iotek ngeni Kot pwe en me ir meinisin mi rongorong ngeniei ikenai oupwe wewe ngeniei lon ai souläng, nge sap lon ai föfö!”
30 Mürin ewe king, ewe kepina me Pernike, pwal chokewe meinisin mi nom ra ütä o towu seni ewe leni. 31 Mürin ar towu ra kapasfengen lefiler, “Ei aramas esap föri och mine epwe tipisin mäla ren ika nom lon imwen fötek.” 32 Iwe, Akripa a üreni Festus, “Ei mwän a tongeni musala, nge pokiten a tüngor pwe an we kapwüng epwe amwet ngeni Sisar esap musala.”

26:5: Föf 23.6; Filip 3.5

26:11: Föf 8.3; 22.4-5

26:20: Föf 9.20,28-29

26:23: Ais 42.6; 49.6; 1.Kor 15.20