Paipel FÖFÖR 25
25
Paulus a tüngor pwe an kapwüng epwe amwet ngeni Sisar
25.1-12
Iwe, ülüngat rän mürin än Festus tori ewe fanü, a feila seni Seserea tori Jerusalem. Ikenan ekewe souasor mi lap me ekewe souemwenin chon Juta ra aturu Paulus. Ra tüngor ngeni Festus, pwe epwe alisiir pwe Paulus epwe feito Jerusalem, pun ra föri eu raw pwe repwe niela won ewe al. Festus a pölüeniir, “Paulus epwe chök nom lon imwen fötek lon Seserea, nge püsin ngang üpwe feila ikenan mürin ekis fansoun mochomoch. Nöümi kewe souemwen repwe etieila Seserea o aturu ei mwän are a föri och föför mi ngau.”
Iwe, Festus a pwal nonom rer walu ika engol rän, mürin a feila Seserea. Sorotän ewe rän a mot won ewe lenien kapwüng o allük pwe repwe emwenato Paulus. Nge lupwen Paulus a war, ekewe chon Juta mi feito seni Jerusalem ra ütä pwelin ünükün o popuetä le aturu won chomong föför mi ngau ra atipisi won. Nge resap tongeni alletätä pwe a pwüng. Nge Paulus a püsin peni i o apasa, “Üsap föri och mwäl ngeni än chon Juta kewe allük ika apiningaua ewe Imwenfel ika ü ngeni Sisar lon Rom.” Nge Festus a mochen kütta an chen me ren ekewe chon Juta, iei mine a aisini Paulus, “Ifa usun, ka tipeeu ngeni om kopwe feila Jerusalem, pwe üpwe apwünguk ikenan won ekei kapasen atutur ra atipisuk won?” 10 Iwe, Paulus a üra, “Ngang üa ütä me mwen än Sisar lenien kapwüng, ewe ia üpwe kapwüng ie. Ngang üsap föri och föför mi mwäl ngeni ekewe chon Juta usun ka fen silei. 11 Are ngang üa purätiu eu kewe allük o föri och pwe üpwe tolong lon tipisin mäla, ngang üsap tüngor pwe üpwe ngasala seni. Nge are esap pwüng ekewe kapasen atutur ra atipisiei won, esap wor eman a tongeni atolongaei lepöür. Iwe, ngang üa tüngor pwe ei kapwüng epwe amwet ngeni Sisar.” 12 Mürin än Festus pworaus ngeni nöün kewe souöüröür a pölüeni, “Ka tüngor pwe om ei kapwüng epwe amwet ngeni ewe Sisar, iei popun kopwe fokun feila ren Sisar.”
Paulus a ütä me mwen Akripa me Pernika
25.13-27
13 Mürin ekoch fansoun ewe king Akripa me Pernike ra feito Seserea ar repwe churi o kapongen etiwetiw ngeni Festus. 14 Mürin ar nonom ikenan ekoch rän, Festus a apworausa ngeni ewe king usun pworausen Paulus: A wor eman mwän ikei lon imwen fötek Feliks a likitätiu. 15 Nge lupwen üa feila Jerusalem, nöün ekewe chon Juta kewe souasor mi lap me ekewe souakom ra uwato ar kapasen atutur ra atipisi won o tüngor ngeniei, pwe üpwe apwüngala pwe a tipis. 16 Nge ngang üa üreniir, pwe oukich chon Rom lon örüniach sisap atipisi eman aramas ren och tipis me mwen an epwe churi ekewe chon atipisi, pwe epwe tongeni püsin peni i won ekewe kapasen atutur ra atipisi won. 17 Iwe, lupwen ra feito ikei, üsap olusala ai fansoun, nge sorotän ewe rän üa mot lon ewe lenien kapwüng o allük pwe repwe emwenato ewe mwän rei. 18 Iwe, ekewe chon ü ngeni ra ütä, nge resap aturu won och föför mi fokun ngau usun üa ekieki pwe repwe föri. 19 A chök wor ekoch kapasen anini ngeni usun pwüngün ar lamalam, pwal usun eman mwän itan Jesus mi mäla, nge Paulus a apasa pwe a manausefäl. 20 Iwe, üsap chüen silei epwe ifa usun ai üpwe tongeni angei ai wewe won ekei mettoch. Iei mine üa tüngor ngeni Paulus are epwe tipeeu ngeni an epwe feila Jerusalem, pwe epwe kapwüng ikenan won ekei kapasen atutur. 21 Nge Paulus a tüngor, pwe an kapwüng epwe amwet ngeni ewe Sisar an epwe filätä pwüngün, nge i epwe chök nom lon imwen fötek. Iei mine üa allük ngeni ekewe sounfiu, pwe repwe mamasa tori üpwe tongeni tinala i ren Sisar.” 22 Iwe, Akripa a üreni Festus, “Ngang üa mochen püsin rongorong ngeni ei mwän.” Festus a pölüeni, “Lesor kopwe rongorong ngeni.”
23 Sorotän ewe rän Akripa me Pernika ra feito fän sokopaten fouter mi ling, pwal fän etiwetiw seni ekewe aramas. Ra tolong lon ewe utten mwich fiti ekewe meilapen sounfiu me ekewe souemwenin ewe telinimw. Fän än Festus allük ra emwenato Paulus lon ar we mwich. 24 Iwe, Festus a üra, “King Akripa pwal meinisin mi etikich le nom ikei: Ämi oua küna ei mwän ekewe chon Juta meinisin mi nom ikei me ekewe mi nom lon Jerusalem ra ü ngeni. Ra uwato ar kapasen atutur rei o ra pupuchör, pwe esap pwüng ngeni an epwe chüen manau. 25 Ngang üsap küna och föför a föri fän iten an epwe tipisin mäla. Iwe, pokiten püsin i a tüngor pwe an kapwüng epwe amwet ngeni ewe Sisar, üa ekieki ai üpwe tinala ren. 26 Nge esap wor och mine üpwe tongeni makkeela ren ewe Sisar usun föförün ätei. Iei mine üa emwenato i me mwemi meinisin, fokun me mwomw king Akripa, pun wesin ei angangen chosa fän itan, epwe wor mine üpwe tongeni makkeetiu usun. 27 Pun esap pwüng ngeniei ai üpwe tinala eman chon fötek, nge esap fatöch ekewe kapasen atutur ra atipisi won.”