23
Iwe, Paulus a newenewen ngeni ewe mwichen soupwüng o apasa, “Ämi pwii kana re Israel! Üa manaueni manauei mwen mesen Kot, nge esap wor och mengiringirin letipei tori ikenai.” Ren ei ewe Souasor mi Lap Ananias a allük ngeni ätekewe mi ütä ünükün Paulus pwe repwe pösapei awan. Mürin Paulus a üreni, “Kot epwe fokun pösapeek, en tit mi peinitipwech! Ka mot ikenan ren om kopwe apwüngüei fän pwüngün ekewe Allük, nge en ka purätiu ekewe Allük ren om allük ngeniir, pwe repwe pösapeei!” Mat 23.27-28 Iwe, ätekewe mi kan ngeni Paulus ra üreni, “En ka kapasingau usun nöün Kot we Souasor mi Lap!” Paulus a pölüeni, “Ämi pwii kana, üsap silei pwe ätenan i ewe Souasor mi Lap, pun ekewe Toropwe mi Pin ra apasa, ‘Kosap kapasingau usun samolun noumw aramas!’ ” Eks 22.28
Iwe, lupwen Paulus a küna pwe ekoch chon ewe mwich ir Satusi, nge pwal ekoch ir Farisi, a leüömong le kapasowu ren ewe mwichen soupwüng, “Ämi pwii kana re Israel! Ngang eman Farisi, nöün eman Farisi. Üa kapwüng ikei pokiten ai apilükülük pwe ekewe mi mäla repwe manausefäl!” Föf 26.5; Filip 3.5 Lon ewe chök otun a apasatä ekei kapas, ekewe Farisi me Satusi ra popuetä le aninifengen o ewe mwich a kinikinfesen. (Pun ekewe Satusi ra apasa pwe esap wor manausefäl seni mäla, ra pwal apasa pwe esap wor chon läng me ngün. Nge ekewe Farisi ra lükü lon ir me ülüngat.) Mat 22.23; Mark 12.18; Luk 20.27 Iwe, ar kapas a leüömongola o ekoch seni ekewe Sensen Allük, ir seni lon ewe mwichen Farisi, ra ütä o ra pöchökül le anini, “Äm aisap tongeni küna och mwälin ei mwän! Eli eman ngün ika eman chon läng a wesewesen kapas ngeni!” 10 Iwe, ewe anini a chök fokun wattela, pwe ewe sounemenemen sounfiu a niuokus, ika ekewe aramas repwe atatakisi inisin Paulus. Iei mine a allük ngeni nöün kewe sounfiu pwe repwe feitiu lon ewe mwich, repwe angeawu Paulus seniir o aliwinala lon ewe lenien sounfiu. 11 Lon ewe pwinin, ewe Samol a ütä ren Paulus o a üreni, “Kosap niuokus! Ka pwäriei ikei lon Jerusalem, iei usun kopwe pwal fokun pwäriei lon Rom.”
Ra rawangauei Paulus
23.12-22
12 Lesosorun sorotän ewe rän ekoch chon Juta ra chufengen o föri eu raw. Ra atolongeer lon eu pwon mi fis fän akapel, pwe resap mongö ika ün och tori ar repwe niela Paulus. 13 Mi wor lap seni faik mwän mi akotafengeni ei raw. 14 Mürin ra feila ren ekewe souasor mi lap me ekewe souakom o ra üreniir, “Äm aia atolongakem lon eu pwon, pwe aisap mongö och tori äm aipwe niela Paulus. 15 Iei mine ämi me ewe mwichen soupwüng oupwe tinala ämi kapasen tüngor ngeni ewe sounemenemen sounfiu pwe epwe emwenatiu Paulus remi. Oupwe tipin föri pwe oua mochen kütta tichikin pworausen an föför. Nge äm aipwe molotä pwe aipwe niela i me mwen an esap mwo tori ikei.” 16 Nge nöün fefinen Paulus a rongorong usun ei raw. Iei mine a feila lon ewe lenien sounfiu o apworausa ngeni Paulus mine a fis. 17 Mürin Paulus a körato eman me lein ekewe meilapen sounfiu o a üreni, “Kose mochen emwenala ei alüal ngeni ewe sounemenemen sounfiu. A wor och mine epwe asile ngeni.” 18 Iwe, ewe meilapen sounfiu a angei ewe alüal o emwenala ren ewe sounemenem o üreni, “Ewe chon fötek Paulus a köriei o tüngor ngeniei pwe üpwe emwenato ei alüal reöm, pun a wor och mine epwe asile ngonuk.” 19 Ewe sounemenem a kamwöch pöün ewe alüal, a emwenala ekis o aisini, “Met ka mochen asile ngeniei?” 20 Ewe alüal a üra, “Ekewe chon Juta ra tipeeufengen pwe repwe tüngor ngonuk lesor om kopwe emwenatiu Paulus lon ar we mwichen soupwüng, nge repwe tipin föri ei pwe ra mochen kütta tichikin pworausan. 21 Nge üa tüngor ngonuk pwe kosap aüseling ngeniir, pun a wor lap seni faik mwän ra op o witiwit. Ra atolongeer lon eu pwon mi fis fän akapel, pwe resap mongö ika ün tori ra niela Paulus. Iei ra molotä pwe repwe föri ei o witiwiti om kopwe apwüngala ar tüngor.” 22 Iwe, ewe sounemenem a üreni, “Kosap üreni eman, pwe en ka apworausa ngeniei ei pworaus.” Mürin a tinala ewe alüal.
Ewe sounemenem a tinala Paulus ren ewe kepina Feliks
23.23-35
23 Mürin ewe sounemenemen sounfiu a körato ruoman nöün kewe meilapen sounfiu o üreniir, “Oupwe amolätä ruopükü sounfiu pwe repwe feila Seserea me fik chon wawa oris, pwal ruopükü chon uwou siles. Iwe, oupwe molotä ämi oupwe sü seni ikei kulok tiu lepwinei. 24 Oupwe pwal awora ekoch oris fän iten Paulus pwe epwe wawa o tümwünüöchü i lupwen oupwe uweela ren ewe kepina Feliks.” 25 Mürin ewe sounemenemen sounfiu a makkei echö toropwe. Iei masouan:
26 “Ngang Klautius Lisias üa kapong ngeni en ämäfen kepina Feliks:
27 Ekewe chon Juta ra turufi ei mwän o ra sotun niela. Iwe, üa rong pwe i eman chon Rom, iei mine üa fiti nei kewe sounfiu o amanaua.
28 Üa mochen silei met popun ar atipisi, iei mine üa emwenatiu lon ar we mwichen soupwüng.
29 Iwe, üa küna pwe esap föri och mine epwe tipisin mäla ren ika tolong lon imwen fötek. Ar kewe kapasen tipi ngeni ra pop seni ekewe kapasen anini usun püsin ar kewe allük.
30 Nge lupwen ar asile ngeniei, pwe ekoch chon Juta ra rawangauei ei mwän, üa müttir tinala reöm. Iwe, üa üreni ekewe chon atipisi, pwe repwe feila reöm o pwäri ngonuk me mwomw ar kewe kapasen tipi ngeni.”
31 Iwe, ekewe sounfiu ra apwönüetä mine ewe sounemenem a fen allük ngeniir. Ra angei Paulus o uweela lon ewe pwinin tori Antipatris. 32 Sorotän ewe rän ekewe sounfiu mi fetal ra liwinsefäliti ewe lenien sounfiu o likiti ngeni ekewe chon wawa oris pwe repwe sopwela le emweni Paulus. 33 Iwe, ra emwenala tori Seserea, ra ngeni ewe kepina ewe toropwe o ra atolonga Paulus fän nemenian. 34 Ewe kepina a aleani ewe toropwe o aisini Paulus meni fanü a feito seni. Iwe, lupwen a silei pwe Paulus a feito seni ewe fanü Silisia, 35 a üra, “Ngang üpwe rongorong ngonuk lon ewe kapwüng lupwen ekewe chon atipisuk repwe war.” Mürin a allük pwe sounfiu repwe mamasa Paulus lon ewe imw Herotes a aüetä.

23:3: Mat 23.27-28

23:5: Eks 22.28

23:6: Föf 26.5; Filip 3.5

23:8: Mat 22.23; Mark 12.18; Luk 20.27