Paipel FÖFÖR 19
19
Paulus a angang ngeni Kot lon Efisos
19.1-10
Iwe, lupwen Apollos a nom lon Korint, Paulus a saifetal lemenen ewe fanü o a tori Efisos. Ikenan a küna ekoch souläng o a aisiniir, “Ifa usun, oua angei Ngünmifel lupwen oua lükü?” Ir ra pölüeni, “Äm aisap rongorong mwo pwe a wor eman Ngünmifel.” Iei mine Paulus a aisiniir, “Ika ina, iwe, met sokun papatais oua angei?” Ra pölüeni, “Ewe papatais Johannes a kapas usun.” Mürin Paulus a üreniir, “Ewe papatais Johannes a eäni, a föri ngeni chokewe mi aier seni ar tipis. A pwal üreni ekewe aramasen Israel ar repwe lükü ewe eman epwe feito me mürin, iei i Jesus.” Mat 3.11; Mark 1.4,7-8; Luk 3.4,16; Joh 1.26-27 Iwe, mürin ar rong ekei kapas, ra papatais ngeni iten ewe Samol Jesus. Lupwen Paulus a iseis pöün wor, ewe Ngünmifel a feitiu wor. Iwe, ra kapas lon kapasen ekis o arongafeili ewe Kapasen Kot. Ina epwe iteiter meinisin engol me ruoman mwän.
Iwe, Paulus a feila lon ewe imwen felikis, nge a pwora le afalafal ngeni ekewe aramas lon ükükün ülüngat maram. A kakapas ngeniir o pese ngeniir ar repwe lükü, pwe met i a apasa usun ewe Mwün Kot a let. Nge ekoch me leir ra tipeförea. Resap fokun lükü, nge ra fen kapasingau mwen ewe mwichen aramas usun ewe Alen ach Samol. Iei mine Paulus a feila seniir o uweela ekewe chon lükü. Iwe, iteiten rän a afalafal lon utten Tiranus ia aramas ra akafalafal ie. 10 Ei a fis lon ükükün ruu ier, pwe ekewe aramas meinisin mi nom lon ewe fanü Asia, ir ekewe chon Juta me ekewe chon lükün Israel, ra rongorong kapasen ach Samol.
Nöün Skefa kewe mwän
19.11-20
11 Iwe, Kot a föri manaman mi amwarar ren Paulus. 12 Ika mwo ekewe angkachi me mangaku Paulus a aea, aramas ra angei o iseis won ekewe chon samau, ar samau a wesila, nge ekewe ngününgau ra towu seniir. 13 Ekoch chon Juta mi saifetal o asüela ngününgau seni aramas ra pwal sotuni le aea iten ewe Samol Jesus lupwen ar föri ei angang. Ra kapas ngeni ekewe ngününgau, “Üa allük ngenikemi fän iten Jesus, ätewe Paulus a afalafal usun.” 14 A wor füman mwän nöün ewe souasor mi lap re Juta itan Skefa ra föri ei sokun föför. 15 Nge ewe ngününgau a kapas ngeniir, “Ngang üa silei Jesus, üa pwal silei usun Paulus, nge ämi iö?” 16 Iwe, ewe mwän ewe ngününgau a nom won a fokun pwora le fiu ngeniir, pwe ra kuf meinisin. Ra sü seni imwen ewe mwän, ra kinas, nge üfer ra kamwekamwekis seniir. 17 Iwe, ekewe chon Juta me ekewe chon lükün Israel meinisin mi nom lon Efisos ra rong usun ei pworaus. Ir meinisin ra fokun niuokus, nge iten ach Samol Jesus a fokun iteföüla. 18 Iwe, chomong lein ekewe chon lükü Jesus ra feito o pwärätä ar kewe föför mi ngau mwen mesen ekewe aramas. 19 Pwal chomong me lein chokewe mi föri angangen roong ra uwato nöür kewe puken roong o keniirela mwen mesen ekewe aramas meinisin. Nge lupwen ra apachafengeni liwinin ekewe puk, iwe, a pwä pwe ükükün liwinir lime ngeröü chala. 20 Iwe, pokiten ekei mettoch mi amwarar ra fisitä, kapasen ach Samol a chöfetal o chomong aramas ra lükü Jesus.
A fis eu fitikoko watte lon Efisos
19.21-41
21 Mürin an fis ekei mettoch, Paulus a filätä fän emwenien ewe Ngünmifel pwe epwe sai lemenen Masetonia me Akaia o feila Jerusalem. A apasa, “Mürin ai feila ikenan, üpwe pwal fokun tori Rom.” 22 Iei mine a tinala Timoty me Erastus, ruoman me lein ekewe chon alisi lon ewe angang pwe repwe feila Masetonia, nge i epwe nonom lon Asia ekoch fansoun. 23 Lon ena fansoun a fis eu osukosuk watte lon Efisos pokiten ewe Alen ach Samol. 24 Iwe, eman mwän mi föri pisek seni silifer itan Temetrius a föri liosun imwenfelin ewe anüfefin Artemis. Iwe, an we angang a aworato watten win ngeni nöün kewe chon angang. 25 Iei mine a körifengeniir meinisin fiti chokewe mi föri ewe sokun angang usun ir o a üreniir, “Ämi mwän kana, oua silei pwe ach pisekisek a feito seni ei angang. 26 Nge iei oua tongeni püsin küna o rongorong met ätenan Paulus a föri. A apasa pwe ekewe uluulun kot mi för ren pöün aramas resap wesewesen kot. Nge a fen liapenala chomong aramas ikei lon Efisos pwal lon arapakan unusen ei fanü Asia. 27 A wor och afeiengau ngenikich, pwe ach angang epwe itengau. Nge a pwal wor och afeiengau, pwe imwenfelin ewe anülap fefin Artemis epwe aücheangauala o an itetekia epwe wesila. Iei i ewe anüfefin aramasen Asia meinisin, pwal chon fanüfan meinisin ra fel ngeni!”
28 Iwe, lupwen ekewe aramas lon ewe mwich ra rong ekei kapas, ra fokun lingeringer o ra popuetä le pupuchör, “A lapalap ewe anüfefin Artemis seni Efisos!” 29 Ewe akürang a chöfetal lon unusen ewe telinimw. Ekewe aramas mi afitikoko ra turufi Kaius me Aristarkus o müttir etekiniirela lon ewe lenien urumwot. Ätekei me ruoman re Masetonia mi eti Paulus lon an sai. 30 Iwe, Paulus a mochen püsin feila mwen ewe mwich, nge ekewe chon lükü Jesus resap mwüt ngeni. 31 Pwal ekoch nöüwisen ewe fanü, ir chiechien Paulus, ra tinala pworaus ren Paulus o tüngormau ngeni, pwe esap feito lon ewe lenien urumwot. 32 Nge lon ewe otun unusen ewe mwichen aramas a fokun akürang. Ekoch aramas ra pupuchör won och, pwal ekoch ra pupuchör won och, nge chomong me leir resap fen mwo nge silei ika met popun ar chufengen. 33 Ekoch me lein ekewe aramas ra ekieki pwe Aleksanter i popun ei osukosuk, pun ekewe chon Juta ra pese ngeni pwe epwe ütä mwen ewe mwichen aramas. Mürin Aleksanter a änipö ngeni ekewe aramas pwe repwe fanafanala. Iwe, a sotuni le kapas ngeni ekewe aramas pwe esap tipisin me chiechian kewe, pwe a fis ei osukosuk. 34 Nge lupwen ra silleni pwe i eman re Juta, ir meinisin ra köpökütä won ewe chök kapas lon ükükün ruu awa, “A lapalap ewe anüfefin Artemis seni Efisos.”
35 Iwe, ewe seketerin ei telinimw a tongeni aükala akürangen ekewe aramas. A üreniir, “Ämi chon Efisos! Aramas meinisin ra silei pwe ei telinimw Efisos a tümwünü imwenfelin ewe anülap Artemis, a pwal tümwünü ewe fau mi pin a turutiu seni läng. 36 Esap wor eman a tongeni amam won ekei mettoch. Iei mine oupwe fokun mosonosonola, nge ousap föri och mettoch mi ngau. 37 Ämi oua emwenato ekei mwän ikei, rese fen mwo nge soläni och seni ekewe imwenfel ika apasatä och kapas mi ngau usun ach we anüfefin. 38 Are a wor än Temetrius me nöün kewe chon angang kapasen atutur fän iten eman, a wor ekewe rän mi kefilitä fän iten kapwüng, a pwal wor ekewe sounemenem repwe tongeni apwüngü lon lenien kapwüng. 39 Nge are mi pwal wor och lükün met ei oua mochen, ei epwe kapwüngüla me lon ewe mwich än chon ei telinimw mi akökkö me ren ekewe nöüwis. 40 Pun mürin mine a fis ikenai, repwe tongeni atipisikich pokiten ewe mwichen afitikoko. Esap wor och popun fän iten ei akürang, sisap pwal tongeni pwärätä och popun mi mürina fän iten ei lapalap.” 41 Iwe, mürin an apasatä ekei kapas, a aserala ewe mwichen aramas.

19:4: Mat 3.11; Mark 1.4,7-8; Luk 3.4,16; Joh 1.26-27