Paipel FÖFÖR 12
12
A wattela ewe riaföü ngeni ekewe souläng
12.1-5
Lon ewe fansoun ewe king Herotes a popuetä le ariaföüü ekoch chon ewe mwichefel. A niela James pwiin Johannes ren ketilas. Lupwen a mefi pwe ekewe chon Juta ra pwapwa ren, a sopwela an föför o a pwal turufi Petrus. Ei a fis lupwen fansoun chulapen mongö pilawa esap wor iis lon. Mürin an turufi Petrus, a aturalong lon imwen fötek. Ikenan a atolonga lepöün rüanü mwichen sounfiu, akaföman lon eu mwich. Herotes a ekiekin föri kapwüng ngeni Petrus me mwen ekewe aramas mürin ewe chulapen Pasofer. Eks 12.1-27 Iei usun Petrus a mwöchülong lon fötek, nge ekewe aramas lon ewe mwichefel ra likitü le ikiotek ngeni Kot fän itan.
Petrus a towu seni lon imwen fötek
12.6-19
Lon ewe pwinin me mwen än Herotes epwe apwüngü Petrus me mwen ekewe aramas, Petrus a möür lefilen ruoman sounfiu, a riri ngeniir ren ruofoch sein seni mächä, nge a wor chon mamas ra mamasa asamalapen ewe imwen fötek. Lon ei chök otun eman nöün ewe Samol chon läng a ü ikenan o eu saram a asarama lon ewe ruum. Iwe, ewe chon läng a pisiri won afaren Petrus, a apwökätä o üreni, “Kopwe müttir pwätä!” Lon ei chök otun ekewe sein seni mächä ra turutiu seni won pöün Petrus. Mürin ewe chon läng a üreni, “Kopwe anükü om pelit o ipweipwelong ipwom sus.” Iwe, Petrus a föri iei usun. Mürin ewe chon läng a üreni, “Kopwe üföüfolong üfom we o tapweto müri.” Iwe, Petrus a tapwela mürin o towu seni ewe imwen fötek. Nge Petrus esap silei, pwe mine ewe chon läng a föri a wesewesen fis. A ekieki pwe a wor künaan. 10 Ra pwere seni ewe aeuin mwichen chon mas me ewe aruuen mwichen chon mas o ra tori ewe amüchülan asamalap seni mächä mi wene ngeni ewe telinimw. Iwe, ewe asamalap a püsin sukula ngeniir o ir me ruoman ra towu. Ra mwinemwinela won ewe al, nge lon ei chök otun ewe chon läng a feil seni Petrus. 11 Mürin Petrus a mefi mine a fis ngeni o a apasa, “Iei üa silei pwe mine a fis ngeniei a wesewesen let. Ewe Samol a tinato nöün we chon läng pwe epwe angasaei seni fän nemenemen Herotes, pwal seni ekewe mettoch meinisin ekewe aramasen Juta ra ekiekin föri ngeniei, pwe üpwe tolong lon riaföü.” 12 Lupwen a wewela ren mine a fis ngeni, a feila ngeni imwen Maria, inen Johannes mi pwal iteni Markus. Ikenan chomong aramas ra chufengen o iotekfengen. 13 Iwe, Petrus a fichifich won ewe asamalapen lükün o eman chon angang föpwül itan Rota a feiliti ewe asam pwe epwe pii iö we a fichifich. 14 Nge lupwen a silleni mwelien Petrus, a fokun pwapwa, pwe a liwiniti ewe mwichen aramas, nge esap mwo suki ewe asam. Iwe, a üreniir, pwe Petrus a nom lükün ewe asam. 15 Nge ir ra üreni, “Ka umwes!” Iwe, neminewe a chök änimau pwe a pwüng an kapas. Iei mine ra üra, “Iei i an chon läng.” 16 Nge Petrus a chök sopwela le fichifich. Iwe, lupwen ra suki ewe asam, ra küna i o ra fokun mairü. 17 Petrus a älipö ngeniir pwe repwe mosonoson o a apworausa ngeniir usun än ewe Samol emwenawu seni lon ewe imwen fötek. Mürin a üra, “Oupwe asile ngeni James me ekewe chon lükü ei pworaus.” Iwe, a feil seniir o feila lon pwal eu leni.
18 Iwe, lesosorun ewe rän a fis eu watten osukosuk lefilen ekewe chon mas, pun ra aisfengen lefiler met a fis ngeni Petrus. 19 Mürin än Herotes küttafichi Petrus, nge esap küna, a atittinafichi ekewe chon mas o a allük pwe repwe ninnila. Mürin ei, Herotes a feila seni Jutea o feila Seserea o a nonom ikenan eu fansoun.
Herotes a mäla
12.20-25
20 Iwe, Herotes a fokun song ngeni ekewe chon Tirus me Siton. Iei mine ekoch me leir ra tipeeufengen o feila pwe repwe churi Herotes. Ra akomwen aliapa Plastus, eman nöün ewe king nöüwis mi wisen nemelapei imwan, pwe epwe nom lon pekiir. Mürin ra feila ren Herotes o tüngor an epwe kinamwe ngeniir, pun ir me aramasen fanüer ra angei aner mongö seni fanüen ewe king. 21 Lon eu rän mi kefilitä, Herotes a üföüfolong üfan üfen king, a mot won an lenien motun king o afalafal ngeni ekewe aramas. 22 Iwe, ekewe aramas ra kökkö fän leüömong, “Sap mwelien eman aramas, nge i mwelien eman kot!” 23 Lon ewe chök otun nöün ewe Samol chon läng a ni Herotes, pun esap ngeni Kot lingan. Iwe, moso ra äni fitukan pwe a mäla.
24 Nge ewe kapasen Kot a chök chöfetal ekis meinisin o lalapala. 25 Iwe, lupwen Parnapas me Saul ra wes le föri ar angang, ra liwinsefäl seni Jerusalem, nge ra uwei Johannes mi pwal iteni Markus.

12:4: Eks 12.1-27