11
Än Petrus pworaus ngeni chon ewe mwichefel lon Jerusalem
11.1-18
Iwe, ekewe soukünö me ekewe chon lükü Jesus lon unusen Jutea ra rongorong pwe ekewe chon lükün Israel ra pwal etiwa kapasen Kot. Iei mine lupwen Petrus a feila Jerusalem, chokewe mi tipeni än ekewe chon lükün Israel repwe sirkomsais, ra esita i o apasa, “En ka wasöla lon imwen ekewe chon lükün Israel resap sirkomsais, ka pwal mwo nge etiir le mongö!” Mürin Petrus a popuetä le apworausa ngeniir tichikin meinisin mine a fis seni lepoputän, “Lupwen üa iotek me lon ewe telinimw Joppa, a wor künaei. Üa küna och mettoch mi wewe ngeni echö chenikam mi watte, a föfö pwokukun me rüanü, a ürütiu me läng. Iwe, a köüla mwei. Üa nenelong lon o üa küna sokopaten man mi wor fofoch pecher, manmwacho, sokopaten mantötö me machang mi mwacho. Mürin üa rongorong eu möngüngü a üreniei, ‘Petrus, kopwe ütä, kopwe niela ekei man o kopwe ochoch fituker!’ Nge üa pölüeni, ‘Ai Samol, esap fokun öch ngeniei! Üsap fokun mwo nge mongö och mine a pin ngeniei o nom lon tettelin limengau.’ Ewe möngüngü a kapassefäl seni läng, ‘Kosap apasa pwe a limengau och mettoch are Kot a apasa pwe a limöch.’ 10 Ei lapalap a fis fän ülüngat, mürin ewe mettoch a ürüsefälitä läng. 11 Lon ena chök otun ekewe ülüman mwän Kornelius a tiniireto rei seni Seserea ra tori ewe imw ia üa nom ie. 12 Iwe, ewe Ngünmifel a üreniei pwe üpwe etiir, nge üsap tipemwaramwar. Ekei wonoman chon lükü Jesus seni Joppa ra pwal etiei le feila Seserea, äm meinisin aia tolong lon imwen Kornelius. 13 Iwe, Kornelius a apworausa ngenikem usun an küna eman chon läng a ütä lon imwan o üreni, ‘Kopwe tinala ekoch mwän Joppa ren Simon mi pwal iteni Petrus, pwe epwe feito reöm. 14 I epwe afalafala ewe kapasen Kot ngenikemi, pwe en me chon leimwom meinisin oupwe küna manau.’ 15 Iwe, lupwen üa popuetä le kapas, ewe Ngünmifel a feitiu wor usun chök a feitiu woch me mwan. 16 Mürin üa chechemeni mine ewe Samol a fen apasa, ‘Johannes a papataisikemi ren koluk, nge ämi oupwe papatais ren Ngünmifel.’ Föf 1.5 17 A fokun fat pwe Kot a fang ngeni ekei chon lükün Israel ewe chök lifang a ngenikich lupwen sia lükü ach Samol Jesus Kraist. Iö ngang pwe üpwe tongeni pinei mine Kot a mochen föri?” 18 Lupwen ra rongorong ei pworaus, ra ükütiu le esita Petrus, ra mwareiti Kot o apasa, “Kot a pwal mwüt ngeni ekewe chon lükün Israel pwe repwe ekieksefäl o küna manau.”
A fis ewe mwichefel lon Antiokia
11.19-30
19 Iwe, ekewe chon lükü Jesus ra toropasfeil pokiten ewe riaföü watte a toriir lupwen Stefanus a ninnila. Ekoch leir ra feila tori Fönisia, Saipros me Antiokia o afalafala kapasen Kot ngeni ekewe chök chon Juta. Föf 8.1-4 20 Nge ekoch me lein ekewe chon lükü Jesus, ir mwän seni Saipros me Kirene, ra feila Antiokia o arongafeili kapasen Kot ngeni pwal ekewe chon lükün Israel, ra afalafala ngeniir ewe Pworausen Manau usun ach Samol Jesus. 21 Iwe, manamanen ach Samol a etiir, pwe chomong aramas ra lükü o kul ngeni ewe Samol. 22 Ewe pworaus usun mine a fis a tori ewe mwichefel lon Jerusalem, iei mine ra tinala Parnapas Antiokia. 23 Iwe, lupwen a tori Antiokia, a küna usun än Kot afeiöchü ekewe aramas, a pwapwa o pese ngeniir, pwe repwe allükülük o let ngeni ewe Samol ren unusen leluker. 24 Parnapas eman mwän mi aramasöch, a uren Ngünmifel me lükülük o chomong aramas ra lükü ewe Samol ren.
25 Mürin Parnapas a feila Tarsus pwe epwe kütta Saul. 26 Iwe, lupwen an küna, a emwenato Antiokia. Lon ükükün eu ier Parnapas me Saul ra chufengen me chon ei mwichefel o asukula eu mwichen aramas mi watte. A fis me lon Antiokia, pwe aramas ra popuetä le aita ngeni ekewe chon lükü “souläng” (Chon tapwela mürin Kraist).
27 Lon ena fansoun ekoch soufos ra feito Antiokia seni Jerusalem. 28 Eman leir itan Akapus a ütä o osuni fän manamanen ewe Ngünmifel, pwe eu mailengita epwe tori unusen fanüfan. (Ei a fis lon mwün Sisar Klautius.) Föf 21.10 29 Iwe, ekewe chon lükü Jesus ra tipeeufengen, pwe än eman me eman leir alilis won ükükün an tongeni epwe titila ngeni pwiir kewe chon lükü mi nom lon Jutea. 30 Ra föri ei o tinala Parnapas me Saul, pwe repwe uwei ar we alilis ngeni ekewe souakomwen mwichefel lon Jerusalem.

11:16: Föf 1.5

11:19: Föf 8.1-4

11:28: Föf 21.10