1 Nge a wor eman mwän itan Ananias, i me pwülüan itan Safira ra amömöla eu kinikin seni fanüer. 2 Iwe, pwülüan ei a tipeeu ngeni an epwe aopala och seni ewe moni fän itan, nge ewe lusun a ngeni ekewe soukünö. 3 Mürin Petrus a üreni, “Ananias, pwota ka mwüt ngeni Satan pwe epwe nemeni letipom, pwe ka chofona ngeni Ngünmifel ren om aopala och seni ewe moni ka angei fän iten fanüom we? 4 Ifa usun, esap fanüom mwen om ka amömöla? Nge mürin om amömöla ewe moni esap noumw? Pwota ka ekiekin föri ei sokun lapalap? Kosap chofona ngeni aramas, pwe ka chofona ngeni Kot.” 5 Lon ewe chök otun Ananias a rong ekei kapas, a turula o mäla. Iwe, ir meinisin mi rongorong usun mine a fis ngeni, ra fokun rükö. 6 Mürin ekoch alüal ra ütä o tükümala somän we, ra ekiewu lükün o peiaseni.

7 Ina epwe ülüngat awa mürin pwülüan we a feito, nge esap silei mine a fis. 8 Iwe, Petrus a aisini, “Kopwe üreniei ika iei unusen ewe moni en me pwülüom oua angei fän iten fanüemi we?” Neminewe a pölüeni, “Ewer, ina chök ükükün.” 9 Iei mine Petrus a üreni, “Pwota en me pwülüom oua tipeeufengen le sotuni Ngünün ewe Samol? Nengeni, ekewe alüal mi peiaseni pwülüom we ra nom lükün ewe asam iei, repwe pwal ekiikewu!” 10 Lon ewe chök otun neminei a turula arun pechen Petrus o mäla. Iwe, ekewe alüal ra tolong o küna pwe Safira a mäla. Iei mine ra pwal ekiewu o peiaseni ünükün pwülüan we. 11 Iwe, unusen chon ewe mwichefel me meinisin mi rongorong usun ei pworaus ra fokun rükö.

12 Iwe, ekewe soukünö ra föri chomong manaman me asisil me lein ekewe aramas. Ekewe chon lükü meinisin ra mwichfengen lon ewe leni itan “Pwalangen Salomon.” 13 Esap wor eman me lükün ar we mwich a pwora le chu ngeniir, inamwo ika ekewe aramas ra meninitiir o kapasöch usur. 14 Nge a chomongola mwän me fefin ra lükü ewe Samol o pach ngeni ewe mwich. 15 Pokiten mine ekewe soukünö ra föri, aramas ra ekieto chon samau won ekewe al o alenier won peet me kieki, pwe are Petrus epwe pwereto o pwere seniir, nürün epwe tori ekoch me leir. 16 Iwe, chomong aramas ra feito seni ekewe telinimw mi nom ünükün Jerusalem, ra ekieto ekewe mi samau ika chokewe mi wor ngününgau wor. Iwe, ir meinisin ra pöchökületä.

17 Mürin ewe Souasor mi Lap me chiechian kewe meinisin, ir chon ewe mwichen Satusi, ra fokun lolowoiti ekewe soukünö. 18 Iwe, ra turufiir o atururelong lon imwen fötek. 19 Nge lepwin eman nöün ewe Samol chon läng a suki asamen ewe imwen fötek o emwenawu ekewe soukünö me lon. Iwe, a üreniir, 20 “Oupwe feila o ütä lon ewe imwenfel o afalafala ngeni ekewe aramas meinisin usun ei manau mi fö.” 21 Iwe, ekewe soukünö ra aleasochisi alon ewe chon läng. Lupwen a ränila ra tolong lon ewe imwenfel o popuetä le afalafal. Lupwen ewe Souasor mi Lap me chiechian kewe ra war, ra körifengeni ekewe souakomwen chon Israel meinisin pwe epwe le fis eu mwichen soupwüng. Mürin ra tinala ekoch chon mas lon ewe imwen fötek, pwe repwe emwenato ekewe soukünö me mwer. 22 Nge lupwen ra tori ewe imwen fötek, resap küna ekewe soukünö. Iei mine ra liwinsefäliti ewe mwichen soupwüng o apworausa ngeniir mine a fis, 23 “Lupwen sia tori ewe imwen fötek, sia küna pwe ekewe asam ra lokola o ekewe chon mas ra masafichi ekewe asamalap. Nge lupwen sia suki ekewe asam, esap wor eman a nom lon.” 24 Iwe, lupwen ekewe souasor mi lap me ewe meilapen chon tümwünü imwenfel ra rongorong ei pworaus, ra mairü ren met a fis ngeni ekewe soukünö. 25 Mürin eman mwän a war o üreniir, “Nengeni, ekewe mwän oua atururelong lon imwen fötek ra nom lon imwenfel o afalafala ekewe aramas.” 26 Iei mine ewe meilap fiti ekewe chon tümwünü imwenfel ra feila o emwenisefälieto ekewe soukünö. Nge resap pöchökül ngeniir, pun ra niuokus ika ekewe aramas repwe mone ngeniir fau. 27 Ra emweniirelong lon ewe imw o aütaar mwen ewe mwichen soupwüng, nge ewe Souasor mi Lap a kapas ais ngeniir. 28 A üreniir, “Äm aia allük pöchökül ngenikemi pwe ousap chüen afalafal mine ei mwän a aiti ngenikemi. Oupwe nengeni met oua föri! Oua achöfetalei ämi afalafal lon unusen Jerusalem, oua pwal ekiekin atipisikem ren än ei mwän mäla.” ✡ Mat 27.25 29 Iwe, Petrus me ekewe ekoch soukünö ra pölüeni, “Äm aipwe chök aleasochisi Kot lap seni äm aleasochisi aramas. 30 Än ach kewe lewo we Kot a amanauasefäli Jesus seni mäla, ätewe oua niela ren ämi chüfölüetä won efoch iräpenges. 31 Nge Kot a atekiatai o anomu lepelifichin pwe epwe Samol me Chon Amanau, pwe epwe awora ekieksefäl me amusamusen tipis ngeni chon Israel. 32 Äm chon pwärätä ekei mettoch pwal Ngünmifel, i ewe Kot a ngeni chokewe mi aleasochis ngeni.”

33 Iwe, lupwen chon ewe mwichen soupwüng ra rong ekei kapas, ra fokun lingeringer, pwe ra ekiekin niela ekewe soukünö. 34 Nge eman Farisi itan Kamaliel, eman Sensen Allük mi wor sufölün me ren ekewe aramas meinisin, a ütä me lon ewe mwichen soupwüng. A allük pwe ekewe soukünö repwe towu lükün lon ekis fansoun mochomoch. 35 Mürin a üreni ewe mwichen soupwüng, “Ämi re Israel, oupwe ekiekifichi mine oupwe föri ngeni ekei mwän. 36 Ekoch ier a la a pwä eman mwän iten Teutas, a apasa pwe i eman souemwen mi lap, iwe, ina epwe ükükün föpükü mwän ra eti. Nge i a ninnila o chokewe meinisin mi chiechi ngeni ra toropasfeil o mine a ekiekin föri a ükütiu. 37 Mürin ei, Jutas eman re Kalilea a pwal pwä lupwen ewe fansoun makkeen it. A atupu eu mwichen aramas pwe repwe tapwela mürin. Pwal i a ninnila, nge chokewe mi eti ra toropasfeil. 38 Iei met üpwe ürenikemi won ei lapalap. Ousap föri och mine epwe ü ngeni ekei mwän. Oupwe likitiirela! Are ar ekiek me ar föför a pop seni aramas, epwe ükütiu, 39 nge are a pop seni Kot, ousap tongeni aüküretiu. Oupwe chök silei pwe oua fiu ngeni Kot.” Iwe, ewe mwichen soupwüng a tipeeu ngeni än Kamaliel we öüröür ngeniir. 40 Iwe, ra köralong ekewe soukünö. Mürin ra allük ngeni ekewe chon mas pwe repwe wichiir, ra pwal pöchökül le fönöü ngeniir, pwe resap fokun chüen afalafal usun iten Jesus. Mürin ra amuseerela. 41 Iwe, ekewe soukünö ra towu seni ewe mwichen soupwüng, ra fokun pwapwa, pun ra tongeni tolong lon riaföü me itengau fän iten Jesus. 42 Iwe, iteiten rän ra sopwela le afalafal lon ewe imwenfel pwal lon imwen aramas o aiti ngeni aramas ewe Pworausen Manau pwe Jesus ewe Kraist.