Paipel FÖFÖR 4
4
Petrus me Johannes ra ü me mwen ewe mwichen soupwüng
4.1-22
Iwe, lupwen Petrus me Johannes ra chüen kakapas, ekewe souasor, ewe meilapen chon tümwünü imwenfel me ekoch Satusi ra war. Ra song pokiten ekewe ruoman soukünö ra afalafala ngeni ekewe aramas pwe Jesus a manausefäl seni mäla, ei a alletätä pwe ekewe mi mäla repwe manausefäl. Iei mine ra turufiir o atururelong lon imwen fötek tori sorotän ewe rän, pun a fen lekuniolula. Nge chomong aramas mi rongorong ngeni ar afalafal ra lükü. Iwe, iteiter fengen meinisin ina epwe ükükün limungeröü mwän.
Iwe, sorotän ewe rän ekewe souemwenin chon Juta, ekewe souakom me ekewe Sensen Allük ra chufengen lon Jerusalem. Anas, ewe Souasor mi Lap, Kaifas, Johannes, Aleksanter me pwal ekoch mwän seni familien ewe Souasor mi Lap ra pwal nom lon ewe mwich. Iwe, ra emwenato Petrus me Johannes me mwer o popuetä le kapas ais ngeniir, “Fän meni manaman ika fän meni it ämi oua föri ei?” Mürin Petrus mi ur ren Ngünmifel a pölüeniir, “Ämi souemwenin ekewe aramas me souakom: Are ämi oua atittinakem usun ewe föför mi mürina aia föri ngeni ewe mwän mi pechemä o ifa usun an küna pöchökül, 10 mürin ämi meinisin oupwe silei, pwal ekewe chon Israel meinisin repwe silei, pwe ei mwän mi ütä mwemi ikei a wesewesen pöchökül ren manamanen iten Jesus Kraist seni Nasaret, ätewe oua iräpengesi, nge Kot a amanauasefäli seni mäla. 11 Iwe, Jesus i ätewe ekewe Toropwe mi Pin ra kapas usun,
‘Ewe fau ekewe chon kaü imw ra pöütala
a wiliti eföü fau mi fokun aüchea seni meinisin.’ Kölf 118.22 12 Aramas repwe küna manau ren Jesus chök. Pun esap fokun wor pwal eu it won fanüfan Kot a ngeni aramas, pwe sipwe küna manau ren.”
13 Iwe, chon ewe mwichen soupwüng ra mairü lupwen ra küna än Petrus me Johannes pworacho, ra pwal silei pwe ir aramas resap fiti sukul. Iwe, ra mefi pwe ir fen chiechien Jesus. 14 Nge esap wor och mine repwe tongeni apasa, pun ra küna ewe mwän mi pöchökületä o ü ikenan ren Petrus me Johannes. 15 Iei mine ra üreniir, pwe repwe towu seni ewe ruum ia chon ewe mwichen soupwüng ra mwich ie. Mürin ra pwüngüpwüngfengen lefiler. 16 Iwe, ra ais, “Met sipwe föri ngeni ekei mwän? Aramas meinisin lon Jerusalem ra silei pwe ei manaman mi fokun amwarar a fis rer, nge sisap tongeni aopala. 17 Nge iei met sipwe föri, pwe ei pworaus esap chöfetal lein aramas. Sipwe fönöü ngeni ekei aramas, pwe resap fokun chüen kapas ngeni eman aramas usun ewe it Jesus.” 18 Mürin ra körisefäliirelong o allük ngeniir, pwe resap fokun kapas ika afalafal usun ewe it Jesus. 19 Nge Petrus me Johannes ra pölüeniir, “Oupwe püsin apwüngü are a pwüng mwen mesen Kot ach sipwe aleasochis ngenikemi mwen ach aleasochisi Kot. 20 Pun äm aisap tongeni ükütiu le kapas won met aia püsin küna o rongorong.” 21 Iwe, chon ewe mwichen soupwüng ra fokun pöchökül le eniwer, pwe resap chüen afalafal, mürin ra amuserela. Resap küna och popun mine repwe ariaföüür ren, pun ekewe aramas ra mwareiti Kot ren mine a fis. 22 Pun ierin ewe mwän mi pöchökületä ren ewe manaman a fen lap seni faik ier.
Än ekewe chon lükü iotek
4.23-31
23 Lon ewe chök otun Petrus me Johannes ra ngasala, ra liwiniti ar we mwich o apworausa ngeniir meinisin mine ekewe souasor mi lap me ekewe souakom ra üreniir. 24 Iwe, lupwen ekewe chon lükü ra rong ei pworaus, ir meinisin ra tipeeufengen le iotek ngeni Kot: “Äm Samol, en ka föri läng me fanüfan me matau o meinisin mine a nom lor! Eks 20.11; Ne 9.6; Kölf 146.6 25 Fän emwenien Ngünmifel en ka kapas ren äm we lewo Tafit, noumw chon angang lupwen a apasa,
‘Pwota ekewe chon lükün Israel ra fokun lingeringer?
Pwota chon ekewe mwü ra föri ar raw mi lomotongau?
26 Ekewe kingen fanüfan ra amoleeretä,
nge ekewe samol ra chufengen pwe repwe ü ngeni ewe Samol me nöün we Kraist.’ Kölf 2.1-2 27 Pun iei usun mine a fis: Herotes me Pontius Pilatus ra mwichfengen me ekewe chon lükün Israel me ekewe aramasen Israel lon ei telinimw ar repwe ü ngeni Jesus noumw Chon Angang mi pin, ätewe en ka epiti. Mat 27.1-2; Mark 15.1; Luk 23.1,7-11; Joh 18.28-29 28 Ra chufengen ar repwe föri meinisin mine en ka fen akota fän om manaman me letipom an epwe pwönüetä. 29 Äm Samol, iei kopwe ekieki ar kapasen eniweniw o atufichi noumw kei chon angang pwe repwe afalafala om kapas fän pwora. 30 Kopwe pwärala om pöchökül pwe chon samau repwe pöchökületä, kopwe mwütätä pwe asisil me manaman repwe fis ren iten Jesus noumw we Chon Angang mi pin.” 31 Iwe, lupwen ra wes le iotek ewe leni ia ra mwichfengen ie a mwökütüküt. Ir meinisin ra urela ren Ngünmifel o ra popuetä le asilefeili än Kot kapas fän pwora.
Ekewe chon lükülük ra alilisfengen won pisekir
4.32-37
32 Iwe, ewe mwichen chon lükü Jesus ra ekiekeu me tipeeu. Esap fokun wor eman leir epwe apasa, pwe mine a wor ren epwe an chök, nge ra alilisfengen lefiler won meinisin mine ra eäni. Föf 2.44-45 33 Fän manaman mi lapalap ekewe soukünö ra pwärätä pwe ewe Samol Jesus a manausefäl seni mäla, o Kot a fokun afeiöchüür meinisin. 34 Esap fokun wor eman me lon ewe mwich a osupwang. Chokewe mi wor fanüer ika imwer ra amömörela, nge ewe moni ra angei fän iten fanüer are imwer ra uwato 35 o ngeni ekewe soukünö. Iwe, ei moni ra aineti ngeni eman me eman leir won ükükün mine a osupwang ren.
36 Iwe, a wor eman mwän itan Josef seni ewe ainangen Lefi, a uputiu lon ewe fanü Saipros, ekewe soukünö ra pwal aita ngeni Parnapas (wewen ei it: Eman mi apöchöküla letipen aramas). 37 Ätei a amömöla fanüan, nge liwinin ei fanü a uwato o ngeni ekewe soukünö.

4:11: Kölf 118.22

4:24: Eks 20.11; Ne 9.6; Kölf 146.6

4:26: Kölf 2.1-2

4:27: Mat 27.1-2; Mark 15.1; Luk 23.1,7-11; Joh 18.28-29

4:32: Föf 2.44-45