Paipel 2 TIMOTY 2
2
Eman nöün Kraist Jesus sounfiu mi allükülük
2.1-13
Iwe, en nei, kopwe pöchökül ren ewe ümöümöch mi nom lon Kraist Jesus. Met ka rongorong seniei pwe üa afalafala me mwen chomong chon pwärätä, kopwe lükü ngeni ätekewe mi allükülük o tufichin asukula pwal ekewe ekoch souläng.
Kopwe molotä om kopwe pwal tolong lon riaföü usun eman nöün Kraist Jesus sounfiu mi allükülük. Eman sounfiu mi föri wisan a mochen föri met an samol epwe pwapwa ren, nge esap pachelong lon sokun angangen manauen aramas. Eman chon kitir mi sä lon eu kitir esap tongeni angei winnan, are esap aleasochisi allükün kitir. Eman chon tanipi mi föri an angang weires epwe akomwen angei wisan seni uän ewe räs. Kopwe ekieki usun mine üa apasa, pun ach Samol epwe atufichuk om kopwe weweiti ekei mettoch meinisin.
Kopwe chechemeni Jesus Kraist, ewe mi manausefäl seni mäla, i eman mwirimwirin Tafit, usun a pwäla lon ai afalafala ewe Pworausen Manau. Pokiten ngang üa afalafala ewe Pworausen Manau, üa tolong lon riaföü, üa fen mwo nge föfö ngeni selimächä usun eman chon föföringau. Nge än Kot kapas esap föfö. 10 Iei mine üa likitü lon ekei riaföü meinisin fänäsengesin nöün Kot kewe mi fil, pwe pwal ir repwe küna ewe manau a nom lon Kraist Jesus me ewe ling esemüch. 11 Iei eu fos mi let:
“Are sia eti Kraist le mäla,
sipwe pwal eti i lon an manau.
12 Are sia likitü, sipwe eti i lon an nemenem.
Are sia amamäsini i, i epwe pwal amamäsinikich. Mat 10.33; Luk 12.9
13 Are sisap allükülük, i epwe chök nonom lon an allükülük,
pun i esap tongeni siwili sokun.”
Eman nöün Kraist chon angang Kot a tipeeu ngeni
2.14-26
14 Iwe, kopwe achema ngeni noum kewe aramas ekei mettoch o allük ngeniir mwen mesen Kot, pwe resap anini won kapas, pun esap wor lomotan, nge a chök afeiengaua aramas mi aüseling ngeni. 15 Kopwe fokun achocho ngeni pwe Kot epwe tipeeu ngenuk, pwe kopwe eman chon angang esap säw ren an angang, pun ka afalafala än Kot kapas mi let fän pwüng. 16 Kopwe afäluk seni ekewe kapas mi ngau me ekewe kapasen anini mi lomotongau, ra chök atoauala aramas seni Kot. 17 Pun ekei sokun afalafal ra usun chök ruup mi enala fituk. Ruoman mwän, Himenäus me Filetus, ra afalafala ekei kapas. 18 Ra tokola seni mine a let ren ar afalafala pwe a fen fis manausefälin sotup kana, iwe, ra atai än ekoch souläng lükülük. 19 Nge ewe longolong mi nükünük Kot a anomu esap tongeni mwökütüküt. A mak won ei longolong ekei kapas: “Ach Samol a silei chokewe ir nöün,” a pwal mak “Iö a apasa pwe i nöün ach Samol epwe fokun kul seni föföringau.” Num 16.5
20 Iwe, lon eu imw mi watte a wor sokopaten sepi: ekoch ra för seni silifer me kolt, nge pwal ekoch ra för seni mwüch me pwülüpar. Ekoch sepi ra aea fän iten rän mi aüchea, nge ekoch ra aea fän iten iteiten rän. 21 Are eman aramas a püsin limeti seni ekana sokun lapalap mi ngau, i epwe eu pisekin aea fän iten ekoch popun mi aüchea, pun a pin o lomot fän iten an Samol, a molotä pwe epwe eu pisekin aea fän iten föför mürina meinisin. 22 Kopwe sü seni tipen alüal, nge kopwe fokun achocho ngeni om kopwe eäni pwüng, lükülük, chen me kinamwe, fiti chokewe meinisin mi köri iten ach Samol ren eu leluk mi limöch. 23 Kopwe afäluk seni ekewe kapasen anini mi umwes o lomotongau, pun ka silei pwe ra chök afisätä fitikoko. 24 Eman nöün ach Samol chon angang esap fokun anini, nge epwe kirikiröch ngeni aramas meinisin, epwe lipwäköch le asukula aramas fän mosonotam, 25 epwe pwal tipepwetete lon an fönöü chokewe mi ü ngeni, pun eli epwe fis pwe Kot epwe ngeniir tufichin ar repwe ekieksefäl, pwe repwe silei ewe let. 26 Mürin repwe miritila o sü seni ewe särin Tefil mi liapeniir, pwe repwe föri letipan.

2:12: Mat 10.33; Luk 12.9

2:19: Num 16.5