3
Paulus a tüngor pwe ekewe souläng repwe iotek fän iter
3.1-5
Iwe, ämi pwiim kana, oupwe iotek fän item, pwe än ewe Samol kapas epwe müttir chöfetal o aramas repwe etiwa fän ar suföl, usun chök a fen fisitä lefilemi. Oupwe pwal iotek, pwe Kot epwe angasakem seni ekewe aramas mi ngau me kirikiringau. Pun sap aramas meinisin ra lükü ewe kapas. Nge ach Samol a allükülük, i epwe apöchökülakemi o tümwünükemi seni ewe mi ngau. Iwe, äm aia apilükülük ngeni ach Samol fänäsengesimi pwe oupwe apwönüetä o sopwela le föri meinisin mine aia allük ngenikemi. Ach Samol epwe emweni letipemi ngeni än Kot chen, pwal ngeni än Kraist tipeppos.
Wisach pwe sipwe angang
3.6-15
Ämi pwiim kana, äm aia allük ngenikemi fän iten ach Samol Jesus Kraist pwe oupwe aimwükemi seni ekewe pwipwi meinisin mi chipwang le angang, resap pwal aleasochisi ekewe kapasen öüröür aia ngeniir. Ämi oua fokun silei pwe oupwe chök föri usun mine aia föri. Äm aisap chipwang le angang lupwen aia nonom remi, aisap pwal angei anem mongö ika aisap isetiu liwinin. Nge aia achocho le angang lerän me lepwin fän weires, pwe aisap aweiresikemi. Aia föri ei, sap pokiten esap wor äm pwüüng äm aipwe angei äm alilis senikemi, nge aia föri ei pwe aipwe eu lenien apirü fän itemi. 10 Pun lupwen aia nom remi aia ükürenikemi, “Iö esap mochen angang esap pwal tongeni mongö.”
11 Aia apasa ei pun aia rongorong pwe ekoch me leimi ra chipwang le angang, resap föri och, chilon chök pwe ra angelong lon än eman angang. 12 Fän iten ach Samol Jesus Kraist äm aia allük ngeni ekei aramas o fönöör, pwe repwe manauöch o föri ar angang pwe epwe wor liwinin aner mongö. 13 Nge ämi pwiim kana, ousap fokun chipwangela lon ämi föföröch. 14 Are eman esap mochen aleasochisi äm kewe kapasen öüröür mi mak lon ei toropwe, oupwe asilla i. Ousap chiechi ngeni, pwe epwe mefi an säw. 15 Nge ousap föri ngeni usun itä nge i eman oua oputa, nge oupwe fönöü usun chök eman pwiimi.
Kapasen lesopolan
3.16-18
16 Ach Samol, i popun ach kinamwe, epwe püsin ngenikemi kinamwe fansoun meinisin pwal ekis meinisin. Ach Samol epwe nonom remi meinisin. 17 Ngang Paulus üa makkei ekei kapasen kapong ren püsin pei. Iei usun ai saini ekewe toropwe meinisin. Iei usun ai mak. 18 Ümöümöchün ach Samol Jesus Kraist epwe nonom remi meinisin.