Paipel 2.SAMUEL 17
17
Husai a atai än Ahitofel öüröür
17.1-23
Mürin, Ahitofel a üreni Apsalom, “Kopwe mwüt ngeniei üpwe filätä engol me ruungeröü mwän, pwe üpwe feila o tapweri Tafit lepwinei. Iwe, aipwe rangeiti, lupwen a malülü o tipemösök, üpwe atolonga lon niuokus watte, nge ekewe aramas meinisin mi nom ren repwe süla. Üpwe chök niela ewe king, nge ekewe aramas meinisin üpwe emwenisefälireto reöm, usun eman a emwenato eman fin apwüpwülüsöfö ren pwülüan. Ka kütta manauen eman chök mwän, nge ekewe aramas meinisin repwe kinamwe.” Iwe, ei öüröür a mürina me ren Apsalom me ekewe souakomwen Israel meinisin.
Mürin, Apsalom a üra, “Oupwe pwal körato Husai ewe re Ark, pwe sipwe rongorong mine i epwe apasa.” Lupwen Husai a feito, Apsalom a üreni, “Iei usun mine Ahitofel a eäni öüröür. Ifa usun, sipwe föri mine Ahitofel a apasa? Ika ap, en kopwe apasa mine aipwe föri.” Mürin, Husai a üreni Apsalom, “Än Ahitofel we öüröür esap öch lon ei fansoun.” A pwal üra, “Ka silei pwe semom me nöün kewe mwän ra fokun pwora. Ra rochongau usun eman pear a rochongau, lupwen eman a angei seni nöün me lemäl. Pwal eu, semom a sip le maun, esap tongeni nom ren ekewe sounfiu lepwin. Eli lon ei fansoun a op lon eu pwang ika lon pwal ekoch leni. Nge lupwen ekoch me lein noum kewe sounfiu repwe mäla lepoputän ewe maun, ir mi rongorong usun repwe apasa, ‘Mi wor eu ninni me lein ekewe aramas mi tapwela mürin Apsalom.’ 10 Mürin epwe fis pwe pwal ekewe mwän mi fokun pwora, leluker a usun chök leluken eman laion, epwe fokun kisikisila letiper ren niuokus. Pun chon Israel meinisin ra silei pwe semom eman soumaun, nge chokewe mi eti ra pwora. 11 Nge iei ai öüröür ngonuk. Kopwe emwichato reöm chon Israel meinisin seni Tan tori Persepa, pwe repwe usun chök pien aroset ren chomongur, nge en kopwe akom mwer le feila maun. 12 Mürin sipwe maun ngeni Tafit me lon ekewe leni ia a nom ie, sipwe anifeto won usun amurenipwin a püngütiu won pwül. Iwe, i me ekewe mwän mi eti esap wor eman leir epwe chüen manau. 13 Nge are epwe tolong lon eu telinimw, chon Israel meinisin repwe uwato säl o üri ewe telinimw ngeni ewe lemol tori esap chüen wor emök fau epwe nom lon ewe leni.” 14 Iwe, Apsalom me ekewe re Isarel meinisin ra üra, “Än Husai öüröür a mürina seni än Ahitofel öüröür.” Pun ewe Samol mi Lapalap a filätä pwe epwe atai än Ahitofel we öüröür mi mürina o uwato feiengau won Apsalom.
15 Mürin, Husai a üreni ekewe souasor Satok me Apiatar, “Iei än Ahitofel öüröür a öüra ngeni Apsalom me ekewe souakomwen Israel, nge pwal iei ai we öüröür ngeniir. 16 Iei mine oupwe müttir tinala eman pwe epwe üreni Tafit: Lepwinei kosap nonom ren ekewe petepeeten ewe chanpupu mi tori ewe fanüapö, nge kopwe fokun feila pekilan ewe chanpupu Jortan, pwe en me ekewe aramas meinisin mi etuk ousap feiengau.” 17 Nge Jonatan me Ahimas ra witiwit lon Enrokel, pun resap mochen eman epwe küna ar repwe tolong lon ewe telinimw. Iwe, eman chon angang fefin a wisen uwei ngeniir pworaus, nge ir ra wisen uwei ngeni ewe king Tafit ekewe pworaus. 18 Nge eman ät a küneer o asile ngeni Apsalom. Iei mine ir me ruoman ra müttir feila o tolong lon imwen eman mwän lon Pahurim, ätewe a wor eu chönüttu lükün imwan. Iwe, ra tolong lon ewe chönüttu, 19 nge pwülüen ewe mwän a ameresala echö pwölüpwöl won awen ewe chönüttu o atoropasa föün wiich won, pwe esap wor eman a tongeni silleni pwe a wor aramas lon. 20 Lupwen nöün Apsalom kewe chon angang ra feito ren ewe fefin lon ewe imw, ra aisini, “Ikafair Ahimas me Jonatan?” Nge ewe fefin a üreniir, “Ra fen süla pekilan ewe öüwö.” Iwe, ra kütteer nge resap küneer, iei mine ra liwiniti Jerusalem.
21 Iwe, mürin ar feila, Jonatan me Ahimas ra tötä me lon ewe chönüttu, ra feila o apworausa ekewe pworaus ngeni ewe king Tafit. Ra üreni Tafit, “Kopwe ütä o müttir feila pekilan ewe chanpupu, pun iei än Ahitofel we öüröüren afeiengau fän itom.” 22 Iei mine Tafit me ekewe aramas meinisin mi eti ra feila pekilan ewe chanpupu Jortan. Iwe, lupwen a ränila, ir meinisin ra tori pekilan.
23 Nge lupwen Ahitofel a mefi pwe resap aleasochisi an öüröür, a rietä an lenien mot won waan aas o feila lon imwan lon puputän an telinimw. Iwe, a akotöchü lon imwan, mürin a forusala. Iei usun Ahitofel a mäla, nge ra peiaseni lon peiasen saman we.
Tafit a nom lon Mahanaim
17.24-29
24 Lupwen Tafit a tori Mahanaim lon chök ei otun, Apsalom a feila pekilan ewe chanpupu Jortan fiti ekewe re Israel meinisin. 25 Iwe, Apsalom a seikätä Amasa pwe epwe meilapen ewe mwichen sounfiu lon lenien Joap. Amasa nöün eman re Ismael mwän itan Jeter, a pwülüeni Apikail nöün Nahas we föpwül pwin Seruia inen Joap. 26 Iwe, Apsalom me ekewe chon Israel ra nonom lon ewe fanü Kiliat.
27 Iwe, lupwen Tafit a tori Mahanaim, Sopi nöün Nahas we mwän seni Rapa telinimwen chon Amon, me Makir nöün Amiel we mwän seni Lotepar, pwal Parsilai ewe re Kiliat seni Rokelim ra churi. 28 Ra uwato kieki, sepi me sokopaten sepi mi för seni pwül, pwal wiich, parli, pilawa mi amas, föün wiich mi tün, mame me sokopaten mame, 29 chönün chunen, soon milik me sip, pwal chiis seni kow. Ekei mongö meinisin ra uwato fän iten Tafit me ekewe aramas mi eti, pwe repwe mongö. Pun ra silei pwe ekewe aramas ra echik me kaka pwal malülü me lon ewe fanüapö.