Paipel 2.KING 11
11
Atalia a töpöchökülelong lon lenien nemenem
11.1-21
(2.Kron 22.10–23.15)
Iwe, lupwen Atalia inen Ahasia a silei pwe nöün we a ninnila, a allük pwe chon familien ewe king meinisin repwe ninnila. Nge Jehosepa nöün ewe king Jehoram fefin, fefinen Ahasia, a angei Joas nöün Ahasia we ät lemonomon seni lein nöün ewe king kewe mwän repwe ninnila. Iwe, a aopalong ewe ät me nöün chon tümwün lon eu lenien iseis peet. Iei usun Jehosepa a aopala Joas seni Atalia, pwe esap ninnila. Iwe, Joas a nom ren Jehosepa lon ükükün wonu ier, nge a op lon imwen ewe Samol mi Lapalap, lupwen Atalia a nemeni ewe fanü.
Nge lon ewe afisuen ier, ewe souasor Jehoiata a titi ekewe meilapen chon tümwünü ewe imwen king, pwe repwe feito ren lon imwen ewe Samol mi Lapalap. Iwe, a pesei ngeniir pwe repwe tipeeu ngeni an ekiek o pwon fän akapel me lon imwen ewe Samol mi Lapalap. Mürin a pwäri ngeniir nöün ewe king Ahasia we ät. Iwe, a allük ngeniir, “Iei usun mine oupwe föri: Eu leülüngat me leimi mi popuetä ar angang lon ewe ränin sapat repwe mamasa imwen ewe king, eu leülüngat repwe mamas lon ewe asamalap Sur, nge eu leülüngat repwe mamas lon ewe asamalap lükisökürün ekewe chon mas. Nge ekewe ruu mwich me leimi mi wes le angang lon ewe ränin sapat repwe mamasa imwen ewe Samol mi Lapalap o tümwünü ewe king. Iwe, oupwe ütä pwelin ünükün ewe king, eman me eman fän an pisekin maun. Nge iön a mochen atalong ämi tettel epwe ninnila. Oupwe eti ewe king ekis meinisin ia epwe feila ie.”
Iwe, ekewe meilap ra föri mine ewe souasor Jehoiata a allük ngeniir. Ra emwenato ren Jehoiata nöür kewe aramas, chokewe mi wes le angang lon ewe ränin sapat, pwal chokewe mi popuetä ar angang. 10 Nge ewe souasor Jehoiata a atowu ngeni ekewe meilap ekewe siles me tittin maun än ewe king Tafit mi nom lon imwen ewe Samol mi Lapalap. 11 Iwe, ekewe chon mas ra ütä pwelin ünükün ewe king fän ar pisekin maun, ra tettel arun ewe rongen asor me ewe imwenfel seni peliörün ewe imwenfel tori peliefengin. 12 Mürin, Jehoiata a emwenawu Joas nöün ewe king we ät, a isetä epa mwärämwär won möküran o ngeni ewe puken allük. Iwe, ra awisa ngeni ewe wisen king o epiti. Nge ekewe aramas ra alopolop o kökkö, “Ewe king epwe manauatam.”
13 Iwe, lupwen Atalia a rongorong akürangen ekewe chon mas me ekewe aramas, a feila lon imwen ewe Samol mi Lapalap ren ekewe aramas. 14 Lupwen a nenefetal, a küna ewe king a ütä ren ewe ür usun pwüngün örünier, nge ekewe meilap me ekewe chon ettik rappwa ra nom unükün. Iwe, aramasen ewe fanü meinisin ra mweireir o ettiki rappwa. Nge Atalia a kamwei üfan o puchör, “A fis rawangau, a fis rawangau!” 2.King 23.3 15 Mürin, ewe souasor Jehoiata a allük ngeni ekewe meilap mi nemeni ewe mwichen sounfiu, “Oupwe emwenawu neminewe lefilen ekewe chon mas mi tettel, nge are eman a tapwela mürin, oupwe niela ren ketilas.” Pun ewe souasor a üra, “Neminewe esap ninnila lon lenien ewe Samol mi Lapalap.” 16 Iei mine ra turufi neminewe, ra emwenalong lon asamalapen imwen ewe king, ia ekewe oris ra tolong me ie, o pwerela ngeni ewe imwen king. Ikenan ra niela ie.
17 Iwe, ewe souasor Jehoiata a föri eu pwon lefilen ewe Samol mi Lapalap me ewe king pwal ekewe aramas, pwe repwe nöün ewe Samol mi Lapalap aramas. A pwal föri eu pwon lefilen ewe king me ekewe aramas. 18 Mürin, aramasen ewe fanü meinisin ra tolong lon imwen ewe anü Paal o ataetiu. Ra atatakisi ekewe rongen asor me ekewe uluulun anü, ra pwal niela Matan nöün Paal we souasor me mwen ekewe rongen asor. Iwe, ewe souasor Jehoiata a anomu chon mas, pwe repwe mamasa imwen ewe Samol mi Lapalap. 19 Mürin, Jehoiata me ekewe meilapen sounfiu, ekewe chon tümwünü ewe king me ekewe chon tümwünü ewe imwen king pwal aramasen ewe fanü meinisin ra etala ewe king seni imwen ewe Samol mi Lapalap, ra pwerelong lon asamalapen ekewe chon mas tori imwen ewe king. Nge Joas a mottiu won ewe lenien motun king. 20 Iwe, aramasen ewe fanü meinisin ra meseik. Nge ewe telinimw a kinamwe mürin än Atalia ninnila ren ketilas me arun ewe imwen king.
21 Iwe, Joas a ierini fisu, lupwen a tolong lon wisan wisen king lon Juta.

11:14: 2.King 23.3