Paipel 2.KING 7
7
Elisa a pälüeni, “Oupwe aüselinga alon ewe Samol mi Lapalap. Lesor lon ei chök otun oua tongeni kamö lon ei telinimw Samaria engol paun pilawa mi amas o mürina, ika rüe paun föün parli won ükükün eföü föün moni silifer.” Mürin, ewe meilap, ätewe mi wisen tümwünü ewe king, a üreni Elisa, “Inamwo are ewe Samol mi Lapalap epwe püsin suki asammwachon läng o tinato mongö, ei mettoch esap tongeni fis.” Nge Elisa a üreni, “Kopwe püsin küna ren mesom, nge kosap mongö seni.”
Iwe, a wor föman mwän mi rupun pwötür, ra nom lükün asamalapen ewe tittin Samaria. Ra kapasfengen lefiler, “Pwota sipwe chök momot ikei tori sipwe mäla? Are sa filätä pwe sipwe tolong lon ewe telinimw, kich sipwe mäla ikenan, pun a wor lengita lon. Nge ika sipwe nom ikei, sipwe pwal mäla. Iei mine sipwe feila lon lenien sounfiun Siria. Are repwe amanauakich, sipwe manau, nge are repwe nikich, sipwe chök mäla.” Iei mine ra ütä lekuniolupwin o feila lon lenien ekewe sounfiun Siria. Nge lupwen ra tori lesopun lenier we, esap fokun wor eman a nom ikenan. Pun ewe Samol a föri pwe ekewe sounfiun Siria ra rongorong chopuchopun woken me oris, pwal akürangen eu mwichen sounfiu mi watte. Iei mine ra kapasfengen lefiler, “Ewe kingen Israel a möni ekewe kingen chon Hit me ekewe kingen Isip fiti nöür sounfiu, pwe repwe feito o maun ngenikich.” Iei mine ra süla lekuniolupwin o likitala imwer imw mangaku, nöür oris me nöür aas. Ra chök likitala lenier o kütta manauer. Nge lupwen ekewe mi rupun pwötür ra tori lesopun lenien ekewe sounfiu, ra tolong lon eu imw mangaku. Ra mongö o ün, ra pwal angei silifer me kolt me üf, ra feila o aopeer. Mürin, ra liwinto o tolong lon pwal eu imw mangaku, ra angei ekewe pisek lon, ra feila o aopeer.
Mürin, ekewe mi rupun pwötür ra kapasfengen lefiler, “Esap pwüng mine sa föri. Ei rän eu ränin pworaus mi mürina. Are sa ekieki ngenikich echök o witiwit tori lesosor, feiengau epwe torikich. Iei mine sipwe feila iei chök o apworausa ei pworaus ngeni nöün ewe king kewe meilapen sounfiu.” 10 Iei mine ra feito ren tittin ewe telinimw o kökkötä ren ekewe chon masen ewe asamalap, “Äm aia tori lenien ekewe sounfiun Siria, nge aisap küna eman ika rongorong mwelien eman. A chök wor oris me aas mi föfö, pwal ekewe imw mangaku.” 11 Mürin, ekewe chon mas ra kökkölong lon ewe telinimw o apworausa ei pworaus, ra pwal aronga ngeni chon leimwen ewe king. 12 Iwe, ewe king a pwätä lon ewe chök pwin o üreni nöün kewe nöüwis, “Üpwe ürenikemi mine ekewe chon Siria ra ekiekin föri ngenikich. Ra silei pwe kich sa echik. Iei mine ra likitala lenier, ra feila o op lon ewe fanü mi amassawa. Pun ra ekieki, pwe lupwen sipwe towu seni ewe telinimw o küt mongö, repwe turumanaueekich o tolong lon ewe telinimw.” 13 Nge eman me lein ekewe nöüwis a üra, “Sipwe tinala ekoch mwän, repwe angei limman oris seni ekewe mi chüen manau, pwe repwe feila o pii mine a fis. Pun ekewe aramas mi chüen manau ikei, repwe pwal feiengau usun chök chokewe mi fen mäla.” 14 Iei mine ra filätä ekoch mwän, nge ewe king a tinirela won ruofoch woken fiti oris, pwe repwe atapwa ekewe sounfiun Siria o pii mine a fis. 15 Iei mine ra atapwa ekewe sounfiun Siria tori ewe chanpupu Jortan. Nge won ewe al ra küna üf me pisek ekewe sounfiun Siria ra aturätiu, lupwen ra müttir le sü. Iwe, ekewe chon künö ra liwinto o apworausa ngeni ewe king mine ra küna.
16 Mürin, ekewe aramas ra towu seni ewe telinimw o cheri ewe lenien sounfiun Siria, pwe repwe angang pisek. Iwe, liwinin engol paun pilawa mi amas o mürina, ika rüe paun föün parli ükükün eföü föün moni silifer, usun ewe Samol mi Lapalap a fen apasa. 17 Nge ewe king a awisa ewe meilap, ätewe mi wisen tümwünü ewe king, pwe epwe tümwünü asamalapen tittin ewe telinimw. Iwe, ekewe aramas ra ipwetä won me lon ewe asamalap pwe a mäla, usun ewe soufos Elisa a fen apasa, lupwen ewe king a feito ren. 18 Pun lupwen Elisa a üreni ewe king, pwe lesor lon ei chök otun liwinin engol paun pilawa mi amas o mürina, ika rüe paun föün parli epwe ükükün eföü föün moni silifer me lon ei telinimw Samaria, 19 ewe meilap a pälüeni Elisa, “Inamwo are ewe Samol mi Lapalap epwe püsin suki asammwachon läng o tinato mongö, ei mettoch esap tongeni fis.” Nge Elisa a üreni, “Kopwe püsin küna ren mesom, nge kosap mongö seni.” 20 Iwe, iei usun a chök fis ngeni ewe meilap, pun ekewe aramas ra ipwetä won me leasamalapen tittin ewe telinimw pwe a mäla.