Paipel 2 KORINT 13
13
Än Paulus kapasen fön me kapasen lesopolan
13.1-10
Iwe, iei aülüngatin fansoun ai üpwe feila churikemi. Usun a mak lon ekewe Toropwe mi Pin, “A chök fis allükülükün tipisin eman are a wor ruoman ika ülüman chon pwärätä.” Tut 17.6; 19.15 Üa fen ürenikemi me mwan lupwen üa nom remi aruen fansoun, nge iei üpwe pwal aliwinisefäli ngenikemi ai kewe kapas lupwen üa toau senikemi: Lupwen üpwe liwinsefälitikemi üpwe fokun apwüngü chokewe mi tipis me mwan ika pwal ekewe ekoch, pun oua kütta och minen pwärätä pwe Kraist a kapas me rei. I esap apwangapwang lon an angang ngenikemi, nge a pwärätä an manaman leimi. Pun inamwo ika Kraist a iräpenges lon an apwangapwang, nge a manau ren än Kot manaman. Pwal äm aia apwangapwang lon Kraist, nge ren manamanen Kot aipwe eti Kraist le manau, pwe aipwe angang ngenikemi.
Oupwe püsin sotunikemi o apwüngükemi, pwe oupwe silei ika oua wesewesen lükü Kraist. Ifa usun, ousap silei pwe Jesus Kraist a nonom lomi? Are ousap silei, oua lipwäkingau lon ewe sosot. Üa apilükülüköch pwe oua silei pwe äm aisap lipwäkingau. Nge aia tüngor ngeni Kot pwe ousap föri mine a mwäl, sap fän iten an epwe pwä äm lipwäköch, nge fän iten ämi oupwe föri mine a mürina, inamwo ika usun itä nge äm aia lipwäkingau. Pun äm aisap tongeni föri och mine epwe tongeni ü ngeni ewe let, nge äm aia chök tongeni föri met epwe alisi ngeni. Äm aia pwapwa lupwen aia apwangapwang, nge ämi oua pöchökül. Iei mine aia iotek pwe ämi oupwe unusöchüla lon ämi souläng. 10 Iei popun üa makkei ekei toropwe lupwen üa toau senikemi, pun lupwen üpwe wareitikemi üsap mochen pöchökül ngenikemi lon ai üpwe aea ewe pwüüng ach Samol a ngeniei, ewe pwüüng üpwe aea le apöchöküla ämi souläng, nge üsap aea le atai ämi souläng.
Kapongen lesopolan
13.11-13
11 Ämi pwii kana, iei lesopolan mine üa makkei lon ei toropwe. Kot epwe etikemi. Oupwe achocho ngeni ämi oupwe unusöch lon ämi souläng. Oupwe aleasochis ngeni ai kewe kapasen öüröür. Oupwe tipeeufengen lefilemi, oupwe kinamwefengen. Iwe, ewe Kot mi echenikich o ngenikich kinamwe epwe nonom remi. 12 Oupwe kapongfengen lefilemi ren ewe kapongen souläng. 13 Ekewe chon pin meinisin ra kapong ngenikemi. 14 Ümöümöchün ach Samol Jesus Kraist me än Kot chen me chiechifengenin Ngünmifel epwe nonom remi meinisin.

13:1: Tut 17.6; 19.15