Paipel 2 KORINT 12
12
Mine Kot a aküna ngeni Paulus o pwäri ngeni
12.1-10
Iwe, üpwe chök sopwela le aingaing, inamwo ika esap wor lomotan. Nge iei üpwe kapas usun mine ach Samol a aküna o pwäri ngeniei. Ngang üa silei eman aramas lon Kraist, engol me rüanü ier a la a feitä o tori ewe aülüngatin sässärin läng. Üsap silei ika a nom ikenan lon inisin ika lon ngünün, Kot chök a silei. Üpwe apasasefäli, üa silei pwe ei mwän a feitä o nom lon Paratis, üsap silei ika a nom ikenan lon inisin ika lon ngünün, Kot chök a silei. Ikenan a rongorong sokun kapas esap wor eman a tongeni apasatä, esap mwümwü ngeni eman an epwe kapas usun. Iwe, üpwe aingaing won ei aramas, nge üsap aingaing won püsin ngang, pwe won chök ekewe mettoch mi pwärätä ai apwangapwang. Are üa mochen aingaing, üsap eman aramas ese wor an mirit, pun üpwe kapas won mine a let. Nge üsap mochen aingaing, pun üsap mochen pwe eman epwe ekieki ngeniei pwe üa tekia seni mine a küna rei ika rongorong seniei.
Pwe üsap fokun lamalamtekia ren chomongun ekewe mettoch mi amwarar üa küna lon künaei we, Kot a ngeniei eu samau üa fokun metek ren usun itä nge eman nöün Satan chon künö a wichiei, pwe üsap lamalamtekia. Fän ülüngat üa iotek ngeni ach Samol usun ei o tüngor ngeni pwe epwe angei seniei. Nge a pölüeniei, “Ai ümöümöch a naf ngonuk, pun ai manaman a fokun unusöchüla lon om apwangapwang.” Iei mine üa fokun pwapwa lon ai aingaing won ai apwangapwang, pwe ewe manamanen Kraist epwe tümwünüei. 10 Iei mine üa pwapwa lon ai apwangapwang, lon ai küna turunufas, lon ai weires, lon ai ninni, pwal lon ai riaföü fän iten Kraist. Pun lupwen üa apwangapwang, ngang üa pöchökül.
Paulus a öüreki ekewe souläng lon Korint
12.11-21
11 Ngang üa föri föförün eman esap mirit, nge ämi oua arianiei, pwe üpwe föri iei usun. Ämi ätekewe oupwe aitöchüei. Inamwo ika ngang üa aücheangau, üsap fokun kis seni nöümi kana “soukünö mi lap”. 12 Ekewe asisil me manaman me sokun föför mi amwarar ra fis lefilemi fän watten mosonotam ra alletätä pwe ngang eman soukünö. 13 Pun ren met a kis ämi feiöch seni ekewe ekoch mwichefel, nge eu chök pwe üsap aweiresikemi pwe oupwe ngeniei och alilis? Ouse mochen oupwe amusala ai mwäl.
14 Iei üa amolätä ai üpwe churikemi lon aülüngatin fansoun. Nge üsap mochen aweiresikemi, pun üsap mochen nöümi moni, ngei ämi. Ewer, iei pwüngün pwe esap ekewe semirit repwe tümwünü semer me iner, nge ekewe sam me in repwe tümwünü nöür. 15 Iei mine üpwe pwapwa le fangala meinisin met mi wor rei, pwal püsin manauei, pwe üpwe alisikemi. Ifa usun, epwe kisikisila ämi echeniei pokiten a watte ai echenikemi?
16 Iwe, üa alletä pwe üsap aweiresikemi. Nge eman a tongeni apasa, pwe üa eman souraw, üa säreikemi ren kapas chofona. 17 Ifa usun, üa atupukemi ren eman lein ekewe soukünö üa tinala remi? 18 Üa tüngormau ngeni Titus pwe epwe feila remi, üa pwal tinala eman pwii souläng pwe epwe eti. Ifa usun, Titus a atupukemi? Ifa usun, Titus me ngang aisap tipeeufengen lon äm ekiek me äm föför?
19 Ifa usun, oua ekieki pwe äm aia püsin penikem me mwemi lon ekewe fansoun me mwan? Apwi, äm aia kapas mwen mesen Kot usun chon nom lon Kraist. Ämi pwiim kana mi achengicheng, aia föri mettoch meinisin pwe aipwe alisikemi lon ämi souläng. 20 Pun ngang üa niuokus, pwe lupwen üpwe torikemi üsap küna remi usun met üa mochen küna, nge ämi ousap küna rei met oua mochen küna. Üa niuokus pwe mi wor remi anini me lolowo, lisosong me meicha, kapasen esit me uwokükü, pwal lamalamtekia me fitikoko. 21 Üa niuokus, pwe lupwen üpwe liwinsefälito remi, ai Kot epwe atekisonaeitiu me mwemi, iwe, ngang üpwe kechüeiti chomong mi tipis me lom, nge resap aier seni ar föför mi fokun ngau, ar föförün lisowu me ar mocheisou.