Paipel 2 KORINT 7
7
Ämi chiechiei kana mi achengicheng, Kot a fen ngenikich ekei kapasen pwon meinisin, iei mine sipwe püsin limetikich seni sokun limengauen inis me ngün, o sipwe manaueni eu manau mi unusen pin lon ach niuokusiti Kot.
Än Paulus pwapwa
7.2-16
Oupwe suki letipemi ngenikem. Äm aisap föri och mi mwäl ngeni eman, aisap afeiengaua eman are atupu eman. Üsap apasa ei ren ai üpwe apwüngükemi, pun üa fen apasa me mwan pwe aia echenikemi, pwe sia nonomfengen fansoun meinisin, ese lifilifil ika sia manau ika sia mäla. A fokun watte ai apilükülükükemi, üa fokun sikäsinikemi. Lon äm riaföü meinisin ngang üa chüen apilükülüköch, a fokun somwola ai pwapwa.
Pun lupwen aia tori Masetonia, esap wor äm asösö, nge aia tolong lon riaföü fansoun meinisin. Ekoch aramas ra anini ngenikem, o niuokus a wor lon letipem. 2.Kor 2.13 Nge Kot, ewe mi echipa chokewe mi tipetekison, a echipakem ren wareton Titus. Nge aisap chök chip ren an feito, pwe aia pwal chip ren an apworausa ngenikem usun ämi echipa i. A apworausa ngenikem usun ämi pwositiei, usun ämi letipeta, pwal usun ämi tiliken le peniei. Iei mine a lapalap ai pwapwa lon ei fansoun.
Pun inamwo ika nei we toropwe a afisätä ämi letipeta, üsap liamam usun mine üa makkei lon. Ngang üpwe tongeni liamam lupwen üa küna pwe masouen nei we toropwe a afisätä ämi letipeta lon ekis chök fansoun. Nge iei üa pwapwa, sap pokiten üa afisätä ämi letipeta, nge pokiten ämi letipeta a afisätä ämi ekieksefäl. Ei sokun letipeta oua nom lon a fis ren letipen Kot, iei mine äm aisap atoto feiengau womi. 10 Pun ewe letipeta me ren Kot a atoto ekieksefäl mi emweni ngenikich ach sipwe küna manau, nge esap wor liamam lon. Nge ewe letipeta me ren fanüfan a atoto mäla. 11 Oupwe nenengeni met Kot a föri ren ämi letipeta: A afisätä ämi achocho pwal ämi mochen alletätä pwe esap wor ämi tipis. A afisätä ämi song, ämi niuokus, ämi pwos, ämi tiliken me ämi mochen apwüngü mine a ngau. Ren ekei mettoch meinisin oua pwärätä pwe esap wor och mwäl remi. 12 Iwe, inamwo ika üa makkei ngenikemi ena toropwe, üsap mak fän iten ätewe mi föri mine a mwäl, ika ätewe mi weires ren ewe mwäl, nge üa makkei ai üpwe afata ngenikemi pwe Kot a silei pwe oua fokun chüngükem. 13 Iei popun äm aia apilükülüköch.
Nge äm aisap chök apilükülüköch, aia pwal fokun pwapwa pokiten än Titus pwapwa, pun ämi meinisin oua alisi i pwe epwe chip. 14 Ngang üa sikäsinikemi ngeni Titus, o ämi ousap alichipüngüei. Äm aia kapas let ngenikemi fansoun meinisin, ina chök usun äm sikäsinikemi ngeni Titus a pwä pwe a let. 15 Iwe, än Titus tongekemi a fokun lalapala, lupwen a chechemeni usun ämi meinisin oua aleasochis ngeni an kewe öüröür, pwal usun ämi etiwa i fän tipetekison me menin. 16 Üa fokun pwapwa pwe üa tongeni apilükülükükemi lon mettoch meinisin.

7:5: 2.Kor 2.13