Paipel 2.KRONIKA 35
35
Josia a föri ewe Pasofer
35.1-19
(2.King 23.21-23)
Iwe, Josia a föri ewe Pasofer ngeni ewe Samol mi Lapalap me lon Jerusalem. Ra niela ekewe lamen Pasofer lon ewe engol me rüanün ränin ewe aeuin maram. Josia a fili ngeni ekewe souasor en me an angang o apöchöküla leluker, pwe repwe föri angangen lon imwen ewe Samol mi Lapalap. Iwe, a üreni ekewe mwän seni ewe ainangen Lefi mi aiti ngeni chon Israel meinisin än Kot kapas, ir ätekewe mi pin fän iten ewe Samol mi Lapalap, “Oupwe uwalong ewe pworofel lon ewe imwenfel Salomon nöün Tafit ewe kingen Israel we mwän a aüetä. Ousap chüen mwäreefetalei ei pworofel won afaremi. Iei oupwe angang ngeni ewe Samol mi Lapalap ämi we Kot, pwal ngeni nöün aramasen Israel. Oupwe amolakemiitä lon en me än saman cho lon en me an mwich, o aleasochis ngeni mine Tafit ewe kingen Israel me Salomon nöün we mwän ra akota. 2.Kron 8.14 Oupwe ütä lon ewe leni mi pin lon en me an mwich seni ewe ainangen Lefi fän iten eu me eu famili seni ekewe aramasen Israel, pwe oupwe alisiir lon ewe angang. Oupwe niela ekewe lamen Pasofer. Oupwe püsin apinikemi o amolätä ekewe mönün asor fän iten pwimi kewe ekewe chon Israel, pwe oupwe föri mine Moses a allük fän alon ewe Samol mi Lapalap.”
Iwe, Josia a fang ngeni ekewe aramasen Israel meinisin mi nom ren ükükün ilik ngeröü lam me nienifön kuuch, pwe ar mönün asoren Pasofer, pwal ülüngatngeröü ätemwänin kow. Ekei mönün asor ra towu seni nöün ewe king pwiin man. Pwal nöün kewe nöüwis ra fangala nöür man seni mochenin letiper ngeni ekewe aramas, ngeni ekewe souasor me ekewe mwän seni ewe ainangen Lefi. Iwe, Hilkia, Sekaria me Jehiel, ir ekewe nöüwis lon imwenfel, ra ngeni ekewe souasor ükükün ruungeröü wonopükü lam me nienifön kuuch, pwe ar mönün asoren Pasofer, pwal ülüpükü ätemwänin kow. Nge Konania me Semaia me Netanel pwin kewe, pwal Hasapia, Jeiel me Josapat, ekewe souemwenin chon ewe ainangen Lefi, ra ngeni ekewe mwän seni ewe ainangen Lefi ükükün limungeröü lam me nienifön kuuch, pwe ar mönün asoren Pasofer, pwal limepükü ätemwänin kow.
10 Iwe, lupwen ra wes le amolätä meinisin fän iten ewe Pasofer, ekewe souasor me ekewe mwän seni ewe ainangen Lefi ra ütä me lon lenier, usun mine ewe king a fen allük. 11 Ra niela ekewe lamen Pasofer, nge ekewe souasor ra äsupu ngeni ewe rongen asor ewe cha ra angei seni ekewe mwän seni ewe ainangen Lefi mi etika silin ekewe mönün asor. 12 Mürin, ra aimwüela ekewe mönün asoren kek, pwe repwe ineti ngeni ekewe aramasen Israel lon eu me eu ar kewe cho, pwe ir repwe eänir asor ngeni ewe Samol mi Lapalap, usun a fen mak lon än Moses puken allük. Iei usun ra pwal föri ngeni ekewe ätemwänin kow. 13 Iwe, ekewe mwän seni ewe ainangen Lefi ra arapa ewe lamen Pasofer won ekkei usun pwüngün allükün. Nge ekewe asor mi pin ra kuku lon nape, lon kama pwal lon paan, o müttir ineti ngeni ekewe aramasen Israel meinisin. Eks 12.8-9
14 Mürin ei, ekewe mwän seni ewe ainangen Lefi ra amolätä ener pwal enen ekewe souasor, ir ekewe mwirimwirin Aaron, pun ekewe souasor ra achocho le eäni asor ekewe asoren kek me ekewe kinikinin kiris tori lepwin. Iei usun ra amolätä fän iter pwal fän iten ekewe souasor. 15 Nge ekewe chon köl ir mwirimwirin Asaf ra ütä lon lenier usun pwüngün ewe allük seni Tafit me Asaf, Heman me Jetutun nöün ewe king soufos. Iwe, ekewe chon masen ekewe asamalap mi ütä lon eu me eu kewe asamalap, resap feila seni lenier, pun pwiir kewe ekewe mwän seni ewe ainangen Lefi ra amolätä ewe Pasofer fän iter. 1.Kron 25.1
16 Iei usun unusen ewe angang ngeni ewe Samol mi Lapalap a fisitä lon ewe ränin fän iten ewe Pasofer, pwal fän iten ekewe asoren kek ra eäni won än ewe Samol mi Lapalap we rongen asor, usun ewe king Josia a allük. 17 Iwe, ekewe aramasen Israel meinisin mi feito ra föri ewe Pasofer lon ewe fansoun, ra pwal föri ewe chulapen mongö pilawa esap wor iis lon lon ükükün fisu rän. Eks 12.1-20 18 Esap wor eu Pasofer usun ei a fis lon Israel seni fansoun manauen ewe soufos Samuel. Esap pwal wor eman lein ekewe kingen Israel me lom, a föri ei sokun Pasofer usun ei Josia a föri, fiti ekewe souasor me ekewe mwän seni ewe ainangen Lefi, ekewe chon Juta me chon Israel, pwal ekewe chon Jerusalem meinisin. 19 Iwe, ra föri ei Pasofer lon engol me waluen ierin mwün Josia.
Josia a mäla
35.20-27
(2.King 23.28-30)
20 Mürin än Josia awesala ekei mettoch meinisin fän iten ewe imwenfel, Neko ewe kingen Isip a feila pwe epwe maun lon Karkemis arun ewe chanpupu Oifrat. Iwe, Josia a feila pwe epwe maun ngeni. 21 Nge Neko a tinala chon künö ren pwe repwe üreni, “Met punum ngeniei, en kingen Juta? Ngang üsap feito pwe üpwe maun ngonuk ikenai, nge üpwe maun ngeni pwal eu mwü. Iwe, Kot a allük ngeniei pwe üpwe amüttiri ei maun. Kot a etiei, iei mine kopwe ükütiu le ü ngeni, pwe esap niikela.” 22 Iei mwo nge Josia esap fokun kul seni Neko. Esap mochen aüselinga ekewe kapas Neko a üreni fän alon Kot. A asokala üfan o feila maun ngeni me lon ewe maasiesin Mekito. 23 Iwe, lupwen ra maunfengen, nöün Neko kewe chon esefich ra peki ewe king Josia. Ewe king a üreni nöün kewe sounfiu, “Oupwe uweeila, pun üa fokun kinas.” 24 Iei mine nöün kewe sounfiu ra ekiewu Josia seni wan woken o ekietä won aruofochun wan woken. Mürin, ra uwala Jerusalem. Iwe, Josia a mäla, nge ra peiaseni lon peiasen ekewe king. Nge chon Juta me chon Jerusalem meinisin ra kechüeiti Josia. 25 Pwal ewe soufos Jeremaia a föri echö kölün kechü fän iten Josia. Nge ekewe chon köl mwän me fefin ra föüni iten Josia lon ar kölün kechü tori ikenai. Ei a wiliti eu örüni lon Israel. Iwe, ei köl a makelong lon ewe puken kölün kechü. 26 Nge lusun pworausen än Josia föför, an asamolu ewe Samol mi Lapalap me an aleasochisi mine a mak lon an kewe allük, 27 an kei föför meinisin seni lepoputan tori lesopolan an nemenem a makelong lon puken uruwon ekewe kingen Israel me Juta.

35:4: 2.Kron 8.14

35:13: Eks 12.8-9

35:15: 1.Kron 25.1

35:17: Eks 12.1-20