Paipel 2.KRONIKA 33
33
Usun än Manasa nemenem
33.1-20
(2.King 21.1-9)
Iwe, Manasa a ierini engol me ruu, lupwen a tolong lon wisan wisen king. A nom lon Jerusalem o nemeni Juta lon ükükün lime me limu ier. Manasa a föri mine a ngau me fän mesen ewe Samol mi Lapalap ren an föri ekewe föför mi anioput chon ekewe mwü ra föri, ir chokewe ewe Samol mi Lapalap a asürela me mwen ekewe aramasen Israel. Jer 15.4 Pun a aüsefälietä ekewe lenien fel won ekewe leni tekia, Hiskia saman we a atarela. A senätä rongen asor fän iten ewe anü Paal o föri uluulun ewe anüfefin Asera, a pwal fel ngeni ekewe fün läng meinisin. Iwe, Manasa a senätä sokopaten rongen asor lon ewe imwenfel, iei ewe leni ewe Samol mi Lapalap a apasa usun, pwe aramas repwe fel ngeni ie tori feilfeilachök. 2.Kron 6.6 Nge Manasa a senätä rongen asor fän iten ekewe fün läng meinisin me lon ekewe ruu lenien mwich mwen ewe imwenfel. Iwe, a kenala nöün ät pwe eu asor lon ewe lemolun Hinom, a pwal föri angangen souasisil me souwo me sourong o churi watawa me souawarawar. Manasa a föri chomong sokun föför mi ngau me fän mesen ewe Samol mi Lapalap o asonga i. Manasa a föri eu uluulun anümwäl o anomu lon ewe imwenfel, iei ewe leni Kot a kapas usun ngeni Tafit pwal ngeni Salomon nöün we mwän, “Ei imwenfel me lon Jerusalem, iei ewe leni üa filätä seni lein lenien ekewe ainangen Israel meinisin, pwe aramas repwe fel ngeniei ie tori feilfeilachök. Üsap chüen tinala chon Israel seni ewe fanü üa ngeni ar kewe lewo, are repwe chök tümwünüöchü meinisin mine üa allük ngeniir o aleasochisi ekewe allük me pwüüng meinisin ra angei seni Moses.” 1.King 9.3-5; 2.Kron 7.12-18 Iwe, Manasa a atokala chon Juta me Jerusalem, pwe ra föri mine a ngau lap seni chon ekewe mwü ra föri, ir chokewe ewe Samol mi Lapalap a arosala me mwen ekewe aramasen Israel.
10 Iwe, ewe Samol mi Lapalap a kapas ngeni Manasa me nöün aramas, nge ir resap mochen aüselinga. 11 Iei mine ewe Samol mi Lapalap a mwüt ngeni ekewe sounemenemen ewe mwichen sounfiun ewe kingen Asiria, pwe repwe tolong lon Juta. Iwe, ra liapeni Manasa, ra kakiani o föti ngeni selipiras, mürin ra uwala Papilon. 12 Nge lupwen Manasa a nom lon riaföü, a tüngor pwe ewe Samol mi Lapalap än an kewe lewo we Kot epwe ümöümöch ngeni, a pwal fokun atekisonätiu me fän mesan. 13 A iotek ngeni Kot, nge i a etiwa an siö. A aüselinga an tüngor o aliwinisefäliela Jerusalem, pwe epwe nemenisefäli mwün. Mürin, Manasa a silei pwe ewe Samol mi Lapalap i Kot.
14 Ekoch fansoun mürin, Manasa a senisefälietä ewe tit me lükün ewe telinimwen Tafit lotoun ewe puächen koluk lon Kihon lon ewe lemol tori ewe lenien tolong ngeni ewe Asamalapen Ik, a sopwela ewe tit pwelin ewe leni itan Ofel o senätä pwe a fokun tekiatä. A pwal anomu sounemenemen ekewe mwichen sounfiu lon ekewe telinimwen Juta meinisin mi pöchökül tittir. 15 Manasa a atowu seni imwen ewe Samol mi Lapalap uluulun ekewe koten ekis me uluulun ewe anümwäl, a pwal ataela ekewe rongen asor i a senätä won ewe chuk ia imwen ewe Samol mi Lapalap a kaütä ie, pwal lon Jerusalem. Iwe, a atururela meinisin lükün ewe telinimw. 16 Manasa a pwal förisefäli än ewe Samol mi Lapalap rongen asor o eäni asoren kinamwe me asoren kilisou me won. Iwe, a allük ngeni chon Juta pwe repwe angang ngeni ewe Samol mi Lapalap ewe Koten Israel. 17 Iei mwo än ekewe aramas chüen asor lon ekewe lenien fel won ekewe leni tekia, nge ra chök asor ngeni ewe Samol mi Lapalap ar we Kot.
18 Nge lusun pworausen än Manasa föför, an iotek ngeni Kot, pwal ekewe kapas ekewe soufos ra eäni ngeni fän iten ewe Samol mi Lapalap ewe Koten Israel a makelong lon puken uruwon ekewe kingen Israel. 19 Än Manasa iotek, pwal usun än Kot etiwa an tüngor, an kewe tipis meinisin me an kirikiringau, pworausen ekewe leni tekia ia a aüetä ie ekewe lenien fel, pwal usun an aüetä uluulun ewe anüfefin Asera me ekewe uluulun anümwäl mwen an ekieksefäl, meinisin a makelong lon puken uruwon ekewe soufos. 20 Manasa a mäla, nge ra peiaseni lükün imwan. Iwe, Amon nöün we mwän a siwili lon wisan wisen king.
Usun än Amon nemenem
33.21-25
(2.King 21.19-26)
21 Iwe, Amon a ierini rüe me ruu, lupwen a tolong lon wisan wisen king. A nom lon Jerusalem o nemeni Juta lon ükükün ruu ier. 22 Amon a föri mine a ngau me fän mesen ewe Samol mi Lapalap, usun Manasa saman we a föri. A fel ngeni ekewe uluulun anümwäl meinisin, Manasa saman we a föri, o asor ngeniir. 23 Nge esap atekisonätiu o kul ngeni ewe Samol mi Lapalap, usun Manasa saman we a föri. Nge ei mwän Amon a chök alapala an tipis. 24 Iwe, nöün Amon kewe nöüwis ra rawangauei o niela me lon imwan. 25 Nge ekewe aramasen Juta ra niela chokewe meinisin mi rawangauei ewe king Amon o seikätä Josia nöün we mwän, pwe epwe siwili lon wisan wisen king.

33:2: Jer 15.4

33:4: 2.Kron 6.6

33:8: 1.King 9.3-5; 2.Kron 7.12-18