Paipel 2.KRONIKA 27
27
Usun än Jotam nemenem
27.1-9
(2.King 15.32-38)
Iwe, Jotam a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün engol me wonu ier. Iten inan Jerusa nöün Satok we fefin. Jotam a föri mine a pwüng me fän mesen ewe Samol mi Lapalap, usun chök Usia saman we. Nge mine a sokola seni won, pwe esap tomwälilong lon imwenfelin ewe Samol mi Lapalap. Nge ekewe aramas ra chök sopwela le föri föför mi ngau. Iwe, Jotam a förätä ewe asamalap lon imwen ewe Samol mi Lapalap me efeng, a pwal awattei angangen won tittin Jerusalem lon ewe leni itan Ofel. A pwal aüetä chomong telinimw won ewe fanü mi chukuchukutä lon Juta o aüetä imw pöchökül me imw tekia won ekewe leni mi wöllap. Iwe, Jotam a maun ngeni ewe kingen Amon me nöün kewe sounfiu o akufuur. Mürin, ekewe chon Amon ra ngeni Jotam ina epwe ükükün rüanü ton silifer, lime ngeröü tuuk wiich me lime ngeröü tuuk parli lon ewe ier. Iwe, ra ngeni ei aükükün lon pwal aruuen me aülüngatin ier. Iei usun Jotam a pöchökülela, pun a fokun aleasochis ngeni ewe Samol mi Lapalap an we Kot. Nge lusun pworausen än Jotam föför meinisin, an kewe maun a eäni me an kewe angang a föri, a makelong lon puken uruwon ekewe kingen Israel me Juta. Iwe, Jotam a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün engol me wonu ier. Jotam a mäla, nge ra peiaseni ren an kewe lewo lon ewe telinimwen Tafit. Iwe, Ahas nöün we mwän a siwili lon wisan wisen king.