17
Jehosafat a apöchöküla mwün
17.1-19
Iwe, Jehosafat nöün Asa we mwän a siwili saman lon wisan wisen king. A fokun pöchökül lon an ekiekin ü ngeni Israel. A anomu sounfiu lon ekewe telinimwen Juta mi pöchökül tittir o alenia mwichen sounfiu lon ewe fanü Juta, pwal lon ekewe telinimwen Efraim, ekewe telinimw Asa saman we a liapeni. Iwe, ewe Samol mi Lapalap a eti Jehosafat, pun a apirü manauen saman we le poputän an nemenem, nge esap fel ngeni ekewe anü Paal. A angang ngeni än saman we Kot o aleasochisi an kewe allük, nge esap föri usun mine ekewe chon Israel ra föri. Iei mine ewe Samol mi Lapalap a apöchöküla mwün Jehosafat, nge chon Juta meinisin ra uwala lifang ren, pwe a wor chomong wöün me iteüöchün. Iwe, a tipepwora le angang ngeni ewe Samol mi Lapalap, a pwal ataela ekewe lenien fel won ekewe leni tekia me ekewe uluulun ewe anüfefin Asera me lon Juta.
Iwe, lon aülüngatin ierin mwün Jehosafat a tinala nöün kewe nöüwis Penhail, Opatia, Sekaria, Netanel me Mikaia, pwe repwe sense lon ekewe telinimwen Juta. Nge ekewe mwän seni ewe ainangen Lefi iter Semaia, Netania, Sepatia, Asael, Semiramot, Jehonatan, Atonia, Topia me Topatonia, pwal ekewe souasor Elisama me Jehoram ra etiir. Ra uwei puken än ewe Samol mi Lapalap allük, pwe repwe nöünöü le aiti ngeni chon Juta. Iwe, ra feila lon ekewe telinimwen Juta meinisin o aiti ngeni ekewe aramas ekewe allük.
10 Iwe, ewe Samol mi Lapalap a aworato niuokus won chon ekewe mwü meinisin mi nom ünükün Juta, pwe resap maun ngeni Jehosafat. 11 Ekoch me lein ekewe chon Filistia ra uwato chomong silifer me sokopaten lifang ren Jehosafat. Nge ekewe chon Arapia ra pwal uwato ren ükükün fisungeröü füpükü ätemwänin sip me fisungeröü füpükü ätemwänin kuuch. 12 Iwe, Jehosafat a fokun fefeitä lon an nemenem. A aüetä imwen maun lon Juta, pwal telinimw, pwe epwe iseis pisek lor. 13 A wor chomong an pisek lon ekei telinimw. A pwal wor nöün meilapen sounfiu lon Jerusalem, mwän mi fokun pwora. 14 Iei tettelir lon ar kewe cho: Atna, ewe meilapen sounfiu seni Juta, a nemeni ükükün ülüpükü ngeröü mwän mi fokun pwora. 15 Jehohanan ewe mi tap mürin a nemeni ükükün rüepükü walik ngeröü sounfiu. 16 Nge ewe aülümanün Amasia nöün Sikri we mwän a nemeni ükükün rüepükü ngeröü mwän mi fokun pwora. Amasia a angang ngeni ewe Samol mi Lapalap ren püsin mochenin letipan. 17 Nge Eliata ewe meilapen sounfiu mi fokun pwora seni Peniamin a nemeni ükükün rüepükü ngeröü mwän mi uwou esefich me tittin maun. 18 Jehosapat ewe meilap mi tap mürin a nemeni ükükün ipükü walik ngeröü mi uwou pisekin maun. 19 Ikkei ir ekewe mwän mi angang ngeni ewe king lon Jerusalem, lükün chokewe ewe king a anomuur lon ekewe telinimw mi pöchökül tittir lon unusen Juta.