Paipel 2.KRONIKA 15
15
Än Asa akasiwili akoten mwün
15.1-19
Iwe, Ngünün ewe Samol mi Lapalap a feitiu won Asaria nöün Otet we mwän. A towu seni ewe telinimw pwe epwe churi Asa. Iwe, a üreni, “Oupwe aüselingaei, Asa me chon Juta me Peniamin meinisin. Ewe Samol mi Lapalap a etikemi, lupwen oua eti i. Are oua kütta i, oupwe küna, nge are oua pöütala i, epwe pöütikemiila. Fansoun langatam esap wor än chon Israel Kot mi wesewesen Kot, esap wor nöür souasor mi afalafaleer, esap pwal wor ar allük. Nge lupwen ra tolong lon riaföü, ra kul ngeni ewe Samol mi Lapalap ewe Koten Israel. Ra kütta i o küna. Lon ekewe fansoun esap wor eman aramas a tongeni saifetal fän kinamwe, pun chon ekewe fanü meinisin ra nonom lon osukosuk me fitikoko watte. Eu mwü a maun ngeni pwal eu mwü, nge eu telinimw a maun ngeni pwal eu telinimw, pun Kot a aweiresiir ren sokopaten riaföü. Nge ämi oupwe tipepwora, nge ousap apwangapwang, pun epwe wor liwinin ämi angang.”
Iwe, lupwen Asa a rongorong ekei kapas Asaria nöün Otet we mwän a osuni, a tipepwora. A ataela ekewe uluulun anümwäl mi anioput seni unusen ewe fanü Juta me Peniamin, pwal seni ekewe telinimw a liapeni me won chukuchukutän ewe fanü Efraim. A pwal försefäli än ewe Samol mi Lapalap we rongen asor mi nom mwen kengkangen imwen ewe Samol mi Lapalap. Mürin, Asa a amwichafengeni chon Juta me Peniamin meinisin, pwal chokewe seni Efraim, Manasa me Simeon mi siamüfetal leir. Pun chomong aramas ra sü seni Israel o feila ren Asa, lupwen ra küna pwe ewe Samol mi Lapalap an we Kot a eti. 10 Iwe, ra mwichefengen lon Jerusalem lon aülüngatin maramen ewe engol me limuen ierin mwün Asa. 11 Lon ewe ränin ra asor ngeni ewe Samol mi Lapalap seni mine ra liapeni ükükün füpükü ätemwänin kow me fisungeröü sip. 12 Iwe, ra tipeeufengen le eäni eu pwon, pwe repwe fel ngeni ewe Samol mi Lapalap, än ar kewe lewo we Kot, ren unusen leluker me unusen ngünür. 13 Nge iö kana resap fel ngeni ewe Samol mi Lapalap ewe Koten Israel repwe ninnila, ese lifilifil ika i eman alüal ika eman chinlap, ika eman mwän ika eman fefin. 14 Iwe, ra pwon fän akapel ngeni ewe Samol mi Lapalap fän mwelier mi leüömong, fän akapwas, pwal ren tikin rappwa me säwi. 15 Chon Juta meinisin ra meseik pokiten ewe pwon fän akapel ra eäni ren unusen leluker. Ra pwal fel ngeni Kot ren wesewesen mochenin letiper. Iwe, ewe Samol mi Lapalap a etiweer o fang ngeniir kinamwe seni ekewe mwü mi nom ünükür.
16 Ewe king Asa a pwal awesi Maaka inelapen saman we seni wisan wisen inelapen king, pun a föri eu uluulun ewe anüfefin Asera mi fokun anioput. Iwe, Asa a pöküetiu o atatakisi ei uluulun anümwäl o kenala me arun ewe öüwö Kitron. 17 Inamwo än Asa esap ataela ekewe lenien fel won ekewe leni tekia meinisin me lon Israel, nge lelukan a unus ngeni ewe Samol mi Lapalap lon ränin manauan meinisin. 18 Iwe, a uwato lon ewe imwenfel ekewe pisek Apia saman we a apini fän iten Kot, pwal ekewe pisek seni silifer me kolt püsin i a apini. 19 Iwe, esap chüen fis maun tori ewe ilik me limuen ierin mwün Asa.